BOTHUBO 35 - BAIBEL (BSI)

Alhou no Jakob Kumghatsu

¹ Alhou no Jakob vilo pi, “Kutopesu Bethel lo iqholo eno tilau kughunalo. Nono omu Esao zulono pochekelo Alhou no olau ipeghipiyekeu Lhou lau aghokiptia lakhi shipe qhilo.”

² Ike Jakob no pa kibolomi eno pa gholo akemi kumtsu vilo pi, “Nongu gholo inami lhouqo khije ani keno qhivelo, nongu likhi-nongu shikimthevelo eno nongu phimini kilivelo.

³ Ninguye hileno kuto pesu Bethel lo iqhoni cheni. Ino shilusache kelo ikuphukeu eno ino wukeu la kumtsulo isasu chekeu Lhou lau aghokiptia lakhi shipesu qhinie.”

⁴ Tile panongu u-lo inami lhouqo khije pe akeno eno panongu kinilo kighichekeu ghi kumtsu panonguno lipesu Jakob tsuve. Pano tipaqo pesu Shekem phu phivilo aphisubo qholo qhove.

⁵ Panonguno chesu wuve. Tipa cheaxulo aphulomiqo shithughuive kehu panonguye Jakob tianuliqo hawumove.

⁶ Jakob ngo pagholo timi chekemi kumtsu wo Luz tolu, tiye Kanan lo Bethel ke.

⁷ Pano tile aghokiptia lakhi shipe qhi eno tipa-a je pesu El-Bethel kutsu, kughengu pano pamu zulono pochekelo tipa-a lono Alhou no palau ipeghipiye ke.

⁸ Rebeka tuchomujo chekeu Debora thive eno liye Bethel aqhou aphisubo lakhi qholo qhove. Ikehu tipau pesu “Akuqa Phisubo” ipi kutsu.

⁹ Jakob no Mesopotamia launo ideghive kethiu Alhou no palau ipeghipiye eno pa kumghatsue.

¹⁰ Alhou no pavilo pi, “Ojeye Jakob ipi kumoae, ikemu ojeye Israil ipini.” Ikehu pano paje Israil ipi kuvetsu.

¹¹ Alhou no pa vilo pi, “Niye akughushu Lhou, atianuli kughukoluno ashiayeh lakhi shilulo. Ashiayehqo olauno ipeghi nani eno ophilono kukami ipeghi nani.

¹² Ayeghi khipau ino Abraham ngo Isak tsu keno, tipau yeghi no eno othiu otikughukoqo tsunie.”

¹³ Eno Alhou ye pa putsa akeu-a lono kungu kudau wuve.

¹⁴ Jakob no Alhou no pa putsakeu alo kumsumamo keu tu pesu athigho shope qhie. Pano tipau ikhiphetsu keu shi atsaiji eno teli tipa shou lepukue.

¹⁵ Alhou no pa putsakeu-a pesu Jakob no Bethel kutsu, pa kiqi, Alhou ki.

Rachel Kithi

¹⁶ Panonguno Bethel qhiveno chesu wuve eno Efrata tonikeu kushuwo kumolo, Rachel ye anga punu kepu shiuve, liye apunu kusho shiauve.

¹⁷ Kughou lino shishe apunukusu shi akeno apunu kujuuno li vilo pi, “Kumu musa kevilo, hi ghi kiptimi shi anie.”

¹⁸ Eno li tuthu she kitikhau shi lino anu je Ben-oni kutsu, tishino liye thiveke ikemu pa puhno paje Benjamin ku-tsue.

¹⁹ Rachel thive kelo li kumoye Efrata lalo qhove, tiye Bethlehem ke.

²⁰ Jakob no li kumo shou athigho lakhi gho, tipau pesu ishi kutolo “Rachel kumo Thigho” ipicheni.

²¹ Tishieno Israil no chesusu wuve eno pa phiki Eder Ghukhe-a nguno hukughou shipe qhie.

Jakob nuliqo: Isak Kithi

²² Israil no tipa ghakhulo kughuna akelo Ruben no papu nipuqo dolo Bilha ipikeu sasu zuve. Israil no tipau chiluve eno pa gizulo alomoqhiyi ithulu auve. Jakob ye anu chighikini ache.

²³ Lea nuno Ruben, pano Jakob nu anoghiu, eno Simon, Levi, Juda, eno Isakhar Zebulon ishi.

²⁴ Rachel nuno Josef ngo Benjamin pama,

²⁵ Rachel qeliu Bilha nuno Dan ngo Naftali;

²⁶ Lea qeliu Zilpa nuno Gad ngo Asher ishie. Anuli hipaqoye Mesopotamia yeghi lono punukeqo.

²⁷ Jakob no papu Isak no Kiriath-Arba itehi Hebron ipichekeu qhalo Mamre alo ighi, Abraham ngo Isak pamano izuwukeualo.

²⁸ Isak punu mipeye ampe 180 shia.

²⁹ Isak ye kitemi shi puzu eno axu shuno pano timi gholo thihuve; eno panu Esao ngo Jakob pamano pa kumo shiqhovetsue.