BOTHUBO 40 - BAIBEL (BSI)

Josef no Asamo Pitsu

¹ Tipathiu, Ijip lo akukau wu akhu-ajukhu kipeu ngo asho kumlau atou ngo ishino panongu mipeu Ijip lo akukau shou akipimi shive.

² Farao ye pawu kijemi akhuajukhu kipeu atou ngo asho kumla atou pama shou ighono axuideve.

³ Ikehu pano akughu kilo pama kughasawo suve, ti kukaki ghukhemi shou keptein kilo khipa alo Josef kughasawo qhipuakeno.

⁴ Kukaki ghukhemi shou keptein no Josef pelo pama jukuto penikeu shivepe, eno pama ghini shi ae. Panonguye khakutha bolo ado kushuwa acheuve.

⁵ Kijili lakhi, Ijip lo akukau wu akhu ajukhu kipeu atou ngo ashokumlau atou ngo ishi pama kini kujo akughukilo ake lono asamo lakhi khi pumoe. Pututa shelo akiqi a-ghi asamo pumoe.

⁶ Inaqhe Josef no pama lau iloghi eno pama jukelo pamaye amloksa shi aghi.

⁷ Ike pano Farao wu kijemi pa gholo pa mipeuno ki khakutha bolo akeu pama vilo iniju, “Nokujoye isunaye kushiye agi khumui ani kya?”

⁸ Tile pamano pavilo pi, “Nikujo milakhi khino asamo pumoe eno khuu no tipau kiqi hephotsu pemono ishi anie.” Josef no pama khochile pi, “Alhou no akiqiqo tsucheni ke, nokujo samo ivilo lhejulo!”

⁹ Ikehu akhu ajukhu kipeu atouno pa samo Josef vilo lheghi pi, “Isamouno atsayibo lakhi izulo aghie,

¹⁰ eno atsayibo tipaulo aloka kuthu aghi. Tino mini ipeghi kemtsa pu ipeghive eno akupu muqo huno atsayi lothi shi ghi nimuzuyi ipeghiveche.

¹¹ I-ulo Farao jukhu pesu aghie, ikehu ino atsayithi xolu puzu tipazu ajukhulo sulesue eno pesuwo Farao ulo tsuvecheke.”

¹² Josef no pa vilo pi “Tipau kiqiye hike: aloka kuthu huye atsala kuthu ke.

¹³ Hinguno atsala kuthulo Farao no okipimi qhivetsuno osunheqheve nani, eno puzuu noye kiu toi achekeno tipa alo opelo ngolu penani, eno puzuu nono pa khu ajukhu kipeu shiche kelo toi itaghi Farao jukhu pewo paulo sutsu nani.

¹⁴ Kughouno okivipu shiluveni keno ikumsululo eno kimiyekini ipiyetsu ghi Farao vilo ighili pithitsulo eno akughuki hipau lono iyikhipheve kepu shitsulo.

¹⁵ Ino kuchouno pini, niye Ibrimiqo yeghilono ikugha pesu wuveke eno hile pinamu akughukilo ikugha pesu sukuzupu niye kiumu mlaitha puamoe.”

¹⁶ Kughou asho kumlau atouno Josef no asamo kiqi pitsu keu aloqhiyi ithulu puzu pavilo pi, “Ni ghi asamo lakhi pumoe, ike ashoghi kuthu ikutsulo aghie.

¹⁷ Ashoghi iku akuthuulo Farao ghenguno asho jeli kumtsu ae, ikemu ikutsu shouno aghauqono ashoghilo tipaqo mighi cheghie.”

¹⁸ Josef no khochile pi, “Tipau kiqi hikena! Ashoghi kuthu huye atsala kuthu kiqike.

¹⁹ Hinguno atsala kuthulo, Farao no osa ighipe puzu okutsu michevepe nani eno okughape asubolo tshupe tuthuijunai qhive nani eno aghauqono oshi mighi nanie.”

²⁰ Tishiwo akuthuni, Farao punu ghuzu tsala shiakelo pano aghulhu kije pa qholo ampimi shichekemiqo tsue. Pa khu ajukhu kipeu ngo pa sho kumlau atou ngo ishi pa zulo eno pa qholo ampimiqo zulo saghipe.

²¹ Pano akhu ajukhu kipeu puzuu kumlalo sachilewo mlawuvepe;

²² ikemu asho kumlau atouye tshuqhi pithive, Josef no akiqi pi puakeu toi shive.

²³ Ikemu akhu ajukhu kipeu huye Josef kumsuchile move eno pa kumsumaqhoive.