BOTHUBO 29 - BAIBEL (BSI)

Jakob no Laban Kilo Ighi

¹ Jakob no chesusu wuve eno kipelaumi yeghilo ighi.

² Pano jupuwu kelo aluqalo azukikhe lakhi ae eno bheri aqo kuthu tipa phivilo akeu ithulue. Bheriqo huye tipa zukikhe lono azu piyecheke eno atu kije lakhi azukikhe kichi nhape puache.

³ Tipa-alo bheri lojiqo kumtsu hekutsu sawo qhiche eno akhemino azukikhe kichilo atu hu tukulono bheri lojiqo azu piyeche, eno atu hu tukulokide sawo azukikhe kichi nhape qhivecheke.

⁴ Ike Jakob no panongu vilo iniju, “Athikuzumiqo, nonguye khuno ghami kya?” Panonguno khochile pi, “Ninguye Haran no ghami ke.”

⁵ Pano ishi iniju, “Nonguye Nahor nu Laban ithi anima?” Panonguno pi, “Ninguye pa ithi anie!”

⁶ Pano panongu vilo iniju, “Paye akivishi anima?” Panonguno pi, “Paye akivishi anie, le pa nga Rachel ghi bheri loji sasu hu chenike julo!”

⁷ Jakob no pi, “Julo atsala kushuwa aphie eno bheriqo hekutsu sawo qhike ghuloki kumphike nonguye kushiye bheri lojiqo azu piyeveno achu kumzaumo kya?”

⁸ Panonguno khochile pi, “Aqemi kumtsu hekutsuwo ngono azukikhe kichilo atu takulo kethiuno bheri lojiqo azu piye chenie.”

⁹ Jakob no panongu putsa ake lono Rachelno pa pu nowu bheri loji sasu ighie. Lino li pu wu bheri loji khecheke.

¹⁰ Kughou Jakob no pangu Laban no nga Rachel ithulu keno, pano azukikhelo wu puzu atu nhape puakeu tukulovetsue eno pangu wu bheri loji azu piye.

¹¹ Pano Rachel muma eno ighamuku qauve.

¹² Eno Jakob no li vilo pi, “Niye opuno bolomi eno Rebeka no nue.” Lino li pu vilo piniye posu wuve,

¹³ eno kughou Laban no pa tikishiu Jakob ghili chilu keno, pano Jakob sasu kushoniye posusu wu puzu pa vape eno pa mumano pakilo pa sasu wuve. Jakob no Laban vilo thwokha kumtsu lhepe pive.

¹⁴ Laban no pavilo pi, “Kuchouno noye nishi niyehke.” Ike Jakob no pa gholo aqhi lakhi kupuju ngove.

Jakob no Laban Qe

¹⁵ Laban no Jakob vilo pi, “Noye nibolomi kepi kumsano iqe apeni kesha? Oqeye khije shinani kela ivilo pilo?”

¹⁶ Laban ye anga kini ache. Akichiu jeno Lea eno ayitiu jeno Rachel.

¹⁷ Lea ye anhethiye alloke, ikemu Rachel no ahi vie eno ajukivie.

¹⁸ Jakob no Rachel sasu kimiyekile che ikehu pano pi, “onga ayitiu Rachel ghenguno ino ampe tsuni oqenie.”

¹⁹ Laban no pi, “Li kughape kutami kilo puwonike zuqhu okilo puwokeu pavie. Igholo ngolo.”

²⁰ Jakob no Rachel luniaye ampe tsuni kutolo qeche, eno pano li kimiye chekehu, ampe tije jehi hu pa ghenguye atsala lakhia kinia hutoive.

²¹ Jakob no Laban vilo pi, “Ido kupuveake inipu itsulo eno ipelo li sasu kulauve pelo.”

²² Ikehu Laban no akukula ghulhu kuto puzu tipa-alo akemi kumtsu ku-sue.

²³ Ikemu tipaji, Laban no Rachel zuqhulo Lea sasu Jakob lau sawue, eno Jakob no li sasu zuve.

²⁴ Laban no pa qeliu Zilpa pelo panga Lea qeliu shipeniye li tsue.

²⁵ Thanau Jakob no jukelauye Lea shive aghi. Pano Laban vilo pi, “Noye kushiye ilau hitoi shikya? Niye Rachel ghenguno oqeke kushiye ishi ipishive kya?”

²⁶ Laban no khochile pi, “Hila ni ghakhu loye ayitiuno akichiu zuwuno kulauni keu akhu ayeh lo kuhae.

²⁷ Hipau pinye do kupuju akichiu ghenguno aghulhu shi akeu wove paghi pelo, tsala nono itaghi ampe tsuni iqenipi aye ino Rachel ghi okilo puwonie.”

²⁸ Jakob no pulove, eno tipa pinyedo kupuju aghulhu shiakeu wove kethiu, Laban no panga Rachel ghi Jakob nipu shipeniye tsuve.

²⁹ Laban no pa nga Rachel qeliu shipeniye Bilha pesu li tsue.

³⁰ Jakob no Rachel ghi pesu panipu shiluve eno pano Lea nguno alau Rachel kimiye. Jakob no itaghi ampe tsuni Laban qeke.

Jakob Nuliqo

³¹ Lea mithivekeu AMPEU no ithuluve eno pano li pelo atianuli ithulupe ikemu Rachel ye anuha shivepe.

³² Lea no mishiluveno anu lakhi punue, lino pa je Ruben ku-tsue. Lino pi, “AMPEU no ighime ithitsue hinguno hilaye ikimino ikimiyeniae.”

³³ Li no itaghi mishiluve eno anu kutau lakhi punue. Li no pi, “Timi no imithivekeu AMPEU no chilu tsue eno itaghi anu lakhi itsu anie.” Li no pa je Simon ku-tsue.

³⁴ Itaghi lino mishiluve eno anu lakhi punue. “Itehiye ikimiye alau idahaniae, kughengu ino anu kuthu punuvetsuae.” Ikehu lino pa je Levi ku-tsue.

³⁵ Lino itaghi mishiluve eno anu lakhi punue. Lino pi, “Itehi ye ino AMPEU sheqheni.” Tighenguno lino pa je Juda kutsue. Tishieno liye atianuli punumove.