BOTHUBO 9 - BAIBEL (BSI)

Noha sasu Puloshoqhi Shi

¹ Alhou no Noha ngo panuliqo kumghatsu eno panongu vilo piputo ghi pi, “Axuthi kughuko wolulo eno ayeghi nhakhawolo.

² Ayeghilo tughashi aghau, ayeghi shou itikiche lhoxu eno azughilo akeu akha kumtsuno nongu msaighu ghi xunani. Panongu kumtsu ogholo apeni keu shi pephetsu anie.

³ Ithakiche lhoxu kumtsu nongu chuqupu shilu nani, ino puzuu ayetsuni nongu tsuke toi, hikumtsu nongu tsu anie.

⁴ Ikemu akuxu akeu shi, tiye tile aji apulaghi nonguno chukevilo.

⁵ Eno khuno nongu kuxu pukavetsuni keno ino tipau akithipu ghime tsu nani. Tughashino nongu kutsapuaghi aye ino tipau kutsave nani. Timi khuno pakusami ghiqhini keno ino tipau aghime tsu nani.

⁶ Khuno timi ghiqhini keno pa ghi timino ghiqhive nani. Kughengu timiye Alhou julho lono lhope puanike.

⁷ Ike nonguno ati kughukowo eno kighishe wolo eno ayeghi nhakha ikowolulo.”

⁸ Alhou no Noha ngo pa nuliqo putsaghi ishipi,

⁹ “Julo, ino osasu iwu puloshoqhi shi anie eno otikughuko,

¹⁰ ogholo lhoxu akeqo kumtsu sasu, aghau ngo tikishi ngo tughashi, khije ashukaki lono ipeghi keno ti kumtsu sasu

¹¹ atsa hipaqo pesu puloshoqhi shi anie; hinguno hilauye khilemu azuyimino lhoxu kumtsu pughavepe mae, ayeghi pughave nikeu zukuqo khilemu amae.”

¹² Alhou no pi, “Ino nongu sasu eno nongu dolo lhoxu akeqo kumtsu sasu ashekha kutolo puloshoqhi shi anie pikeu michi hinoke.

¹³ Ino iwu milisu khungkusulo qhi ani. Hino ayeghi ngo ikujo dolo puloshoqhi michike.

¹⁴ Kugho kughomu ino ayeghi shou khungkusu saghini keno khungkusu lono milisu ithulu nani.

¹⁵ Tileno nongu sasu eno ayeghilo lhoxu jeli kumtsu sasu ino puloshoqhi shipuakeu kumsuchilelu nani, eno ti azu yimino itaghi khilemu lhoxu kumtsu pughave pemo nani.

¹⁶ Milisu ye khungkusulo acheniae eno ino ithuluno ayeghi shou lhoxu jeli kumtsu sasu ino puloshoqhi shikeu kumsuchileluni.”

¹⁷ Alhou no Noha vilo pi, “Ino ayeghi shou lhoxu kumtsu lau puloshoqhi shi akeu michi hu tikene.”

Noha eno Panuliqo

¹⁸ Ashukaki lono ipeghi kelo Noha nuliqoye hipaqoe: Shem, Ham (Kanan papuh ke) eno Jafet.

¹⁹ Noha nuli hipano kuthu tikughukono ayeghiqha kuchopu nhakhawoke.

²⁰ Noha ye alukichimi shiwuve eno pano atsayilu chie.

²¹ Pano atsayiji sho no shomzuve eno aphimini umono pa phikilo zua.

²² Kughou Ham ti Kanan papuh no, papuh Noha ye aphimini umono akeu ithulukeno khalau ipe puzu pa thikuzuu pama vilo pike.

²³ Ike Shem ngo Jafet pamano akuuphi lakhi ikhi pesu pama bighilo bepuzu shothiuno wuno panongu papuhno aphimini umono akeu nhavetsue. Pama giye athiu ju akeke panongu papuhno aphimini umono akeu ithumlae.

²⁴ Kughou Noha no shomzupu zuano idaithughi keno panu ayitiuno palau kishive keno ithi kelo,

²⁵ pano pi, “Kanan ye angsu shipeniu! Pa thikuzumiqo qeu shipeniu.”

²⁶ Pano highi pi, “Shem Lhou AMPEU sheqhelo, Kanan no Shem qeu shi nani.

²⁷ Alhou no Jafet kighishetsu nani, palaghaye Shem gholo xu nani. Kanan no Jafet qeu shi nani.”

²⁸ Noha ye azuyimi tavekethiu ampe 350 xue, kumtsu kuqha kelo

²⁹ paye ampe 950 xu puzu thive.