EZEKEL 15 - BAIBEL (BSI)

Atsayikighibo Holetsa

¹ AMPEU no ivilo pike,

² “Thinikuau timio, atsayi kighiboye asubo kutau sasu kishi kimighiluni kya? Atsayi kighibo aloka pesu aghasulo asubo sasu kimighi kulupu kya?

³ Noye tipau pesu kiuala avehupulo peithalu nani kesha? Timiye tipau pesu thime pufu kulupu shilu cheni ma?

⁴ Tiye amichu likhi shikepu ghenguno aloke; eno amino hula hilau ashe pitive keu aitsu pesu noye kiuala shikulupu kesha?

⁵ Tipau piti mphi lonomu tiye avehupu kuhamitheke; ikelo amino tipau piti pe aitsu shive kethiuye kiumu avehupu kuhamithe kuchou shivae.”

⁶ Akughushu MPEU no kiu piani keno tiye hike: “Aghasu lono atsayi kighibo sughi puzu pitikeu hutoi, ino tipaphishi timi Jerusalem lo xuakemiqo

⁷ saghino panoqo ghimeqhi nani. Ino panoqo ghimeqhike lono niye AMPEU kepi nonguno ithi nani.

⁸ Panonguye ilau amikucho kumo shi acheni ike ino aghakhu pesu kughukughalei keua shivetsu nani.” Akughushu MPEU no pivae.