BOTHUBO 30 - BAIBEL (BSI)

¹ Rachel no atianuli punumokehu pafo ju anheshuwuve eno Jakob vilo ishi pi, “Atianuli itsulo tikumoaye niye thiniae.”

² Jakob ye li shou axu ideveno pi, “Niye Alhou kesheno! Opelo timi kuxu ithumlano apekeu hiye Alhouno thono.”

³ Li no pi, “Iqeliu Bilha hi anike li sasu zulo. Tishianguno li pelo anga punu itsu peni eno li vechewo nighi atianuli kuami paza shijunie.”

⁴ Tishi puzu lino aqeliu Bilha pe li kimi tsue, eno Jakob no li sasu zuve.

⁵ Bilha no mishiluve puzu anu lakhi punutsue.

⁶ Rachel no pi, “Alhou no ilau xathatsuno ikighini khochile tsu ghi anu lakhi itsue.” Tighenguno lino pa je Dan kutsue.

⁷ Rachel qeliu Bilha no itaghi mishiluve eno anu lakhi punutsue.

⁸ Rachel no pi, “Ino ifo sasu shishe kichighi ke, ikemu ino toluvae.” Ikehu lino pa je Naftali kutsue.

⁹ Lea no atianuli punumove kethiu lino pa qeliu Zilpa pesu Jakob nipu shipeniye tsuve.

¹⁰ Zilpa no anu lakhi punu tsue.

¹¹ Lea no pi, “Niye angu kivi shivae!” eno lino pa je Gad kutsu.

¹² Zilpa no itaghi anu akiniu punue.

¹³ Lea no pi, “Niye kiutoi alovinia kya! Totimi kumtsuno hinguno hilauye alokiviu ipi ikuniae.” Ikehu lino pa je Asher kutsue.

¹⁴ Ghile tsalalo Ruben no aluqalo hukelauye zunilobo ithuluke pano paza Lea tsue. Tile Rachel no Lea vilo ishipi, “Onuno peighi keu zunilobo hami itsulo.”

¹⁵ Lea no li khochile pi, “Nono ikimi sawuveke likhi kumo puzu, inuno sughikeu zunilobo ghi suwuveni kesha?” Rachel no pi, “Ike tighenguno onuno sughikeu zunilobo zuqhulo thohuye Jakob pelo ogholo zupenie.”

¹⁶ Avelau Jakob no alu lono woghi kelo Lea no pa sasu kushoniye wu puzu pi, “Noye itijiye igholo zumasae kughengu inuno sughikeu zunilobo pesu ino tipame tsuvae.” Ikehu tipaji pano li sasu zue.

¹⁷ Alhou no Lea kighini khochile tsuno lino mishiluve eno anga apunguu punutsue.

¹⁸ Lea no pi, “Alhou no ijume itsue, kughengu iqeliu pesu ikimi tsue.” Lino pa je Isakhar kutsue pa kiqi “ajume.”

¹⁹ Lea no itaghi mishiluve eno anu akutsughou punu tsue.

²⁰ Tile Lea no pi, “Alhou no ipelo ame kivi pime lukepu qhitsu anie, hinguno hilauye ikimino igholo acheuve niae, kughengu ino anu tsugho punuve tsuae.” Lino paje Zebulun kutsue pa kiqi “agho.”

²¹ Tithiu lino anga totimi lakhi punue eno li je Dina kutsue.

²² Tile Alhou no Rachel ghi kumsulue. Pano li kighini chilutsue eno li pelo atianuli punulukepu shilupe.

²³ Lino mishiluveno anu lakhi punue. Tile lino pi, “Timi no ijukunatha keu Alhou no ikhipewuve tsuae.”

²⁴ Lino pa je Josef kutsu eno pi, “AMPEU no itaghi anu lakhi kuphatsu penie.”

Jakob ngo Laban

²⁵ Rachel no Josef punuve kethiu Jakob no Laban vilo pi, “Ipuwovelo eno ipelo ni-alo eno nighakhulo wove pelo.

²⁶ Inipu eno inuliqo itsuvelo, panongu ghenguno ino oqeveake ipelo wove pelo. Nono ithi anino niye akivishi oqe ighivae.”

²⁷ Laban no pa vilo pi, “Nono pulokepu shi aghiaye kitila khe aghilo. Ino saqhisali shijuke oghenguno AMPEU no ikumghatsu anie.

²⁸ Ojumeuno khije shi nani kela ivilo pilo, ino ti otsunike.”

²⁹ Jakob no pa vilo pi, “Ino kishi otsu-aqu tucho heju keu lono alau ikowolu acheni keno nono ithi ani!

³⁰ Ino ighimphi loye noye aghulo likhi pighi cheghie, ikemu itehiye aqokitiqhi shi ikowovae, eno ipukhu suqheuke kumtsulo AMPEU no okumghatsu anie. Itehiye nighi ikibo ghenguno jukuto masa kepu shivae!”

³¹ Laban no ishi iniju, “Niye kiu otsulo pikya?” Jakob no khochile pi, “Tsala nono ighenguno hi shitsuniepi aye noye kiumu itsuniepi kevilo. Ino itaghi otsu-aqu lojitsu eno khetsunike.

³² Tiye hike: ishi ino otsu-aqu loji gholo wunie, ipuzu bheri tsubuyi kethaqhu eno asuphakive momu yetamughui keu amshi momu ane hathape qhino tino ijume shinie.

³³ Tishianguno hithiazuuye ijume ghenguno osasu kushokelo niye amikucho shi ani kemo keno ithipenie. Tsala tsubuyikeu ngo asuphakive momu yetamughuyi keu kumo puzu kutauqono itsu-aqu gholo aghi aye tiye pukalu kena pi nono ithi penie.”

³⁴ Laban no pi, “Nono pikeu toi shini ke pulo vetsuae.”

^35-36 Ikemu tipani Laban no wuno ane eno bheri kumtsu hakutsupe amqoshi qhino anetsu eno ane ali khijehi asuphakive eno yetamughuyi aghi keno tipaqo thaqhu kuta shive, eno akimiye hekite kungo aghi keu bheri tsubuyi keqo kutashi qhino Jakob nuliqo pelo lhoxu tipaqo sasu atsala kuthu lachelo sawuno jukutsu luvepe. Eno Jakob ye Labanw atsu aqu a-alo qhive keqo khe auve.

³⁷ Jakob no khotsusu loka ngo almon loka eno tsuzusu loka ishi sughi no ayikoza aqe-aqe shighi miyeve kehu asuloka lo metsughoi ala-ala shi ipeghipe.

³⁸ Kughou atsu-aqu lojino azu yechekeu tughukolo ighini keno pano aloka tipaqo pesu lhoxuqo zulo qhie, tishianguno aghupa ghulokilo ti ithulu no velu peniye ke.

³⁹ Kughou atsu-aqu lojino alokaqo jughi kughupa keno tipaqono ati piti aye yetamghuyi keu ngo asuphakive ngo ishi pitie.

⁴⁰ Jakob no Laban tsu-aqu lono aqu thaqhu kututa shipesu qhie eno tipaqo pelo atsu yetamughui keu momu tsubuyi keu sasu ipape. Tishi puzu pano Laban tsu-aqu loji gholono paw atsu-aqu loji kughukowoe.

⁴¹ Kughou atsu-aqu dolo akumto thaikeuno kughupani keno Jakob no tipaqo zulo aqe-aqe shi miyevekeu loka hu suwo qhitsue, tishianguno aloka tipaqo ju-ghi ipapeniyeke.

⁴² Ikemu qei-nai keu thaqhuno Laban wu shive eno akumto thaikeuno Jakob wu shive ishie.

⁴³ Kusho kumolono paye akini kutsasa auve. Paye atsu-aqu, aqepumi aqelimi, kemel ngo gadaha ishi kutomo auve.