DANIEL 9 - BAIBEL (BSI)

Danel no Inikhu

¹ Darus ye Mediami, Ahaserus nuno Babilon kukaqhalo ayehpe che.

² Pa kuka mipe atughiulo ino akimthe kakulo Jerusalem ye ampe lhotsuni ixaveno akeu AMPEU no Jeremiya tungkupu vilo pikeu phukidejua.

³ Ino yeqhiye phi upuzu ayevulo iqano kumvu imlo kuchopu suno AMPEU vilo inikhua.

⁴ Ino iwu timiqo kipimi pipheghi AMPEU iLhou vilo inikhua. Ino pi, “AMPEU Alhou, noye ighono kije tighenguno ino ogihu cheni. Noye owu puloshoqhi atho shi pecheni eno khunoqomino okimiye cheni eno ozah kutsu shikupu cheni keno tipaqo lau iqemokeu kikimiye piye achenike.

⁵ “Nino axine shivae, nino alhoksa mlacheni, nino pimiche, nono nivilo kiu shile pi ahza tsu keno nino milive eno nono kiu achipi keno nipiye keu lono nino pove.

⁶ Nino oqemi tungkupmino pikeu inimoe, khunoqono oje kughape nipu nisuqo nikukauqo eno nishiayeh kumtsu vilo pikeno.

⁷ No, AMPEU ye kiuno achipi keno tipau alhokuthu shicheni, ikemu pulhapuju nino nilikhi nishou akukujopu sughi cheni. Hipau tsaye ningu kumtsu ghenguno achipike, khunoqo Juda lo Jerusalem lono Israilmi nono ayeghiqha kumtsu apanagha hapiyepighi vetsu keno tipau huye panonguno ogho lumo keghenguno ke.

⁸ Niwu kukamiqo, ayehkipemi nipu nisuqono akukujopushi ozulo axine shiveke, AMPEU.

⁹ Nino oghobide amu noye kimiye kiniu kehu nikipimi qhive tsuke.

¹⁰ O AMPEU, niLhou, kughono nono nivilo ayezah oqemi tungkupmi vechewo sughi tsukeu kiqi lono xulo pikeno nino otsa lumoveke.

¹¹ Israilmi kumtsu oyezah hephoveno nono kiu pikeno inimono tuchileve tsuke. Nino ozulo kuquvae, tighenguno oqeu Muse vechewo sughikeu yezah kiqi lono angsu nishou ighi ani.

¹² Nilau eno nikusau lau kiu shiniepi keno tipau shive cheni. Nono Jerusalem aghime tsukeuhu hipa yeghiqhalo aphughi lakhimu titoi ithulu mphi.

¹³ Muse yezah lo kiu ghime ithulu nanipi yepuani keno tipau lakhimu qhimono ni ghimeke, ikemu itehi kutolo, O AMPEU niLhou, ninguye nixine lono idesu olau ighino opulou shinikeu momu owu kuchou pape nikeu pukaputsa mono aphie.

¹⁴ O AMPEU niLhou nono kishi nighime nani piakeno ni ghimeveke, kughengu noye alhokuthu kiu achipi keno tipau shicheni, ikemu nino otsa inichemo.

¹⁵ “O AMPEU niLhou nono Ijip lono owu timiqo sasu ipeghi kelono okuka pephe piyeke, eno okukaye itehi kutolo kumsulu aphi. Nino axine shive, nino pimive.

¹⁶ Tishimu wovekeu tsalalo nono nisusholuke, tighenguno omlo kighide Jerusalem shou akeu tave tsulo, hiye ophughike, owu akimthe toke. Nixineqo eno nipu asuqono axine shive puzu tipau lono nikisughulo akemi timi kumtsu Jerusalem eno owu akimthe timiqo phimo gihumovepeke.

¹⁷ O Alhou ikighini eno qhuiniju akeu chilu tsulo. Ochineki hexavekeu hu suchile sughi tsulo, tipau ithino timi kumtsu noye Alhou ipi ithive penike.

¹⁸ Nitsa iniju tsulo, O Alhou, nilau jupuwo tsulo nino ime akeu eno ojelono achekeu phughi ghimeqo jutsulo. Nino achipilo shilukeu ghenguno kumoe, ikemu nono kimiye kiniuke ghengu ovilo inikhu ani.

¹⁹ AMPEU, nitsa initsulo, nikipimi qhive tsulo, eno nishou kimiyekeu kumla shitsulo, tishikeu lono timi kumtsu pelono noye Alhou kepi ithive penike, munutsu kevilo, aphughi hipau eno timi hipaqoye owuke.”

Tungkupu tsa Hephopiye

²⁰ Ino wuno akighini shia, ixineqo eno iwu timi Israilmi xineqo piphe, eno AMPEU vilo pawu akimthe chineki nitsu chileve tsulepi qhuinijua.

²¹ Ino akighini shi akelono, Gabriel, khuu azuu ghi ino kungunhetsu lono ithuluvea keno, ino ngo akelono yesusu iqi cheghi. Hiye avelau ghiqhipe mllachekeu ghuloki shia.

²² Pano hephopiye, “Danel, opelo tungkuptsa ithivepe nike ghenguno okuphutsu nike ighi ani.

²³ Nono kughono Alhou vilo inikhu keno, pano okhochile tsuke, pano okimiye tighenguno khokichile ovilo pinike ighi ani. Ino itehi ovilo kungunhetsuno ithulu keu pinike iquighai ngolo.

²⁴ “Ampe tsunino ghuthu lhotsuniye Alhou no timiqo eno owu akimthe phughi axine lono khaqhiphe nikeu kihitha tsukeudo ke. Axine qhivetsu nani eno lhokta mikucho khaqhive tsu nani, tipau lono kungunhetsu ithulu keu eno tungkuptsa kuchou shikupu nani eno akimthe chineki shikimthe kithe tsu nani.”

²⁵ Tsaqui juno ithuvelo, Jerusalem mlakithe luvepe nikeu ahza tsukeu lono Alhou no sakipheu kishephe tsukeu ighikeu tsala kutolo, ampe tsunino ghuthu tsuni wo nani. Jerusalem mlakitheveno, atoghila ghutu ighono mutotoi mlave nani eno tipauye ampe tsunino ghuthu lhotsugho kini anani, ikemu tipadoye aghimedo shi nani.

²⁶ Ado tipau ashekhalo Alhou no kishephe keu sakipheu akipimi kuhamu heqhive nani. Ighono akuka kua kukami wu ghushimino leighi kelono aphughi eno achineki kutsave tsu nani. Amghazu qole ighi keshi puhave tsunikeu ighi nani, Alhou no kuto pua keu lono aghu eno shikupsa sughi tsu nani.

²⁷ Akukau tipauno ampe tsuni ghenguno timi kutomo sasu visho mlaveno, ado tuxa wove kemtsa, heqhino mllachekeu eno akumllagho tsu chekeu lakhave tsu nani. Akumsapu lakhi shipe achineki mtalo qhi nani eno timi khuuno qhikeno, Alhou no pa kuxu do ashekhashi kutope qhipua tsukeu sasu kushomoke kutolo tile qhi puache nani.