EZEKEL 12 - BAIBEL (BSI)

Tungkupu ye Kupokichemi toi

¹ AMPEU no iputsa puzu ivilo pikeuno,

² “Thinikuau timio, noye hekibidemi gholo xuache nike. Panonguye anhethi puani ikemu kiumu ithulu chemoe; panonguye akini puani ikemu kiumu chilu chemoe, kughengu panonguye hebideche kemiqoke.

³ “Tighenguno thinikuau timio, kupokichemi lakhino shichekeu toi akho lakhi khakumqolo eno tsuzu mphi lono chevelo. Panongu kumtsu pelo nono chevekeu eno a-a kutau wuvekeu ithulu pelo. Ishiake hu hekibidemi ghi tileno ovethalu nani keniake.

⁴ Atsala kuvu aphi lono hale pupovekeu shinike ghenguno okho khakumqolo tishianguno noithulu penike eno tithiuno avelauye panonguno noye hale pupovekeu paphishi chevekeu panoqo pelo ojukuto kepu shipelo.

⁵ Panonguno ojukuto aphi lono atozu xuphe puzu akighipe shelo eno tipau lono okho ikhipesu ipevelo.

⁶ Nono obighilo okho xapuqheluve puzu onhethi nhaluveno zumoikeulo chesu wuvekeu panoqo pelo ojukuto apelo. Tishianguno noye khilau wucheni kela ithumlakeu shilo. Nono kiu shikeno tipauno Israilmi lau kutughu akeu lakhi shi nanike.”

⁷ AMPEU no ivilo kiu shilopi pikeno ino tipau shike. Tipa tsalani, kupokichemi lakhi toi akho lakhi kha kumqoluve eno tipaji avelau zumoive chekelo ino atozulo i-u pesu akighipe lakhi xuphe puzu khalau ipeve. Kumtsu ghano ijukuto ake lono ino akho ikhi pesu ibighilo bepuno cheve.

⁸ Thanau inaqhe AMPEU no iputsa puzu pi,

⁹ “Thinikuau timio, hu hekibidemi Israilmiqoye noye kiu shiani kela pi ovilo iniju anike,

¹⁰ noye panoqo vilo ni, Akughushu MPEU no kiu pikeno tipau pesu pilo. Atsape hipauye Jerusalem lo ayehpe akeu sakipheu ngo timi khijehi tilau xuakhanikeno tipaqo lau tsuanike.

¹¹ Nono kiu shikeno tipau panoqo lau kiu shini cheni keno tipau michipu kepi panoqo vilo pilo. Panonguye kupokichemi eno akughumi shive nanike.

¹² Sakipheu khuuno panoqo shou ayehpe ani keno zumoi kelono pa kho pepu puzu timiqono atozulo akighipe lakhi pa ghenguno xuphe puakeu lono pokau nani. Pano pa nhethi nhaluve nani eno paye khilau wucheni keno ithumla nani.

¹³ Ikemu ino ikhame sukho puzu tipau lono pa meluve nani. Tithiu ino Babilon phughilo pa sawuve nani, ikeghi paye tipau ithumla nani eno tilauno thive nani.

¹⁴ Pawu kughaki lo ngo chekemi ngo akukumsu pa tsu chekemi eno pa khechekemi kumtsu aqha kumtsulo ino hale puwuve nani, eno timino panoqo pithiniaye panoqo phujuwu nani.”

¹⁵ Kughou ino ashiayeh kutami gholo eno inami ghakhulo panoqo hale puwuni keno, tileno panonguno niye AMPEU kepi ithi nani.

¹⁶ Panoqo gholo khami likhino aghukishi, puqumiye keu eno kusukini lono ino ghupe qhitsu nani, tishi anguno panoqono mla itha chekeuye kiu toi kuchhube kutsula kela ashiayeh kutami gholo akelono panonguno kumsuchilelu nani eno niye AMPEU kepi ithikithe nani.

Tungkupuno Thuthushi Itha

¹⁷ AMPEU no iputsa puzu pano ishi pike,

¹⁸ “Thinikuau timio, nono chuakelo eno yeakelo akumsano thuthushi ithalo.

¹⁹ Ashiayeh kumtsu vilo Akughushu MPEU tsape hipauye Jerusalem lo akemi khunoqono pano yeghilo xuaphi keno tipaqo vilo pilo. Panonguno chuakelo thuthushi itha nani eno panonguno shoakelo khokhoshi itha nanike. Panoqo ghakhuye xalepinyi kumsa shive nanike kughengu tilau xuakemi kumtsuno ayezah hexakemike.

²⁰ Itehi aphughi khipaqolo timi chhitoi ani keno kutsaleve nani eno aluzaqhaye aghasa shive nanike. Tithiuno niye AMPEU kepi panonguno ithi nani.”

Amekua holetsa eno Amekukuha Tsape

²¹ AMPEU no iputsa puzu pano ishi pike,

²² “Kushiye Israilmiqoye aholetsa hipau pikishe acheni kya? ‘Ado wove ani ashe-azu tsa huye adou shive anike.’

²³ Itehiye ni Akughushu MPEU no tipau vehu kiu piani keno tipau pesu panoqo vilo pilo. Aholetsa tipau ino kishekhave peni cheni. Tiye Israil lo khilemu pikishe kithemove nani. Tipau zuqhulo panoqo vilo hipau pilo: Ado ye ighivae eno ashe-azu tsa huye kuchouno chenike!

²⁴ “Israilmi gholo hinguno hilauye kichileu kungunhetsu momu sapimi chekeu tungkuptsa kuhave nani.

²⁵ Ni, Akughushu MPEU no panoqo putsa nani eno ino kiu pikeno tiye shikupuve nani. Hinguno hilauye munuauve keu shimo nani. Nongu hekibidemi kuxu xuaphi lono ino kiu shini cheni kepi nongu kutughuve akeno ino tipau shi nani. Ino piveake,” ipi Akughushu MPEU no pike.

²⁶ AMPEU no ivilo pike,

²⁷ “Thinikuau timio, Israilmiye nono kungunhetsu ithulukeqo eno tungkuptsa pikeqoye ighini keulo ghenguno kepi kumsu akhanike.

²⁸ Tighenguno ni, Akughushu MPEU no piakeu panoqo vilo pilo: Hinguno hilauye khilemu munu auvemo nani. Ino kiu pivea kela shive nanike. Ni, Akughushu MPEU no pivae!”