BOTHUBO 43 - BAIBEL (BSI)

Benjamin sasu Ijiplo Ighi

¹ Puqumiye keu Kanan yeghilo ihulo keu shi auve.

² Jakob nobolomiqono Ijip lo pu-lu pughi keu athi kumtsu chukhave kethiu, Jakob no pa nuliqo vilo pi, “Itaghi wuno ningu ghenguno achuqupu ta qhusu ghilo.”

³ Tile Juda no pa khochile ghi pi, “Timi huno nivilo tsatsayi piveake, ningu thikuzuu nigholo saghimo aye khilemu ninguye pasasu kushomla putsae pivae.

⁴ Tsala nono ni thikuzuu ni gholo puwu aye ninguno iqino achuqupu qhusuwo otsuni,

⁵ ikemu nono pa puwumo aye ninguye iqimoe, kughengu timi huno ishi pivae, ‘Nongu thikuzuu nongu gholo ighimo aye nonguye khilemu isasu kushomlae!’ ”

⁶ Israil no pi, “Nonguye kushiye ishi ipeithapusa cheni kya? Kushini aye timi tipau vilo nonguye athikuzuu kutau lakhi anie piwu kya?”

⁷ Panonguno pi, “Timi huno vejoi ni vehu eno nibolomi vehu inijuno ishi pie, ‘Nongu papu ye xu aphi kesha? Nonguye athikuzuu kutau ani kesha?’ Ninguye pano iniju keu khochile ake thono ninguye pano nithikuzuu sasu iqighilo pini keu ithi ake sha?”

⁸ Tishieno Juda no papuh Israil vilo pi, “Appu igholo puwulo eno ninguno kutopesu wunie. Tishi anguno ningu ghi noghi eno ningu tianuli akhuava lono thimono xulu kepushinie.

⁹ Ikuxu no pa zuqhu shinie eno ipelo pa ghenguno amakho pu pelo. Tsala olau ino pa sachile saghino ozulo qhitsumo aye, ikuxu kupuju ozulo angsu shipenie.

¹⁰ Ninguno kunachope ngomoke aye ninguye itehi pha ghuthu kini ideve aghini cheke.”

¹¹ Ike panongu papu Israil no panongu vilo pi, “Tishikepu shiaye hi shilo, niyeghi lono ipeghikeu akini pesu timi hu agho chhekepushi nongu kholo hipaqo supulo: i-yikeu ta kitila, akhingozu kitila, axokutsungu ta ngo vekutsungu kepu mukhu, almon lothi ngo thaithi lothi toikeu ngo ishi.

¹² Eno pisa puzuu pewu keu jehi ghuthu kini lulo, kughengu nongu pulukholo puideghi keu pisa hu tsuchile maye sake, kumsujukelo tiye jupicheve keniake.

¹³ Nongu thikuzuu sasu kutopesu timi lau idewujulo.

¹⁴ Tuchomujokulu Lhou no timi tipau pelo nongu shou kimiyeqhiyi keu apeni, tishianguno timi tipau pelo nongu thikuzuu hula qhivekeu ngo Benjamin ngo ishi kighidepuwo vetsu penie. Pama puhave aye niye amlo ghimepu sholuniae!”

¹⁵ Ikehu panonguno agho chhekepuqo ngo pisa puzuu nguno ghuthu kini kutopu eno Benjamin ngo ishi sasu Ijip lo wue eno Josef sasu kushoniye pa zulo ighi.

¹⁶ Kughou Josef no pamunoqo gholo Benjamin ithulu keno, pakilo aqemi gholo atou vilo pi, “Timi hipaqo akilo saghilo, lhoxu lakhi heqhi no kuchukusho kutolo, kughengu timi hipaqoye puchou igholo kuchukusho shinani.”

¹⁷ Aqeu no Josef no pavilo pikeu hutoi shi eno timi tipaqo Josef kilo sawuve.

¹⁸ Josef kilo sawuve kelo, panonguye musave eno panonguno ishi kumsuve, “Atughiu ighi kelo pisa ni kholo tsuchile puwove aghikeu ghengu lono hilau ningu saghi anie. Tishianguno paye kiuala ningu nguku puzu kughaluveno ningu pe aqemi shive eno ningu wu gadahaqo luve ishiniye hile saghivae.”

¹⁹ Ikehu panonguno Josef kilo aqemi peitha chekeu lau ighi eno ahukikha lono pa putsaghi pi,

²⁰ “Akijeu, atughulo ninguye achuqupu qhuniye ighike.

²¹ Ike ningu no aghazulo zuniye ningu pulukho lhapeju kelauye pututa wu pisa pututa pulukho kichilo aghie, khije keno tipa qhemi aghi ike ninguno itaghi tipaqo pechilesu ighi anie.

²² Itaghi achuqupu qhunike pisa kutau pesu iqighi anie. Khuuno ningu wu pisa ni pulukholo tsuchile puwovekela ninguye mthae.”

²³ Aqeu no pi, “Nongu mulo kusapu kuhae, musa kevilo. Nongu puasu Lhou no nongu pulukholo akini kusu puaghi tsuake. Niye nonguno atughulo tsukeu me ithuluveake.” Tishieno pano panongu pamu Simon saghi.

²⁴ Aqeu no Josef kilo panongu saghino apukhu qhu peniye azutsue. Pano panongu wu gadahaqo ghi kughulhutsu.

²⁵ Josef no puchou ighini chekelo panonguno agho chhekepu kutope ngokhe, kughengu panonguye tilau kuchu kusho shipeni cheniepi panonguno chiluke.

²⁶ Kughou Josef no akilo ighi keno panonguno agho chhekepu pesu pa lau akilo ighi no pazulo pishiqho itsaiqi agigihu tsue.

²⁷ Pano panonguye kiutoi akhani kela inijuno pi, “Nongu no ivilo piakeu nongu papu amuchou huye akivishi anima? Paye xu aphi kesha?”

²⁸ Panonguno khochile pi, “Ningu papu oqeu huye itehi kuto xu aphie eno akivishi anie.” Panonguno khoqhunheno itsaiqi agigihu patsu.

²⁹ Josef no pishipuwo pa thikuzuu Benjamin pama aza lakhi nu ithulu puzu pi, “Hino nongu thikuzuu anipau kenia nalae, nonguno ivilo pi akeu hu.” Josef no pi “Appu, Alhou no okumghatsu peni.”

³⁰ Josef no kakashi wuve, kughengu pa thikuzuu kumsukeu lono pamlo kighishi ihulokeu shive. Ikehu pano qah nikeu-a phuwuve eno pa zuabolo ilono tilano qah ae.

³¹ Pano pagi phaveno ipeghive eno pamlo kighishi suchileluve pazu achuqupu kutope qhiwolo pi ahza tsu.

³² Ikehu aqemiqono Josef kutashi palikhi kutotsu, eno pa thikuzumiqono kutaulo kuto tsu. Ijipmi tile pagholo chuakemiqo kutashi kutaulo kuto tsue, kughengu Ijipmiye Ibrimi gholo kumtsa kuchu kusho shimo nani kehu, Ijipmi ghenguno tiye kuthakugha pue.

³³ Ike pa thikuzumiqoye Josef gizulo kughuqa. Anoghiu lono ayitiu kutolo akichiu ayitiu shighi apasu shi kughuqae. Panongu kishi kughuqawo kela ithulu puzu panonguye lakhino lakhi juno akumza ae.

³⁴ Josef ghulhua lono milakhi khi sala achuqupu kepewo qhitsu ape eno Benjamin salaye kutamiqo sala nguno ghuthu punguno alau shi kepewo qhitsupe. Ike panonguno pa gholo chu shoae eno panongu kumtsu aloinoluve.