DANIEL 12 - BAIBEL (BSI)

Ashekha Ghuloki

¹ Kungumi lakhi aphi kumtsha uakeu no pi, “Aghuloki lakhilo, Mikhel kungumi akijeu khuu owu timiqo khe acheni keno pano ipeghi nani. Tileno ighono aghime lhoksa ayeghi lhotughu lono ishi kutolo ithumula aphikeu shi nani. Aghuloki tipau ighi kelo, no shiayeh dolo khunoqo je Alhou wu kakulo yepuaghini keno xaluve nani.

² Azuuno thivekeqo ghi xu ithughive nani: khami lhokta kuxu ithuluno alovini eno khamino lhokta ghime ithuluno imeve nani.

³ Alokutsumi sakiphemiye kungughalo ayepuqo toi vu nani. Khunono timi kutomo vilo kiu achipi keno tipau shi lepi kutsu cheni keno panonguye ayepu kuvu toi ashekha kuha vu nani.”

⁴ Pano ivilo pi, “Danel itehiye kaku likuzuveno ayeghiqha ashekha shivemoke kutolo amchishi mekhape qhivelo. Tipadolo timi kutomono ado kivi kutomo peveno tipau kiu shi nani keno ithinike pukaputsa iqho iqi nani.” Akighithino ikokitheve nani.

⁵ Tileno timi kini aghoki muku hukukuu lakhi hikukuu lakhi ishi puthugho aghikeu ithulu.

⁶ Pama dolo lakhino kungumi lakhi aghokiti ahuu kudau puthugho akeu vilo iniju, “Akichiqhiyi kepu hiye ado khitohi kutolo ano ashekha shive nani kya?”

⁷ Tileno kungumi huno pau kinijujo chhope atsutsu kudau peqhepe ngo puzu, Lhokta Lhou jelono tushoqhi pikeu ino chilu, “Ado hu ampe kuthuno tuxake. Kughono Alhou wu timiqo ghime keu ashekha shiveni keno, hipaqo kumtsu shikha nanike.”

⁸ Pano kiu pikeno ino chilu, ikemu tipau ivehu izuve, tighenguno ino pa vilo iniju, “Ikemu akijeu hipaqo kishi kishekha nani kya?”

⁹ Pano khochile, “Noye itehino wovemasae, Danel, kughengu atsa hipaqoye ashekha tsala ighimoke kutolo kusu pua masake.

¹⁰ Timi kutomono shikimthe luve nani. Timi lhoksami ye hipau vehu mtha nani. Ikemu alhoksa shikithe auve nani, alokutsumi likhino tipau ithi nani.”

¹¹ Tsalakipe ghiqhino mllachekeu lakhaveke tsala lono, ike ado tipauye, Jukikichipu tsala lono wo atsala 1290 kuto shi nani.

¹² Atsala 1335 vechemoke kutolo khunoqono aghokulu shi aghini keno panongu kumghapue!

¹³ “O Danel, noye ashekha kutolo aghokulu shilo. Tishiaye noye thivemu xuithughiveno ashekha lono agho ithulu nani.”