EZEKEL 18 - BAIBEL (BSI)

¹ AMPEU no ivilopi,

² “Israil yeghilo timiqono pikishe pi achekeu holetsa hipauye kiu kya?” “Apuazano atsayithi akiqhi chuve kelo atianulino ahu muqu ke,”

³ Akughushu MPEU no piani, “Kuchouno niye xuakeu Lhou ke, hinguno hilauye nonguye Israil lo aholetsa hipau pi ide pemo nani.

⁴ Timi kumtsu kuxuye iwuke, apuaza kuxu na atianuli kuxu pinamu iwuke. Timi khuuno axine shini keno timi tipauno thi nanike.

⁵ “Tsala timi lakhino akivimi, achipiu shikemi eno amikuchomi shiaghini aye;

⁶ paye Israilmi su-atu julhoqo mlla chemo momu naghuto kutsuqa chinealo akumllagho tsukeu chuchemo, paye akusami nipu shipusa chemo momu totimino mithekumodo sholu akelo paye kupunu wuchemo;

⁷ kutami khumu nedaqoda chemo, nalukemino athelilo qhipaghi keu nhemgha tsuchileve cheni, puka suxalu chemo, kumlhomi pa chuqu tsucheni eno aphimini kuhakemi puucheni,

⁸ akighishe luchemo momu alau luvetsu chemo, alhoksa jelilo chhosumo eno timi dolo kuchou xakutha peitha cheni keno

⁹ timi tikithipuno ino ahza tsukeu papelu ani eno iyezah akivishi pechenike. Titoikeu timino achipiuke eno paye xulu nanike,” ipi Akughushu MPEU no pike.

¹⁰ Tsala timi tipauno anu lakhi akelo pano puka suxakulumi shicheni, ghiqhi cheni,

¹¹ paye papuno hipaqo khilemu shichemokeu pano shi cheni, paye naghuto kutsuqa chine-alo heqhi mllakeu chucheni, pa kusami nipu shipusa cheni;

¹² kumlhomi qodaneda cheni, puka suxalu cheni, nalukeu theli anhemgha qhipuaghikeu tsuchilemo, asu-atu julho shou pa nhethi jupuku cheni eno tipa-alo kuchhube kutsula kumlla shi cheni,

¹³ akighishe lu-ghi puna cheni, eno alau luchenike. Paye xulu nani kesha? Moe, paye xumla nani. Paye kuchhube kutsula hipaqo kumtsu shiveake ikehu paye thiniake. Pa kithiye pa makho shiniake.

¹⁴ Tsala timi hi akiniuno anu lakhi ani ikelo pa puno axine kumtsu shiche keu pano ithuluni ikemu pa pu papemoni.

¹⁵ Paye Israilmi su-atu julho mllamoni momu naghuto kutsuqa chine-alo heqhipe mllakeu chumoni; pa kusami nipu shipusa chemo

¹⁶ momu khumu nedaqoda chemo momu puka suxalu chemo; nalukeu thelilo anhemgha qhipuaghi keu luve chemo, muzuthi akemi achuqupu tsuche eno aphi kumsa aghikemi aphimini puuche,

¹⁷ paye alhoksa ashinikeu suchileluve che, akighishe lunike punachemo momu ala luchemo. Paye iyezah pecheni eno ino ahza tsukeu papelu cheni. Paye papu xine ghenguno thimo nanike ikemu paye mutsuqheino xulu nanike.

¹⁸ Papu sheloye, pishiqhiche, puka suxalu che eno timi gholo alhoksa pulhapuju shiacheke. Ikehu pa likhi pano axine shivekeu ghenguno paye thiveke.

¹⁹ “Ikemu nonguno pikeuno, kushiye anuye papu xine ghenguno aghime sholumo kya? Kughou anu no achipiu eno akivi kiu keno tipau shicheni, eno paye tsaqui iyezahqo pelu achenike tighenguno paye mutsuqheino xulu nanike.

²⁰ Timi khuuno axine shikeno paye thi nani. Anu lakhiye papu xineqo ghenguno aghimepu shimo nani momu anu xineqo ghenguno papu ghimekepu shimo nanike. Amikuchomiye pano achipiu shikeu saxu ithulu nani eno alhoksamiye pano alhoksa shikeu ghimepu sholu nanike.

²¹ “Alhoksami lakhino axine shimove puzu iyezahqo peluaye, kiuno achipiu eno akivi keno tipau pano shiaye paye thimo nani mutsuqheino paye xulu nani.

²² Pa xine kumtsu peivetsu nani eno paye xulu nani kughengu kiuno achipi keno tipau pano shike.

²³ Alhoksami lakhi thivekeulo niye amlo kiqi shicheni kughashi kesha?” “ Moe, Niye pano xakide ighilu puzu xuluve penikeuno imlo kiqike ipi Akughushu MPEU no pike.

²⁴ “Ikemu amikuchomi lakhino akivipu shimoveno alhoksa kumtsu shicheuve eno alhoksamino kuchhube kutsula jeli shichekeu shiuve aye, paye xuakulupu kesha? Moe! Pano akivipu shipuakeu lakhimu kumsulu tsumo nani. Pa mikuchokumo eno pa xineqo ghenguno paye thi nanike.

²⁵ “Ikemu nonguno ishi pie, ‘AMPEU no kiu shikeno tiye achipi kumoe!’ Nongu Israilmiqo, itsa inilo. Nonguye ino mla ithakeu gholaye achipi kumo kepi kumsu cheni. Nonguno shichekeu gholau no achipi kumouke.

²⁶ Kughou amikuchomi lakhino akivipu shimoveni eno alhoksa shiuve puzu thive aye pano alhoksa shikeu ghenguno paye thive cheni.

²⁷ Kughou alhoksami lakhino alhoksa shimoveni eno achipiu ngo akivipu shiaye, paye pa kuxu xalu anike.

²⁸ Paye pano kiu shi anikeno kumsu kutoju puzu axine shimoveke, paye mutsuqheino thimo nani ikemu xualu nani.

²⁹ Nongu Israilmino pikeuno, ‘AMPEU no kiu shikeno tiye achipi kumoe’ ipike. Nonguno kumsukeuno ino shichekeu gholaye achipi kumoe pike. Nonguno shichekeu gholau no achipi kumouke.

³⁰ “Itehiye ni, Akughushu MPEU no nongu Israilmi vilo pianike ino nongu milakhi khino kiu mlapuani keno tipau lono kughatha nani. Nonguno alhoksa kumtsu shiakeu lono tsughusu ighivelo eno nongu xine pelo nongu kutsavepe kevilo.

³¹ Nonguno alhoksa shiakeu kumtsu phevelo eno nonguye amlo kithe akukumsu kithe pululo. Israilmiqo, nonguye kushiye thiani kya?

³² Ikehu Nongu xine lono tsughuvelo eno xululo.” Akughushu MPEU no pike.