BOTHUBO 33 - BAIBEL (BSI)

Jakob no Esao sasu kusho

¹ Jakob no pishipuwo jukelauye Esao ye pa gholo timi 400 sasu cheghi. Ikehu pano Lea ngo Rachel eno aqeliu kini gholo atianuli amqo amqo shi kijeve.

² Pano aqeliu pama eno pama tianuli pesu atughiu shipe, eno Lea ngo pa tianuliqono tipashelo shipe eno Rachel ngo Josef pama pelo ashekhau shipe.

³ Pano panongu zuu shi puzu pamu Esao kupunu kusho ke kutolo ghuthu tsuni itsaqi pishiqhoe.

⁴ Ikehu Esao no pasasu kushonike posu ighino pau pesu pa vape puzu pa mumae. Pama kinikujo qauve.

⁵ Esao no pishipuwo jukelo totimi atianuliqo ithulu puzu pi, “Ogholo hipaqoye khuno kya?” Jakob no khochile pi, “Alhou no kupukimiye keu lono ni oqeu tsukeu tianuliqo ke.”

⁶ Tile aqeliu pamano pututa tianuli sasu kupunu ighino itsaiqi pishiqhoe.

⁷ Lea ghi pa tianuli sasu kupunu ighino itsaiqhi pishiqhoe. Tipathiuno Josef ngo Rachel pama ghi kupunu ighino itsaiqi pishiqhoe.

⁸ Esao no iniju, “Hu azuwu aqoaqo shi nono isasu kushope keqoye kiu kya?” Jakob no khochile pi, “Tiye impeu ozulo igi kusho shiniye ke.”

⁹ Ikemu Esao no pi, “Igholo ghi kutomo anie, ithikuzuu, owuye nono pualo.”

¹⁰ Jakob no pi, “Tishi pitsu kevilo, tsala ozulo ni ikhikulupu shilu aghi aye ilauno agho lutsu lo. Kughengu ino ogi ithulu akeuye Alhou gi ithulu ake toi ani, nono aloqiniqhiyi iyikhilu tsue.

¹¹ Ino agho olau sughi keu hipau ikhilutsu lopi oqhuiniju anie, kughengu Alhou no kupukimiye keu lono ipeithae eno ino avehupu shi akeu kumtsu anie.” Pano tsuikhomo pi auveke hu Esao no ti luvetsue.

¹² Esao no pi, “Ningu kuto puzu cheveni nolo eno ino ozuu shi-ghi wunike.”

¹³ Jakob no khochile pi, ;”Impeu nono ithi anie, ike atianuliqoye akughunu aphi eno bheri ngo atsu-aqu lojino ati sasu chekhanie. Tsala timino ghulo lakhimu panoqo hakilhe napi aye bheri ngo atsu-aqu kumtsu thikhaniae.

¹⁴ Impeu noye izuuno cheghilo eno niye atsu-aqu ngo atianuliqono wuluke qhemi lono asheshino opape ighinie, eno Seir lono olau ighini.”

¹⁵ Esao no pi, “Tishi aye igholo chekemi khami ogholo qhitsunie.” Ikemu Jakob no khochile pi, “Niye ozulo ikhikulupu shiaghive ake tinguno alauye kumu kumo-ae.”

¹⁶ Ikehu tipanino Esao no Seir kudau idewove.

¹⁷ Jakob ye Sukot kudau chesu wuve eno tile pa likhi pa ghenguno aki lakhi shi eno pa tsuaqu ghenguno apusho shie. Tighenguno tipa-a pesu Sukot ku-tsue, pa kiqiye apusho.

¹⁸ Mesopotamia lono ide susu chekelo Jakob ye kiumu kupunamono Kanan yeghilo Shekem phu tolue. Eno tipa phu kipela kudau pa phiki shipe qhie.

¹⁹ Pano aphiki shipe qhikeu yeghi tipauye Hamor laghami Shekem papu launo ghuka 100 no qhuke.

²⁰ Pano tile akumllagho kiptia lakhi shipe qhino tipau pesu Alhou no Israil Lhou ipi ku-tsu. El-Elohe-Israil kiqiye Israilmi Lhou Kumlla khachekighe-a.