EZEKEL 16 - BAIBEL (BSI)

Jerusalem Amikucho kumou

¹ Itaghi AMPEU no iputsa puzu pi,

² “Thinikuau timio, Jerusalem vilo lino kiu kuchhube kutsulapu shipuani keno kichephe piyelo.

³ Jerusalem vilo Akughushu MPEU no li vilo piakeu pesu pilo: “Noye Kanan yeghi lono punu eno saputhuke. Opuye Amarimi eno ozaye Hatimi ke.

⁴ Kughou opunu keno khunomu opola ghatha tsumoe momu azu okukuchhu moe momu amiti pesu ophi nutsumoe momu aphi pe okuzulu moe.

⁵ Khunomu anhethimu ojumoke eno okimiye kepi hipaqo vehu lakhimu shitsuni kemi kuhake. Opunu kelo khunomu okimiyemoke eno noye khalau ikhipe vepheveke.

⁶ “Tileno ino vechesu wuche kelo noye olikhi ojiloihi aghike. Ajino okuzuluve aghike ikemu ino opelo thive pemoke.

⁷ Atsanibo lakhi checheyikeu toi ino opelo thuwulupeke eno noye choshiyi thuwuve, chuqumghaive eno ilimi lhothe lakhi shive. Okichhiye akoghe kivi shive eno osa thuwuve ikemu noye aphi kumsa ke.

⁸ “Itaghi ino vechesu wuchekelo noye alokile kimiye kepu ghuloki shivekeu ino ithulu. Ino uchekeu phi pesu ophi kumsa akeu ino opu uve eno okimiyeni keu shi ovilo piqhive. Iye, ino osasu kulakupu shinikeu puloshoqhi shike eno noye iwu shiluveke.” Hiye Akughushu MPEU no piani.

⁹ “Tithiu ino azu pesu ophilo aji akeu qhuvetsu eno oyikolo oliv teli pesu nutsu.

¹⁰ Ino aye shisukeu phikuzu pesu opu-uve eno ashiyiko akiviuno shikeu apukhukuqho ngo muduniyikeu phi kutsu kukha eno phepheyi keu hekuuphi pesu otsuke.

¹¹ Ino achiku achipu pesu opipeke, oulo asapu sutsu eno okuolo achila xini pipeke.

¹² Onigipelo ayi khayi supipe, okinilo axamunuyi kighipipe eno jukivi kutsukuqho opipe ishike.

¹³ Noye shunayi ngo tsandiyino shikeu achiku achila pepu eno noye pulhapuju aye shisukeu phimini eno phepheyi phimini pepuche. Noye asho mukhu akivi pesu shikeu sho chucheke eno akhingozu ngo oliv teli peitha che. Ojukivino qhivutsuniyi ache eno noye akukaliu lakhi shiveke.

¹⁴ Ojukivi aghile ghenguno ashiayeh kumtsu gholo ojekipi shi ache kughengu okughapesu jukighilepu shitsukeu huye ino ke.” Hiye Akughushu MPEU no pianike.

¹⁵ “Ikemu noye ojukivi shou pukhu auve, eno ojekipi shi achekehu iqho iqikichemi kumtsu sasu salha wuve.

¹⁶ Nono ophimini hami pesu nono mllakeu a ananu shipipe eno tileno kusalhami toi kumtsu sasu salhake.

¹⁷ Ino shunayi ngo tsandiyino shikeu chiku chila otsukeu nono pewo ajulho kiptimi ghola toikeu shisu eno tipaqo sasu zuke.

¹⁸ Ino aye shisukeu phimini otsukeu nono ikhipesu ajulho tipaqo puuke eno ino oliv teli ngo tsungquikeu ta otsukeu pesu ajulho mllake.

¹⁹ Ino achuqupu akiviu otsuke, tiye asho mukhu, oliv teli eno akhi ngozu ikemu nono asu-atu julho lopu qeluniaye tipaqo pesu agha shikeu gho shi ghi mllaveke.” Hiye Akughushu MPEU no pianike.

²⁰ “Tithiuye nono anuli khunoqo ilauno ithulukeno, tipaqo pesu agha shikeu gho shighi asu-atu julhoqo mllaveke. Osalhaye mikhemighe kughashi ani kesheno

²¹ noye itianuliqo heqhi pesu agha shikeu gho shi-ghi asu-atu julho mllave kya?

²² Nono kusalhami lakhi shighi kuchhube kutsula kuxu xuakelo nono itilo aphikumsayi puzu olikhi ojilo ihichekeu noye ghuthu lakhimu kumsumlakeu hiye kiu kya?”

Jerusalem ye Kusalhami toi

²³ Akughushu MPEU no piveake, “Noye hasapue! Hasapu shivae! Nono alhoksa hupaqo kumtsu shipuzu tipathiuye

²⁴ alaphe kumtsulo asu-atu julho mllakepu a-a mlape qhike eno salhakeu shikibeke.

²⁵ Alaghilapa kumtsulo a-a qhemghai keu shipe qhike eno ojukivi tileno sunhe kiti pesu salhake. Nono iqho iqichekemi kumtsu lau noikhipe tsuvecheke eno osalha kighishe acheke.

²⁶ Nono okisughuu aghichikupou Ijipmi pelo osasu azu-a lakhi shipeke eno nono osalha pesu iloghu kighideve tsuke.

²⁷ “Itehi niye oghimeqhi nike iu peqheluvae eno ikukumgha osaje shiakeu ikhi suwuveni ake. Ino okughape Filistiyami ulo suve tsuae, panoqono omithi acheni eno nono alhoksa kumla shikeu jukuchhube acheni.

²⁸ “Noye kutami sasu salha aghaqimo ke ghenguno Asiriyami papesu poche nike. Noye panoqo sasu ghi salhakicheu ke ikemu panoqo sasu ghi oghaqimoveke.

²⁹ Noye Babilonmi, ti lhidi lhighi shichekeu shiayeh sasu ghi asalha kighishe achenike, ikemu panoqo ghi oghaqimoveke.”

³⁰ Hiye Akughushu MPEU no pianike: “Noye kusalhami akukujo kuhakeu toi hipaqo kumtsu shianike.

³¹ Alaghila kumtsulo nono asu-atu julho kumla-a shipe qhicheni eno salha acheni. Ikemu noye kusalhami kutami toi pisa ghenguno salhake kumoe,

³² ikemu noye totimi lakhino likimi kimiyenike zuqhulo inaghami sasu salhauvekeu toike.

³³ Kusalhamiye ame tsuchenike ikemu noye olojipumi kumtsu lau nono agho tsuke eno osasu zupeniaye aqha kumtsu lono ighipe nike nono tuqhou gho tsuchenike.

³⁴ Noye pekiphe shi salhakemi lakhie: Khunomu anguka lono ovilo tishilo pimoke. Noye ame ithulu chemoe; nouno panoqo lau ame tsucheni! Iye, okutakeu kusalhamike!”

Jerusalem shou Kughakutha

³⁵ Tishiaye Jerusalem, no kutuqhaliu, AMPEU no kiu piani keno inilo.

³⁶ Akughushu AMPEU no kiu piani keno tiye hike: “Noye kusalhalimi lakhi toi ophimini kumtsu xaleve puzu olojipumi lau olikhi no pephe tsuve eno kuchhube kutsula asu-atu julho lau otsuveke; eno nongu tianuli pesu asu-atu julho lau heqhi mllakeu gho shi pithive chenike.

³⁷ Highenguno ino olojipumi atughulomiqo kumtsa saighi nani, nono lunishi kemi eno nono mithiche kemi kumtsu. Ino panoqo saghi puzu obothasulupe nani eno tithiu ino ophimini xalevetsu nani eno panoqo pelo ophi kumsa akeu jupe nani.

³⁸ Salha shupu eno ghiqhi keu ghenguno ino opeive nani eno iloghu kighide lono ino akithi pesu oghimeqhi nani.

³⁹ Panoqo ulo ino oqhive nani eno panonguno nono khileno salhashupu eno asu-atu julho mlla cheni keno tipa-aqo tule piniyive tsu nani. Panonguno ophimini ngo achiku achipu ikhisuwuve puzu noye aphi kumsayi qhive nani.

⁴⁰ “Panonguno timi aqo kije xukutho puzu atu pesu ove nani eno panonguno azutakihi pesu oghitha pinyive nani.

⁴¹ Panonguno okiqo pitileve nani eno totimi muqo pelo oghimeqhive keu jupe nani. Nono salha shupu chekeu ino lakhave tsu nani eno nono olojipumi lau agho tsuchekeu lakhave nani.

⁴² Tipathiu iloghu tave nani eno niye iquneive nani. Niye khilemu aloghu idemove eno anheshumove nani.

⁴³ Nono alhothe shiakelo ino kishi opeitha chekeno noye kumsumavae, eno nono mla ithakeu kumtsuno imlo shikighide cheke. Ike tipaqo kumtsu shikeu ghenguno ino opelo lochile anipeke. Noye kushiye kiptimi totimi dolo mithemove keu pesu nono kuchhube kutsula jeli kutau mlakeu shouveqabe kya?” Akughushu MPEU no pivae.

Anga ghi Aza toi

⁴⁴ AMPEU no pike, “O Jerusalem, timino aholetsa hipau oghenguno peitha nanike, ‘Anga ghi aza toi ke.’

⁴⁵ Noye kuchouno oza ngake. Lino likimi ngo li tianuli jukuchhubeke. Noye ochelimiqo toike, panoqono akimiqo ngo atianuli jumithike. No eno otsunipu limi aphughiqo pazaye Hatimi lakhi eno apuye Amarimike.

⁴⁶ “Ofoye ahuu akeu Samaria eno tipau hokuxalo aphu akeqoke. Otsunipuye apeu akeu Sodom eno aphu akeqoke.

⁴⁷ Noye panoqo nepa papeni keulo eno panoqono kuchhube kutsula kumla shikeu papeni keulo aghakiqi shi acheni kema? Noye ado kitila dolono nonguno mula ithakeu kumtsulo panongu nguno alhoksau shi mula itha anike.”

⁴⁸ Akughushu MPEU no piani, “Kuchouno niye xuachekeu Lhou ke, otsunipu Sodom ngo li phuqo eno nophuqono alhoksa kumla mlakeu toi khilemu shipe puamoe.

⁴⁹ Li ngo lingaqoye chukepu nibonilei achekeu eno iqughai akupuna kuhano achekeu ghenguno qhezacheke, ikemu panonguye kumlhomi eno aquagha shi achekemiqo tucho hijumoke.

⁵⁰ Panonguye aqhekuza shi kuthovilo cheke eno ino jumithi keu thime mlake, ikehu noghi akivishi ithi anike ghenguno panoqo kutsaleveke.

⁵¹ “Samaria ye nono axine shikeu tuxamu shipuamoe. Noye lino shipuakeu nguno alau kuchhube kutsula mla itha acheni. Nono kixikila shikeu kimighi junikelo otsunipuqoye pimimo keu toi ithulu anike.

⁵² Itehino noye olikhi okukujo xapulu kepu shiveake. Oxineqoye otsunipu qono shikeu nguno kumzapushi anikehu ophivilo panonguye pimimokeu paphike. Itehi agi isaphai alo eno okukujo xapululo kughengu ojupesu otsunipu qoye mithemithei ithulu kepu shipeke.”

Sodom, Samaria Kughuna kithe

⁵³ AMPEU no Jerusalem vilo pi, “Ino Sodom ngo liphuqo eno Samaria ngo liphuqo itaghi kinikulu shilupe nani. Iye, noghi ino itaghi kinikulu shipe nani.

⁵⁴ Noye olikhi ojupesu kujove nani eno okukujono otsunipu qoye kiu toi akiviu keno tipau piye nani.

⁵⁵ Panonguye itaghi kinikulu shilu nani, noghi nophuqo ghi saghikitheve nani.

⁵⁶ Nono qheza ake tsalaqolo noye Sodom ghili junu cheke

⁵⁷ eno nono alhoksa kumla shikeu xukhophetsu mphiloye junu cheke kumo kesha? Itehi noye li toivae, noye Edommi ngo Filistiyami eno omithi chekemi acheaxulomi zulo junu cheqhi kepu shiauvae.

⁵⁸ Noye aphikumqhupu, kuchhubekepu jeli nono shikeu ghenguno ime masake.” AMPEU no pivae.

Alhokupuju Puloshoqhi

⁵⁹ Akughushu MPEU no piani, “Nono ithulu kuzupu qhemi ino otsu nani kughengu noye nono piqhivekeu jukumghaleive puzu puloshoqhi kuboleveke.

⁶⁰ Ikemu niye nono alhothe shi achekelo ino osasu puloshoqhi shikeu gihu nani eno ino osasu puloshoqhi lakhi shini cheni tiye alhokupuju kutolo achekepuke.

⁶¹ Kughou nono ofo ngo otsunipu ithulu chileni keno tilehino noye kishi mla itha chekeno tipau kumsu chilelu nani, eno tipau ghenguno kujove nani. Hiye ino osasu puloshoqhi shikeulo supua mokemu ino panoqo pesu ongaqo shitsu nani.

⁶² Ino osasu iwu puloshoqhi shikitheni eno niye AMPEU kepi nono ithi nani.

⁶³ Nono pimikeu jeli kumtsu ino peivetsu nani, ike noye tipaqo kumsu chilelu nani eno shishe kujo kelauno okichi ghi xukhomo nanike.” Akughushu MPEU no pivae.