BOTHUBO 41 - BAIBEL (BSI)

Josef no Farao Samo kiqi Pitsu

¹ Ampe kinia thiu Farao no asamo lakhi pumoe ike paye Nayil ghoki philo puthugho aghie.

² Ike aghoki lono amshiqu ajukivi eno athapubeike tsuni ipeghi no amtuni muza chuae.

³ Tile amshiqu kutau tsuni aghoki lono ipeghie, tipaqoye aghikumsayi eno jusamitheyike. Tipaqono aghoki mukulo amshiqu kutauqo phivilo ighieno puthughove.

⁴ Tishieno athapubeikeu tsuni hu munove. Ikehu Farao ye zuida ithughive.

⁵ Pano zuhuve eno itaghi asamo akiniu pumoe. Ike aghipe tsuni abo lakhi lono ipeghi aghi eno tipaqoye chhikhoyi eno nimzuyi ae.

⁶ Ikelo aghipe tsuni ichikhoi eno asayeli kulu mulhu no fukighiyive keu ghi lhoipeghie.

⁷ Ichikhoi keu ghipe tsuni huno chhikhoi eno nimzuyi akeu ghipe tsuni hu munove. Farao no zuida ithughi kelo tiye asamo shi aghive.

⁸ Inaqhe Farao ye amlo ighono kunachope auve ikehu Ijip yeghilo kuduumi eno alokutsumi kumtsu kusaghipe. Farao no panongu vilo pa samo lhe ikemu khuu nomu tipaqo kiqi hepho pesu pa tsumlave.

⁹ Tileno Farao khu ajukhu kipeu atouno pi, “Ishino ino pimipuakeu kumsulu anie.

¹⁰ Ghuthu lakhi Farao no pa qemi shou aloghu ideveno pano asho kumla atou ngo ikujo kughape kukaki ghukhemi shou keptein shichekeuno kilo akughushipeke.

¹¹ Kijili lakhi ikujo kinikujo asamo pumoe. Ikujo pututa shelo kututa kiqi akeu shighi pumoe.

¹² Ike tilehi Ibrimi apumi lakhi ikujo gholo ae, paye kukaki ghukhemi shou keptein qeuke, pavilo ikujo samo lheke. Pano ikujo vilo pututa samo hephopesu akiqi pitsue.

¹³ Pano kishi hephotsu keno tihutoi shive: ipelo puzuu kumlalo sachilewo mlawuvepe eno asho kumlau atouye tsuqhi pithiveke.”

¹⁴ Tile Farao no Josef kupuwue, ike panonguno akimighishi akughuki lono Josef saipeghi. Pano akutsusa ngo akichimhi miyeve eno aphimini kilive puzu Farao zulo ighi.

¹⁵ Farao no Josef vilo pi, “Ino asamo lakhi pumo kemu khuu nomu tipau kiqi hephotsu mlano anie. Ivilo oghili pikeuno noye asamo ini puzu tipau kiqi hephotsulu nani pike.”

¹⁶ Josef no khochile pi, “Ino kumono Alhou no Farao lokughunopu khochiletsu nani.”

¹⁷ Farao no Josef vilopi, “Isamouno niye Nayil ghoki mukulo puthugho ae,

¹⁸ ikelauye aghoki lono amshiqu ajukivi eno athapubeikeu tsuni ipeghi no amtu-ni muza chuae.

¹⁹ Tile tipaqo tikhauno amshiqu tsuni qeyi, aghikumsayi eno jusamitheyike ipeghi. Lhoksakugha titoikeu Ijip yeghiqhalo khilemu niye ithumla aphie.

²⁰ Aghikumsayi keu amshiquqono atughiu athapu-beyikeu mishiqu tsunihu muno veche.

²¹ Panonguno tipaqo munove namu panonguno tipaqo muno veakepi khunomu ithi moe, kughengu panonguye atughulo toi jusamitheyike. Tileno ino ida ithughiveke.

²² Ino itaghi zuhu kelauye, isamouno aghipe tsuni abo lakhi lono ipeghi keu ithulue, tipaqoye chhikhoi eno nimzuyi ae.

²³ Tipathiu aghipe tsuni ichikhoi eno asayeli kulu mulhuno fukighiyive keu ghi lhoipeghi.

²⁴ Aghipe ichikhoi keqono chhikhoi keu ghipe tsuni hu munoveche. Ino hipau kuduumi vilo pi kemu khunomu tipa kiqi hepho itsumlae.”

²⁵ Josef no Farao vilo pi, “Farao samo huye aphiphi kena. Alhou no paye kiu shiniye kuto ani keno Farao vilo pive anike.

²⁶ Athapubeyi keu mishiqu tsuni ye ampe tsuni ke eno chhikhoi keu ghipe tsuni hu ghi ampe tsuni ke. Ti asamoye aphiphike.

²⁷ Aghikumsayi eno jusamitheyi keu mishiqu tsuni athiuno ipeghikeu hughi ampe tsuni ke, eno asayelikulu mulhuno fukighiyive keu ghipe tsuni huye ampe tsuni puqumiyeni keu ke.

²⁸ Ino Farao vilo piveano, Alhou no paye kiu shiniye ani keno opiye anie.

²⁹ Jualo, Ijip yeghiqha kumtsulo ampe tsuni shishe nibonilei nani.

³⁰ Tipathiu, ampe tsuni puqumiye nani, eno Ijip yeghiqha kumtsulo nibonilei keu kumsumaqhoive nani, eno puqumiye keuno aghakhu pitipuzaqhi nani.

³¹ Aghakhulo nibonileyi keuye kiu kela mutha mitheve nani, kughengu puqumiye tipau ighiniye akeu huye shishe ihulo kumsapu kehue.

³² Farao no ghuthu kini pumoide keu kiqi huye tipau shini putsakeu shi ghi Alhou no kughuva, eno kushuwa womono Alhou no ti ighipeni chenie.

³³ “Ike itehino Farao ye tsaqutsaleyi kemi eno alokutsumi lakhi phusawo Ijip yeghi peitha luvepe kepue.

³⁴ Farao no hi shikepue, aghakhu kumtsulo kijemi su supe qhino hi ampe tsuni nibonileyi ke dolo tuxatini ipeghikeu kikije pungulo lakhi qhakutsu pelo.

³⁵ Panongu pelo kinikulu mipe chekeu dolono achuqupu kumtsu qhakutsu pelo, Farao qholono athi pekutsu pesu aphughiqolo pekutsupe qhipelo eno ti kheluve pelo.

³⁶ Achuqupu tipaqoye ampe tsuni puqumiye ighikelo sala shi pekike kepue, tishianguno puqumiye kelo Ijip lo akemiye thimo nani.”

Josef Ijip lo Ayehkipeu Shi

³⁷ Avehu hipau Farao zulo eno pa qholo ampemiqo zulo aloqhiyi ithuluve.

³⁸ Farao no pa qholo ampemiqo vilo iniju, “Alhou nguagha palolo kuami khileno timi hitoi ke ninguye phukulupu kya?”

³⁹ Ikehu Farao no Josef vilo pi, “Alhou no hi kumtsu ishi opiyeke, onguno tsaqu tsaleyi keu eno alokutsuu kutami kuhae.

⁴⁰ Ino opelo niyeghi peithapeni ke qhini eno iwu timi kumtsuno nono ahza tsukeu gholu nani. Ino akukau ke ghengu likhino ino onguno akijeu shini.”

⁴¹ Tishieno Farao no Josef vilo pi, “Julo, ino itehino opelo Ijipmi yeghi shou ahng shiluvea peke.”

⁴² Farao no pa u loti lono amchishi chishida chekeu nguthi sujopheno Josef ulotilo sutsue. Phuphuyikeu phimini kivi pesu pa puue, eno shuna-yila pa kuo lo xini pipe.

⁴³ Eno pa pelo akukau wu khurkulu akiniu lono pa xapupe eno timiqo pelo pa zulo ishi asheshu pe, “Ala shetsulo.” Tishi puzu Josef pelo Ijipmi kumtsu shou ayehkipeu shipeke.

⁴⁴ Farao no pavilo pi, “Ino Farao ke eno osumo keloye timi khumu a u peqhe momu apukhu suqhe mla nani.”

⁴⁵ Pano Josef je Tsafenat-Panea kutsu. Eno panipu shipeniye Asenat tsue, liye On lo achineu Potifera nonga ke. Tishino Josef no Ijip yeghiqha kumtsulo izuwue.

⁴⁶ Josef no Farao qholo akumla shikeu ghulokilo paye ampe shighi shia. Pano Farao gholo ngoano chesu wupuzu Ijip yeghiqha kumtsulo wue.

⁴⁷ Kinikulu mipe tsuni dolo shisheno a-mu kumzapu lu.

⁴⁸ Eno Ijip yeghilo nibonilei ake lono Josef no ampe tsuni achuqupu qhakutsue, eno aphughiqolo achuqupu pekutsusuwo qhie.

⁴⁹ Pano athi kumzapu pekikelu kehu tino azughilo saye yeghi akeu toiveke. Athi kumzapu shive kehu pano ti mighiju move, kughengu tishi akhamlaveke.

⁵⁰ Puqumiye keu mipe ighi mphi lono Josef ye anu kini shive, tiye On lo achineu Potifera nonga Asenat no punu tsue.

⁵¹ Josef no anu anoghiu je Manase kutsu, pano ishi pi, “Kughengu Alhou no ipelo ighime eno ipuno bolomi kumtsu kumsumaluve peke.”

⁵² Pano anu akiniu je Efraim kutsue. Pano ishipi, “Kughengu ishikighime qhikeu yeghi lo Alhou no itikughuko tsue.”

⁵³ Ijip yeghilo nibonilei keu mpe tsuni ashekha shive,

⁵⁴ eno ampe tsuni puqumiye keu ighive, Josef no pipuakeu hutoi. Ayeghiqha kutau kumtsulo puqumiye ae, ikemu Ijipmi yeghi loye achuqupu ae.

⁵⁵ Kughou Ijip yeghiqha kumtsulo puqumiye ighivekeno timiqo no Farao vilo ighasusu achuqupu phu ighie. Tile Farao no Ijipmi kumtsu vilo ishi pi, “Josef lau wulo eno pano nongu vilo kiu shilo pini keno ti shilo.”

⁵⁶ Ayeghiqha kumtsulo puqumiyeve ikehu Josef no abi-ale kumtsu khaqhi eno Ijipmi vilo athi jesu tsue, kughengu Ijip yeghilo puqumiye keuno shishe shisakeu shive.

⁵⁷ Ayeghiqha kumtsu lono athi qhuniye Ijip lo Josef lau ighi, kughengu ayeghiqha kumtsulo puqumiye keu lono shishe shisakeu shive.