BOTHUBO 28 - BAIBEL (BSI)

Jakob no Laban lau Pove

¹ Isak no Jakob ku puzu pa kumghatsu eno pa lakha ghi pi, “Noye Kanan limi lusawo onipu shiniepi kevilo.

² Mtazu Mesopotamia ghakhu lo oza papu Bethuel no kilo wuvelo, eno tilauno oza peu Laban no nga gholo lakhipe onipu shi lulo.

³ Akughushu Lhou pelo okumghatsu peniu eno opiti kughukoluno opelo lighimi shilu peniu.

⁴ Pano Abraham kukumgha otsu eno opiti tsu peni, tishi keu lono nono khipa yeghilo inami shi achekeno, Alhou no Abraham tsu keu yeghihu, omheghi shilu nani.”

⁵ Tishieno Isak no Jakob puwuve. Pano Mesopotamia ghakhulo Aramiami Bethuel no nu Laban lau wuve. Laban ye Jakob ngo Esao pama paza Rebeka peu ke.

⁶ Isak no Jakob kumghatsuno Mesopotamia lo puwuvekeu eno tilauno anipu lupeniye shikeu Esao no ithive. Isak no kumghatsu akelo “Noye Kanan limi onipu shinike lukevilo” pi kehu,

⁷ Jakob no papu ngo paza pama gho lupuzu Mesopotamia lo wuve.

⁸ Isak no Kananlimi ye pa lomokeu Esao no ithive puzu, Abraham nu Ismael lau wue.

⁹ Eno paye anipu kutau akeqo nguno alau Ismael no nga Mahalat luve, liye Nebayot chepuke.

¹⁰ Jakob ye Bersheba lono chesusu Haran kudau wuche.

¹¹ Pano a-a lakhi to kelo tsukinhe ilove kehu puthoye tile ngove. Pano tipa alo atu ikhisuwo pa kutsu kumkhu shipuzu ihozuve.

¹² Pano asamo pumokeuno akala lakhi ayeghi lono iku atsutsu toa. Alhou wu kungumino tipaulo ikuju iqiju akeu ithulue.

¹³ Tile AMPEU no pa phivilo puthugho aghi keu ithuluno pano pi, “Niye AMPEU ke, opu Abraham Lhou eno Isak Lhou ke. Nono khipa shou ihozu anikeno ino no eno otikughukoqo tsunie.

¹⁴ Otikughukono ayeghi mukhu jehi nani, eno otikughukono kipelau ngo kulolau, ahuu ngo apeu qhanhawo nani. Ino no eno otikughuko kumghatsu kehu toi ashiayeh kumtsuno pano kumghatsu peniye ivilo iniju nani.

¹⁵ Hi ithilo, nono khile khile wunamu ino ogholo chenani eno oputukha sasu anani, ino hipa yeghilo osachile saghi nani. Kughengu ino ovilo pivekeu shikupumoke kuto niye khilemu oqhivemo nani.”

¹⁶ Jakob no zuida thughi no pi, “Kuchouno AMPEU ye hipa-alo ani mu niye ti mthano ae!”

¹⁷ Paye msaveno pi, “Hipa-aye kiutoi akumsapu kya? Hiye kutau ke kumo puzu Alhou ki eno kungugha kikhaghoe.”

¹⁸ Jakob no inaqhe itheno ithu puzu pa kutsu mukhupesu zukeu tu ikhi pesu Alhou lau atushope qhieno tipa shou teli lepukuve.

¹⁹ Tipa-a pesu pano Bethel Tipau kiqiye kutsu. Azuuye tipa phu pesu Luz ipi cheke.

²⁰ Jakob no ashoqhi lakhi shi ghi ishi pie, “Tsala Alhou no isasu che aye eno ino izuwukeu lalo ikhe sasu wu eno chusho kepu itsu, aphimini ukepu itsu puzu

²¹ alokughuno shi ipelo ipuno kilo deghilu peaye, tileno AMPEU pesu iLhou shinie.

²² Atu hipau ino Alhou lau atushope qhikeu pesu Alhou ki shinie. Nono kiu itsuni keno tipau lono kuchouno ino chighi sajelo lakhi otsunie.”