DANIEL 10 - BAIBEL (BSI)

Tigri Ghokilo Kungunhetsu

¹ Cyrus akukauno Persia lo kakeu ampe akuthuu shi akelono, asutsa lakhi Danel vilo pi, pa je kutau Belthashazar ghi kucheni. Asutsa tipauye kuchou ikemu ithi nike ighono sho. Tipau kungunhetsu lono hephope pa piye.

² Tipa ghulokilo, niye apinedo kuthu muloa.

³ Niye alibe eno ashi chumono a, ajimu shomo, apinedo kuthu womo kedolo atsuxe pe ikutsumu xemo.

⁴ Ampelo aqhi atughiu atsala muku bidi shi ake lono niye Tigri ghoki kuloghi mukulo puthugho ngoa.

⁵ Ino kunguu jukelo timi lakhi aphi kumtsha u eno shunano shikeu pokha puakeu ithulu.

⁶ Pa phino qhivutsuni akughupu tu toi. Pa gino tsu-tsupha ighike kuvu toi vuqai eno pa nhethino ami iqu akeu toi. Pa umlo eno pa pukhuno alazayi thakutsughu pua ketoi ilompui, pa sutsaye aqo kitikhi no igha ipeghi ke toi.

⁷ Ilikhino kungunhetsuno piyekeu ithulu. Timi igholo akeqo lakhi nomu ithumla, ikemu panonguye shishe akichiqhiyi posu itshuve.

⁸ Tilehi ilikhi qhive, kungunhetsu ithulu akeu chheju auve, iphilo akumto kuhamitheve, igi ju kiliveno timi khumu imthave.

⁹ Ino kughono pa sutsa chilu keno alotsumoveno pishiqhope ayeghilo iluqive aghi.

¹⁰ Tileno niye khokhoshi aphi lono au lakhino ikhapeqhe puzu puthugho luvepe.

¹¹ Kungumi no ivilo pi, “Danel, Alhou ye okimiye acheni. Puthugho ngono ino kiu ovilo pini keno tsaqui inijulo, pano olau ipuwuke.” Pano kughono hi ivilo pikeno thuthu shi itha pulano puthughove.

¹² Tileno pano pi, “Danel, msa kevilo. Nono akighithi lunike ghenguno aqhokigheu shino inikhu keu tsala atughunino Alhou no okighini chiluve tsuae. Ino olau ighi akeuye okighini khochile tsu keu lonoke.

¹³ Persia kukaqhalo kungumi akheuno atsala mukuqhaqhi ilakhape awuve. Tileno kungumi dolo atou Mikhel no ikuphu nike ighi, kughengu ilikhi Persia lo qhiveke.

¹⁴ Ino olau ighi akeuye owu timiqo shou kiu ighi nani keno opelo ithive peniyeke. Hipau kungunhetsu nono ithulu keuye ighinikeu ghilike.”

¹⁵ Pano kughono hi pikeno, atsapimono ayeghilo jupuku awuve.

¹⁶ Tileno kungumi lakhi timi toi keuno pau chho puwono imtsu butsu. Ino pa vilo pi, “Akijeu, kungunhetsu ithulu keu lono niye ighono qei thuthu shi itha akeu tamlavea.

¹⁷ Niye aqemi lakhino pa mipeu zulo puthugho ake toivae. Kishino osasu kuputsalu nikya? Niye akukaghi atuthu ghi kuhavae.”

¹⁸ Itaghi pano ikhapeqhe eno niye tileno iphilo akuka ighi keu ithi.

¹⁹ Pano pi, “Alhou ye okimiye acheni, tighenguno kiu nomu omulo ghime pekevi momu oshi kumsape kevilo.” Pano kughono hi pikeno, niye muto kithe ighi eno ino pi, “Akijeu, kiu ivilo pikepu anikeno pilo. Nono ishikumto kitheve tsuake.”

²⁰ Pano pi, “Ino olau ighi akeuye kiu ghenguno keno ithi anima? Kuchou kakulo kiu yepuani keno tipau olau piyesuniye ke. Itehi niye idesu woveni eno Persia kheu kungumi aghahwu sasu aghu shi nani.

²¹ Tipashelo, Grikmi kheu kungumi aghahwu ipeghi nani. Israilmi kheu Mikhel nguno alauye khunomu ikuphuni kemi kuhake.”