EZEKEL 25 - BAIBEL (BSI)

Amunmi shou Tungkuptsa

¹ AMPEU no ivilo pi,

² “Thinikuau timio, Amunmi ghakhu kudau jupuwuno tungkuptsa pipukulo.

³ Amunmi vilo ni, Akughushu MPEU no kiu piani keno inilo pilo: Nonguye ichineki shipixivekeulo, Israilmi ghakhu kutsalevekeu ithulu kelo eno Juda lo akemiqo haphe pupovekeu ithulukeulo nonguye alokivishi ani.

⁴ Nonguno alokivi shiveke ghenguno ino kipelau asayeqha lo akemi pelo nongu leluve penani. Panonguno noghakhulo aphiki shipe qhi nani eno tilau acheuve nani. Panonguno nowu shikepushi akeu xathi chu nani eno akichhizu sho nani.

⁵ Ino Raba phughi pesu kemel qhikeu-a kughulhovetsu nani eno Amunmi ghakhu kumtsu bheri qhikepu-a shivetsu nani, tishianguno niye AMPEU kepi nonguno ithi nani.

⁶ “Akughushu MPEU no kiu pianikeno tiye hike: Nonguno alokivi launo au kukhu eno ilheku ilheiqike. Nonguno Israil ghakhu jumithike.

⁷ Tighenguno, ino nongu shou iu chhopuku nani eno ashiayeh kutami ulo nongu kughape suvetsu nani, tipaqono nongu ghesuqhi eno nongu xupuwuve nani. Ino qhoi nongu kutsaleve nani kehu nonguye ashiayeh lakhi shi achemove nani momu noghakhu kuha nani. Tileno niye AMPEU kepi nonguno ithi nani.”

Muab shou Tungkuptsa

⁸ Akughushu MPEU no pike, “Muab no Juda ye ashiayeh kutami kumtsu toikepi pike ghenguno,

⁹ alughilo Muab susholu akeu phughiqoye ino leighipe nani, tipagholo aphughi akiviuqo ghi - Beth Jeshimot ngo Baal Meon eno Kiriat Haim ishi.

¹⁰ Ino kipelau asayeqha akemi Amunmi mutsa Muab ghi leluve peni, ikehu Muab ye hinguno hilau ashiayeh shi achemove penike.

¹¹ Ino Muab ghimeqhi nani eno hileno niye AMPEU kepi panonguno ithi nani.”

Edom shou Tungkuptsa

¹² Akughushu MPEU no pike, “Edom lo akemiqono Juda shou amkhu lhoksa luke eno tipau mukhu lukeu huno Edom shou ado kushuwa kutolo kuqu auvae.

¹³ Tighenguno ino asheshuve anike ino Edom ghimeqhi nani eno tilehi timi kumtsu, lhoxu kumtsu pithivetsu nani. Ino Teman phughi lono Dedan phughi kutolo kughukughaleive tsu nani.

¹⁴ Iwu timi Israilmino ighenguno Edom shou amkhu lutsu nani, panonguno Edom pelo muqhumza axu idepe nani. Edom no imkhu kulu kiqiye kiu keno ithi nani.” Akughushu MPEU no pivae.

Filistiya shou Tungkuptsa

¹⁵ Akughushu MPEU no pike, “Filisityamino khaghino pano ghumi shi achekemi shou amkhu kulu alhoksapushi luke eno panonguno kimthikile kelauno tipaqo kutsaleveke.

¹⁶ Tighenguno ino asheshu anike niye Filistiyami lewu nani eno panoqo joleve nani. Filistiya khilalo kughuna akemi kumtsu ino kutsave nani.

¹⁷ Ino akuighupu shi panoqo ghimeqhi nani eno panoqo shou aloghu kighide kutsasa puku nani. Panongu pelo iloghu pupe nani. Tileno niye AMPEU kepi panonguno ithi nani.”