BOTHUBO 31 - BAIBEL (BSI)

Jakob no Laban launo Pove

¹ Jakob no Laban nuliqo tsa chilu keuno, “Jakob no ningu papu wu kuakini kumtsu luvetsue eno ningu papu wu kuakini pesu paye kinikulu shiluvae,” ipie.

² Jakob no Laban jukelo, pa gi pa lau puzu-u toi movekeu ithuluve.

³ Tile AMPEU no Jakob vilo pi, “Opuno yeghilo eno nobolomi gholo idewovelo, ino ogholo ananie.”

⁴ Ikehu Jakob no Rachel ngo Lea pama vilo pano atsu-aqu loji sasu akeu luqalo ighilo pipuwu.

⁵ Pano pama vilo pi, “Ino nongu papu juke pa gi ilau puzuu toi movae, ikemu ipu Lhou no igholo anie.

⁶ Ino ikumto kumtsu pesu nongu papu qechekeu nokujono ithi anie.

⁷ Ikeghi nongu papuh no ipishiqhie eno ijume ghuthu chighi kuto kilivetsue, ikemu Alhou no pa pelo ishipusa pemoe.

⁸ Laban no ‘yetamughuyi keu atsu-aqu qono ojume shilo’ ipinapi aye, atsu-aqu loji kumtsuno yetamughuyi keu likhi pitie. Pano, ‘asuphakive thaqhuno ojume shilo’ ipi napi aye atsuaqu loji kumtsuno asuphakive likhi pitie.

⁹ Hitoi shi puzu Alhou no nongu papu wu apighi ikhipewo itsuveke.”

¹⁰ “Atsu-aqu ghupa ghulokilo, ino isamouno ishi ithulue, bheritsu khipaqono aqu ipa keno tipaqo huye asuphakive ngo yetamughuyi keu eno aye vepu keqo shiakhae.

¹¹ Eno asamouno Alhou wu kungumino ivilo ‘Jakob’ ipi ikue. Ino ‘Iye, ni hi anie’ ipi khochile.

¹² Tile pano pi, Pishipuwo julo, bheritsu ipa akeqo kumtsu asuphakive ngo yetamughui eno aye vepu keqoe, kughengu Laban no olau kiu shi anikela kumtsu ino ithuluvae.

¹³ Niye Bethel lo olau ipeghi keu Lhou ke. Nono tile atu shope qhino teli pesu nupuku eno nono ivilo ashoqhi lakhi shike. Mtazu hekutsu kuto puzu hipa yeghi qhiveno nobolomi yeghilo idewovelo.”

¹⁴ Rachel ngo Lea pamano pa vilo pi, “Ni pu kilo nisala momu ni mheghi kuhae.

¹⁵ Pano ni kughape inami paphi shi kihisu auvae. Kughengu pano ni kughape jeve eno ni ghenguno pisa ithulukeu kumtsu pano puwo khavae.

¹⁶ Ikemu kuakini khije Alhou no ningu papu launo ikhipheluve tsu akeno tiye ni wuae eno ninuliqo wuae. Ike itehiye Alhou no ovilo kiu pikeno ti shilo.”

¹⁷ Jakob no mtazu kutothuno pa nuliqo ngo pa nipuqo ishi kemel shou kughuqae.

¹⁸ Mesopotamia yeghilo akelo pa tsu-aqu eno pa pighi khije pighiche keno kumtsu hasasu Kanan yeghilo papuh Isak lau wuniye cheve.

¹⁹ Laban ye pawu bheriqo amhi ghoniye wuve eno pakuha kelono Rachel no papuh wu aghatu pukasuwuve.

²⁰ Jakob no paye poveni cheni kepi pimo puzu kusu-uno Laban pishiqhive.

²¹ Ikehu Jakob ye pano kiu pighiche keno kumtsu pa gholono sasu pove. Pano posusu Eufrati ghoki katha susu Gilead to kudau wuniye che.

Laban no Jakob Hasu Ighi

²² Jakob ye povea pikeu tsa akuthuni no Laban no chilue.

²³ Pano pa thikuzumiqo sasu aghulo tsuni Jakob hasu ighi eno panonguno Gilead to lono Jakob halue.

²⁴ Eno putholo Alhou no asamouno Aramiau Laban lau ighino pi, “Olikhi osuchile luvelo eno Jakob vilo akivi na alhoksa namu pikevilo.”

²⁵ Laban no Jakob halu kelo paye atoghilo pa phiki shipesu aghie. Laban ngo pa thikuzumiqo ghi Gilead to lo aphiki shipe ngoe.

²⁶ Laban no Jakob vilo pi, “Noye kushiye kusu-uno ipithi mono pove kya? Eno aghushi lono kughaluve keshi inga noqo sawuve tsu kya?

²⁷ Noye kushiye ivilo pimono ipishi ghi itshusu wuve kya? Nono ivilo pike aye akighi lebo pesu alokivishi alephe alalo osawo phepuwoni cheke.

²⁸ Noye ipelo itilimiqo eno ningaqo mu ilenowolo pi muma pemoe. Hitoi shikeuno noye aghuzu shivae.

²⁹ Oshipusave kepu kuka i-ulo anie, ikemu iji putho lono opu Lhou no ivilo ishi pie, ‘Olikhi osuchileluvelo eno Jakob vilo akivi na alhoksa namu pikevilo.’

³⁰ Noye opuno kilo idewove nishiqhiyi acheke woni putsa pi niye ithi ae, ikemu noye kiushiye nikibolomino mllachekeu lhou puka suwuvetsu kya?”

³¹ Jakob no Laban khochile pi, “Niye musaveke, nono anguka lono ilauno ongaqo saluve nosa kepi ino kumsuve.

³² Ikemu hile khualano oghatu pesu cheghi aye timi tipau pithive penie. Nikibolomi zulono kiu kiumu owu shi-aghikeu nigholo aghi aye ju puzu lulo.” Jakob ye Rachel no tipaqo pukalukeu mthae.

³³ Laban no Jakob phikilo, Lea phikilo eno aqeliu pama phikilo ngo ishi ilojue ikemu pa ghatu ithumlae. Tile pano Lea phiki lono ipeghi puzu Rachel phikilo iloe.

³⁴ Rachel no aghatu pesu kemel shou akughuqa-a qholo kusuve eno tipaqo shou iqave. Laban no aphiki kumtsu lheju ikemu tipaqo ithumlave.

³⁵ Tile Rachel no papu vilo pi, “Ino ogizulo puthugholuve moke ghenguno omlo idetsu kevilo, kughengu niye totimino aqhi-aqhilo alhoayeh achekeu hu shianie.” Laban no lheju namu pawu ithumlave.

³⁶ Tile Jakob no pa mlo ideve eno Laban lomipi: “Niye kiu kuquve eno kiu yezah hephove keno noye kushiye ishi muqhumza susu iha cheni kya?

³⁷ Itehi nono inhemgha akuchopu lhejuveake, okilo nhemgha kiu pesu cheghi kya? Iwu timi eno owu timiqo zulo qhijulo tishi anguno nikujo dolo panongu pelo kughathatsu penike.

³⁸ Ampe hi muku ino ogholo ngokelo, owu bheri aqu ngo anequ qoye iqowuvekeu shijumoe, eno owu atsuaqu loji lono bheritsu lakhimu niye chupe puamoe.

³⁹ Tungtughano suthapinivetsu aghikeu olau pewo piyeke kumoe, ikemu tipau thelilo ino amakho puve cheke. Putholo na puchou namu pukasuwuve aghi aye nono ilauno khuluve che.

⁴⁰ Ipuzu niye, puchouye akushuno ighaqhi eno puthoye akumkono ipichiqhie eno niye zuhumlae.

⁴¹ Titoi shi puzu ampe muku okilo ngo. Onga pama ghenguno ampe chighi bidi oqe eno atsu-aqu ghenguno ampe tsugho oqe, tishi keghi nono ghuthu chighi kutolo ijume kilivetsue.

⁴² Ipu Lhou Abraham Lhou eno Isak no mlla chekeu Lhou no igholo acheke ghenguno thono noye kuchouno a-u kumsa ipuwoveni cheke. Ikemu Alhou no iwu shiluksa ithulu eno ino kiu mlakeno ithulu puzu, iji putho lono olomi pike.”

Jakob ngo Laban Bekutha

⁴³ Laban no Jakob khochile pi, “Anga hipaqoye ingake, eno anuli hipaqoye inulike eno atsu-aqu hipaqoye itsu-aqu ke eno nono kiu ithulu ani keno kumtsu iwuke. Ike ishi niye inga hipaqo lau eno panongu nuliqo lau kiu shitsulopi kya?

⁴⁴ Tighenguno ningu puloshoqhi lakhi shini nolo, nikujo dolo shinie eno tino nikujo dolo thopi shi apenie.”

⁴⁵ Tile Jakob no atu lakhi ikhipewo shope qhie.

⁴⁶ Eno pano pawu timiqo vilo pi, “Atu kiche kumqolo,” ike panonguno atu sughi eno amqo shi gheqhe pukue. Tishieno panonguno atu gheqhe pukukeu shou ngono alibe chue.

⁴⁷ Laban no tipau je pesu Jagar-Sahaduta kutsu ikemu Jakob no Galed ku-tsue.

⁴⁸ Tile Laban no pi, “Gheqhe pukupe puakeu hipauno ishi tsala lo nikujo dolo thopi ake. Tishi kehu tipa-a pesu Galed ipi cheni. Tiye Mizpa ghi picheni,

⁴⁹ kughengu Laban no ishi pi, ‘Nikujo lakhino lakhi launo kututa shi anamu AMPEU no okhe eno ikhe apenie.’

⁵⁰ Tsala nono ingaqo shikighime napi aye momu nono ingaqo nguno anipu kutau luwuve napi aye, timi khumu ningu gholo kuhae, ikemu julo Alhou no nikujo dolo thopi ani.”

⁵¹ Laban no highi Jakob vilo pi, “Julo hi gheqhe puku puakeu eno athigho nikujo dolo shipe qhipuanie.

⁵² Hipau gheqhe puku puakeu pelo thopi shipeni, eno athigho hipauno thopi shipeni, ike niye gheqhe puku puakeu hipau vechewo olau ighimonie, eno noghi hipau thigho hechewo ishipusa pemonie.

⁵³ Abraham Lhou eno Nahor Lhou, panongu papu Lhou pelo nikujo dolo kughathatsu apeni.” Jakob no papu Isak no mlla chekeu Lhou je lono ashoqhi shie.

⁵⁴ Jakob no lhoxu lakhi heqhino aghashikeu kumllagho lakhi atoghi lono shie. Pano abolomiqo kusawo tileno alibe chue. Panonguno chu-a puzu puthotsu tipa toghilo ngove.

⁵⁵ Thanau Laban ye itheno ithu no pa tianuliqo eno pa ngaqo vilo ilenowolo pi mumakile. Laban ye pano phulo idewove.