BOTHUBO 46 - BAIBEL (BSI)

Jakob Bolomi Ijip lo Iqi

¹ Ike Israil no pano pighi chekeu kumtsu hekutsu eno chesu Bersheba lo ighi, pano lhoxu ghiqhieno papu Isak Lhou mllae.

² Putholo kungunhetsu lono Alhou no Israil putsa no pi, “Jakob, Jakob.” Pano khochile pi “Iye, ni hi anie.”

³ Alhou no pi, “Niye Alhoue, opu Lhou ke. Ijip kudau iqinikeu musa kevilo, kughengu ino opelo ashiayeh kije lakhi shilu penani.

⁴ Ino osasu Ijip lo iqi nani, ino otikughuko itaghi saqhoghi nani eno okithilo Josef no onhethi kiyikha tsunanie.”

⁵ Ike Jakob no Bersheba lono wuniye kuto. Farao no panongu papu xapu peniye tsupuqho keu kukululo Israil nuliqono panongu papu ngo ati anuli akughunuqo, anipuqo ishi ikupe.

⁶ Panonguno Kanan yeghi lo akelo pighichekeu lhoxuqo hasasu eno tinhemghaqo pususu Ijip lo wuve.

⁷ Jakob no pa tikughuko kumtsu, panuliqo, panu nuliqo, pa ngaqo eno panu nongaqo ishi kumtsu pa gholono Ijip lo saghie.

⁸ Hipaqono Israil kughukoqo, Ijip lo iqikemiqo jeke. Jakob ngo pa nuliqo: Jakob nu anoghiu Ruben,

⁹ eno Ruben nuli no Hanok, Pallu, Hetsron, Karmi ishi,

¹⁰ Simon nuliqono Yemuel, Yamin, Ohad, Yakin, Zohar eno Kanan limi nu Shaul ngo ishi.

¹¹ Levi nuliqono Gershon, Kohat, Merari ishi.

¹² Juda nuliqono Er, Onan, Shela, Perez ngo Zerat ishi, ikemu Er ngo Onan pamaye Kanan lono thive. Perez nuliqono Hetsron ngo Hamul pama.

¹³ Isakhar nuliqono Tola, Puwa, Yob, Shimron ishi.

¹⁴ Zebulun nuliqono Sered, Elon, Yaxulel ishi.

¹⁵ Anuli hipaqoye Mesopotamia lo ake lono Lea no punuqhipe Jakob tsukeqoke, tinguno alauno panga Dina ghi. Hi panuliqo eno pa ngaqo kumtsu kelo pano shighikuthu ke.

¹⁶ Gad nuliqono Zifon, Hagi, Shuni, Etsbon, Eri, Arodi, Areli, ishi.

¹⁷ Asher nuliqono Yimna, Yishwa, Yishvi, Beria, eno panongu chepu Sera ngo ishi. Beria nuliqono Heber Malkie, ishi.

¹⁸ Hi pano chighi tsugho ye Zilpa no punupe Jakob tsukeqo. Li ye Laban no panga Lea qeliu shi tsukeu ke.

¹⁹ Jakob nipu Rachel nuliqono Josef ngo Benjamin pama.

²⁰ Josef no Ijip lo akelono Manase ngo Efraim pama, On lo achineu Potifera nonga Asenat no punutsue.

²¹ Benjamin nuliqono Bela, Beker, Ashbel, Gera, Neaman, Ehi, Rosh, Mupim, Hupim ngo Ared ishi.

²² Hipano chighi bidiye Rachel vechewo no punupe Jakob tsukeqo ke.

²³ Dan nuno Hushim ke.

²⁴ Naftali nuliqono Yahutsel, Guni, Yetsur, Shilem ishie.

²⁵ Hi pano tsuni ye Bilha no punupe Jakob tsukeqoe. Li ye Laban no panga Rachel qeliu shitsu keuke.

²⁶ Jakob phi lono atikughukomi panuliqo nipu kihisumo kelo pano lhotsugho tsugho no Ijip lo iqi.

²⁷ Josef no Ijip lo ake lono anu kini shie. Ti kumtsu kuqhakelo Jakob kibolo pano lhotsuni no Ijip lo ighi.

Jakob Bolomiqo Ijip lo Acheuve

²⁸ Jakob no Juda pelo pa zuwuno Josef sasu kusho peniye Goshen lo puwue. Panonguno Goshen ghakhulo ighi.

²⁹ Josef no pa xapu keu kukulu saghipe puzu papu Israil sasu kushonike Goshen lo wue. Pano pa sasu kusholu kemtsa pa u pesu pa kuo lono khaluve eno pa vapeghi ado kushuwa qa ae.

³⁰ Israil no Josef vilo pi, “Noye xu aghi puzu oju ithuluveake Itehiye niye thivemu kumu kumoe.”

³¹ Josef no pamunoqo eno papu no bolomiqo vilo pi, “Ino wu puzu Farao vilo ishi pinie, ‘imunoqo eno ipuno bolomi Kanan lo achekeqo ilau ighi anie.

³² Timi hipaqoye bheri ngo amshi kipighimi eno panonguye panonguw atsuaqu loji saghi anie eno panonguno pighiche keu kumtsu saghi anie.’

³³ Kughou Farao no nongu ku puzu ‘Nonguye kiu kumla shichekemi kya?’ ipi iniju aye,

³⁴ nonguye ishi khochile lo, ‘Akijeu ningu oqemiqoye nipuasuqo toi itilono bheri ngo amshi heju chekemiqoe.’ Tishianguno nonguye Goshen ghakhulo kughunalu kepushi nani.” Pano hi pikeuye kutau kumono Ijipmi ye bheri ngo amshi hejuchekemi ju apumuqhu keu acheke.