BOTHUBO 45 - BAIBEL (BSI)

Josef no Pa Kilethi

¹ Josef ye pa phivilo puthugho akemiqo zulo pa likhi pa suchilemlave ikehu pano igha ghi pi, “Kumtsu ilauno ipekhavelo.” Khumu pa gholo kuhave kelono Josef no pamunoqo vilo paye khuu keno pie.

² Pano ighamuku qa kehu Ijipmino ti chiluveno tipau sutsa Farao kibo kutolo tove.

³ Josef no pamunoqo vilo pi, “Niye Josef ke. Ipu ye xu aphi kesha?” Ikemu pamunoqoye pa gizulo kichi mamayive puzu pa khochile mlave.

⁴ Tile Josef no pamunoqo vilo pi, “Ikupunu ighilo.” Ike panonguno kupunu ighi eno pano pi, “Niye nongu thikuzuu Josef khuu nonguno Ijip lo jepuwuve keno tipau huke.

⁵ Ikehu nonguye hilau kushiye ije puwuve kelapi amlo kusa shikevi momu nongu likhi nongu jupe axu ide kevilo. Kughengu nongu kuxu pukhalu penike Alhou no nongu zuuno hilau ipuwue.

⁶ Ayeghilo puqumiye keu hi ampe akiniu likhi aphie eno itaghi ampe pungu dolo apiti qusumo momu ghile humo nanie.

⁷ Alhou no nongu zuuno ipuwu keuye nongu lagha akumzapu lono pukhalu eno nongu puxulu peniyeke.

⁸ Ike kuchou loye nonguno hila ipuwuve kekumoe ikemu Alhou no ke. Pano ipelo Farao papu toi ani peke eno ayeghiqha kuchopu peitha anie eno Ijip yeghi kumtsu shou ino ayehkipeue.”

⁹ “Nonguye mtazu ipu lau iqho puzu pavilo ishi pilo, ‘Onu Josef no hi pi ani pilo: Alhou no ipelo Ijip yeghi shou ayehkipeu shiveapeke, munukevino ilau iqighilo.

¹⁰ Noye Goshen ghakhulo ngolu nani, tino nongu, onuliqo, anuliqo tianuli, atsuaqu loji eno nono kiu pighi ani keno ikupunulo ngoluniae.

¹¹ Tilehi ngoaye ino nongu lojilu nani, kughengu itaghi ampe pungu puqumiye nikeu aphie. Niye nongu bolomi eno nono pighi akeqo pelo athokha shi apenishimoe.’

¹² Ike nongu kumtsuno eno ithikuzuu Benjamin ishino ithuluveano ni Josef ampi hino nongu vilo pi anie.

¹³ Nonguno ipu vilo niye Ijip yeghilo kishi qhivutsuni susu ka ani kela pilo, nonguno ithulu keu kumtsu pilo. Nonguye mighi ipu sasu hilau iqighivelo.”

¹⁴ Tishino pano pa u sukhopesu pa thikuzuu Benjamin khaluve puzu qauve, Benjamin ghi pa khamgho pesu qae.

¹⁵ Tinguno alauno pano pamunoqo kumtsu muma eno tishi ghi qae; eno tithiuno pamunoqono pa sasu kuptsae.

¹⁶ Josef pamunoqo ishi anie pikeu sutsa Farao tove kelo, Farao ngo pa gholo ampemiqo no alokiqi shive.

¹⁷ Farao no Josef vilo pi, “Omunoqo vilo panonguw gadaha akho shipe pipeno Kanan yeghilo idewolo pilo.

¹⁸ Panongu papu ngo panongu kibolomi ngo ishi ilau saghi pelo. Ino Ijip lo ayeghi akiviu panongu tsunie eno panongu pelo kupukunoshi xulu penie.

¹⁹ Panongu vilo panongu nipuqo eno atianuliqo ghengu lono Ijip lono amshino sunhekeu akukulu sawulo pilo. Panongu vilo panongu papu sasu ighilo pilo.

²⁰ Panonguno pighi aghikeu tinhemgha qhivenike amlo kusapu kuhae, kughengu Ijip yeghiqhalo kiu akiviu keno panongu wuke.”

²¹ Israil nuliqono tihutoi shie. Farao no ahza tsukeu kiqi lono Josef no amshino sunhekeu kukulu pamunoqo tsue, eno panongu ghuzulalo chuqupu tsu ishie.

²² Aphimini kuzuli kepu panongu akuphashi Josef no tsu ikemu Benjamin ye chandiyi 300 eno kuzuli kepu phimini pungu ishi tsue.

²³ Ijip yeghi lono ipeghi keu nhemgha akiviu pesu gadaha chighi xapipeno papu tsupuwue eno papu ghuzulalo sala athi ngo asho eno achuqupu kutau jeli ishi gadaha chighi lono xapipe puwue.

²⁴ Tishieno pano pamunoqo puwove eno panongu no wochekelo pano panongu vilo pi, “Nonguye alalo muto kevilo.”

²⁵ Panonguno Ijip lono chesu Kanan lo panongu papu Jakob lau ighi eno pavilo ishi pi,

²⁶ “Josef ye xu aphie eno paye Ijip yeghi kumtsu shou ayehkipeu ahng shi anie.” Jakob ye thibuyive kughengu paye panongu tsa pulumoe.

²⁷ Ikemu panonguno Josef no pikeu tsa kumtsu pavilo pi eno pa xapu ighi peniye Josef no puwukeu akukulu ithulu kelo Jakob ngu-agha aghuthi xuxuive.

²⁸ Pano pi, “Hiye ihulokeue, inu Josef ye xu aphikesha! Ino thimphi lono pasasu kushonike wumasae!”