DANIEL 8 - BAIBEL (BSI)

Bheritsu eno Anetsu Kungunhetsu

¹ Belshazar no kakeu mpe akuthuu shi akelono ino kungunhetsu akiniu ithulu.

² Kungunhetsu lo niye Elam yeghiqhalo Susa phughi lakhi aghutuno putumuxape akeulo ngo aghi keu ithulu. Ino Ulai ghoki mukulo puthughoa.

³ Aghoki mukulo bheritsu lakhi akibo kushuwo kinikupu tile akeu ithulo, akibo lakhiye lakhi pashu eno kutau lakhi nguno akitheu.

⁴ Bheritsu huno pa kibono kulolau, ahuu apeu shodasu wu keu ino jua. Tughashi lakhimu tipau lakha kulupu kuha momu pa kuka zulo povemla. Pano kiu shinishi keno kumtsu pa ghoshi eno aqhekuzashi kumtsu pawu shive nikeu shi.

⁵ Hiye kiu kiqi kelapi akichiqhiyi juake, anetsu lakhi kulolauno posu ighi, ighono akumthu ihulokehu pa pukhu ghi ayeghi dimoketoi poche. Pa kibo choboike lakhi anhethi kini mutadolo ipeghia.

⁶ Pano posu bheritsu kudau ighi, khikhi aghoki mukulo puthugho akeu ino ithulu akeno eno pakuka kumtsu pephe pakudau kohasu ighi.

⁷ Ino paju akelono bheritsu heqhiniye mujo. Paye ighono axuide pa heqhino akibo kini hechhe pini vetsu. Bheritsuye akuka kuhano anetsu mujomula mithe. Pa kughape ayeghilo shodaveno pa pukhupe qoda amu tile khunomu pa sukho tsunikemi kuhave.

⁸ Anetsuno alaushi qheza kithe wuve ikemu akuka shishe mugha chhoi ake lono pa kibo icheve eno tipau alono akibo bidi ipeghive, pano bidi apanagha akujula kututashi ipeghi.

⁹ Akibo bidi dolo lakhi lono akibo aghulo lakhi ipeghi, pa kukano apeu kipelau eno ashoqhi yeghi kuto qhawo.

¹⁰ Pa kukaye kungughalo aghushimi sasu kithe kulupushi thuwuve, ayepuqo ghi sasu shieno panongu dolo hami kughape ayeghilo vepiqiveno nedave.

¹¹ Pano kughughalo ghushimi gholo sakipheu tsa ghi lumo. Tsalakipe tsulo ghiqhino mllachekeu ghi lakha vetsu eno achineki tipau shikuchhubevetsu.

¹² Tsalakipetsu ghiqhino mllache keu zuqhulo a-a tipau lono timiqono axine shiauve, eno kuchou kupulu chineyeh pe ayeghilo veqhive, akibo hu kiu shikeno kumtsulo tolue.

¹³ Tilehino kungumi lakhino pa kusau vilo iniju akeu ino chilu. “Kungunhetsu lono ithulukeu hipaqo ado khitohi kuto anani kepilae? Ado khitohilo axine huno tsalakipe ghiqhino mllachekeu zuqhulo anani kepilae? Ado khitohilo kungughalo ghushimiqo eno achineki apukhuno nedape anani kepila?”

¹⁴ Kungumi lakhiuno khochile keu ino chilue, “Atsala 1150 kutolo ishi ananike, hipa doloye avelau eno inaqhe ghiqhipe mlla chekeu hu tsumulano ananike. Tipathiuno achineki puhavekeu ithulu chileve nani.”

Gabriel no Kungunhetsu Hephopiye

¹⁵ Kungunhetsu ithulukeqo kiu kiqi keno ithive nishi kutuno pukaputsa jua, zuleno timi lakhi igizulo puthugho aghike ithulu.

¹⁶ Asutsa lakhi, Ulai ghoki lono kukeu chilu, “Pano kiu ithulu keno Gabriel, nono tipau pa vilo pitsulo.”

¹⁷ Gabriel no ilau ighino iphivilo puthughove eno niye akumsano ayeghilo iluqive. Pano ivilo pi, “Thivenikuau timio, akiqi ithi lo. Kungunhetsuno kiu ithulu keno tiye ayeghiqha ashekha shiveni keu tsake.”

¹⁸ Pano hipa tsa pi akelo niye alotsumo qhiyi ayeghilo iluqive. Ikemu pano imtupe khapeqheno ipelo puthugho luvepe.

¹⁹ Pano pi, “Ino opiye akeuye Alhou mlokighide ashekha lo kiu shive nani keno tipauke. Kungunhetsu ithulu keuye ado ashekha shive nikeu kichepiyekeu ke.

²⁰ “Bheritsu akibo kini kupu nono ithulu keuhuye Mediami eno Persiami kukaqha kiqike.

²¹ Anetsu huno Grikmi kukaqha kiqike. Akibo choboi anhethi ngo anhethi kuma dolo ipeghi akeuye kukamiqo dolo atughiuke.

²² Akibo atughiu icheve kemtsa tipa alono akibo bidi ipeghivekeu huye akukaqha bidike eno akukaqha kikije bidi shiveno akukaphu atughiu kumto qhemi shimlave nikeuke.

²³ “Akukaqha hipaqo ashekha shive nikeu kupunuve kemtsa, panonguye alhoksami shikhave nani eno panongu ghime moaye sakepu shive nani. Tilehi kukami lakhi amlo kumka, akimthe kumo eno pishiqhikeu anani.

²⁴ Paye ighono akumto anani ikemu pa kumto tipauye pa kukano kumo. Puhavekepu shikupsa pano huthuphe tsu nani eno pano kiu shikeno thwokhalo tokulu shi nani. Akuka kughushu timiqo eno Alhou wu timiqo shou puhavekepu shikupsa sughi tsu nani.

²⁵ Pano amqukinimi ke ghenguno pishiqhi keu kumlalo tokulu shi nani. Pano pa likhi pa jupe shishe aqhekuza shi kutughumono zuleno timi kutomo heqhive nani. Pano kukami kumtsu shou akukau ghi phi gihumo nani, ikemu ayeghilo timi kuka peithamono pa heqhive nani.

²⁶ Kungunhetsuno ithukulu hi inaqhe eno avelau ghiqhipe mllakeu ghili kiu ino hephopiyeve keno tipau kuchouno shikupu nani ikemu ado kushuwa chephike kusupe qhi puaghilo.”

²⁷ Niye ighono imeveno atsala kutomo su awuve. Tithiu ida ithughi puzu akukauno ipulu puakeu kumla shinike ghenguno tipa alo wuve. Kungunhetsu ithulu keuhu shishe ivehu kughuzushi kiu kiqi kela muthano ngove.