EZEKEL 2 - BAIBEL (BSI)

¹ “Thinikuau timio, puthugholo, Niye oputsa nishi anike.”

² Asutsa iputsa akelo Alhou ghungu ilolo iloghive eno isunhe puthu pe puthughovepe eno asutsano ishi pikibe akeu ino chilu,

³ “Thinikuau timio, Israilmi lau ino opuwu ani. Panonguno ihebide akumou shiani eno pano puasuqo toi ihebide achephike.

⁴ Panonguye kuthovi acheni eno isumsakeu kuhae, tighenguno ni, Akughushu MPEU no kiu panoqo vilo piani keno tipau opelo panoqo vilo pipe nike ino opuwu ani.

⁵ Hekibidemi hupaqono otsa initsu na initsumo namu, tungkupmi lakhi panoqo gholo achekepi panonguno ithi nani.”

⁶ “Ikemu, thinikuau timio, noye panoqo musa kevilo momu panonguno kiu pini keno tipau musa kevilo. Panonguno ohachile, oghechile eno omithi nanike, noye achuwa paza gholo xuakeshi nani. Tishi aghimu hekibidemi hupaqo musa kevilo momu panonguno pikeu musa kevilo.

⁷ Panonguno initsu na monamu ino ovilo kiu pilopini keno noye tipau pesu panoqo vilo pilo. Panonguye hekibidemiqo kepi kumsululo.

⁸ “Thinikuau timio, ino kiu ovilo pini keno inilo, panoqo toi hebidekeu shikevilo. Okichi xukholo eno ino kiu otsuni keno tipau chuvelo.”

⁹ Au lakhi ikudau chhopuwo keu ino ithulu eno tipaulo likuzu kaku peake.

¹⁰ Au huno likuzu-kaku xachhove eno tipau putoputo kudau yepuku puakeu ino ithulu, tiye amlo ghuju ngo qamlokeu eno sukutukeu ghugha tipaulo yepuku puae.