BOTHUBO 27 - BAIBEL (BSI)

Isak no Jakob Kumghatsu

¹ Isak ye kitemi shive eno pa nhethino zamemeyive kehu paye ithumlauve. Pano panu akichiu Esao ku puzu pi, “Inuo!” Esao no khochile pi, “Iye, ni hi anie!”

² Isak no pi, “Julo, niye kitemi shivae eno kughono thive nani kela mthae.

³ Mtazu osuzu ngo opiji lupuzu aluzalo ilojulo eno isala ashe shi sughilo.

⁴ Eno puzuu hutoi isala ashi jumghai lhopesu ilau peighilo. Ino ti chunie, eno tileno ino thimphi lono iwu kukumgha ashekhau otsunie.”

⁵ Isak no panu Esao putsa akelo Rebeka ye inia. Esao no papu ghenguno ashi hauniye aluzalo wuve.

⁶ Tile Rebeka no Jakob vilo pi, “Opuno omu Esao vilo ishi piaghike ino chilue:

⁷ ‘Ashe shi sughino isala jumghai lhosughilo tishianguno ino chu puzu ino thimphi lono AMPEU zulono okumghatsunie.’

⁸ Tighenguno anuo, ino ovilo pikeu tsa inino shilo.

⁹ Wupuzu lhoxu gholono aneti athakupu aloke kini saghilo. Ino tipau opuno chunishi qhiyi chekeu toi pa ghenguno jumghai lhotsuni ke,

¹⁰ nono opu lau pewu peni, tishieno ti chupuzu pano thimphi lono okumghatsu penie.”

¹¹ Ikemu Jakob no paza Rebeka vilo pi, “Imu Esao ye amhi ghoghoikemi eno niye iyiko muduni kepi nono ithi anie.

¹² Tsala ipuno ikunhuju puzu ino pa pishi akeu ithive aye, ikumghatsu nike zuqhu ighushove niae.”

¹³ Pazano pi, “Oghushokeu ishou ikughi pelo, anu; itsa likhi chilulo, wupuzu aneti ilau saghilo.”

¹⁴ Ikehu Jakob no ti luniye wue eno paza lau saghie. Lino papuh no pulochekeu toi ashi jumghai lhotsue.

¹⁵ Tishieno Rebeka no panu akichiu Esao phimini akiviu li gholo akilo puachekeu pesu panu ayitiu Jakob pepipe.

¹⁶ Lino aneti yiko pesu pau eno pa kuo mudini kealo pepipeve.

¹⁷ Eno jumghai keu shi ngo asho anileshi shikeu ngo ishi ikhipe lino Jakob ulo sutsue.

¹⁸ Tile Jakob no papuh lau ighi puzu pi, “Ipuo!” Papu no khochile pi, “Iye, ni hi anie! Noye inu khikhiu kya?”

¹⁹ Jakob no khochile papu vilo pi, “Ni Esao onu anoghiu ke; nono ihapuwu keu kiqilono ino shisughi anie. Ithu puzu iqano ino veqhisughi keu she shi chulo. Tishieno nono okukumgha itsu kepushilo.”

²⁰ Isak no pi, “Inu kishi puzu noye itheno ti phulu kya?” Jakob no khochile pi, “AMPEU oLhou no izulo ti saghitsue.”

²¹ Isak no Jakob vilo pi, “Iphivilo ighijulo, noye kuchouno inu Esao kemokela ino okunhujunie.”

²² Jakob no papuh kupunu ighikelo Isak no pa kunhu juno pi, “Atsapiye Jakob tsapie eno auye Esao ue.”

²³ Paye Jakob kepi michimlave, kughengu pa-u ye Esao u toi amhi ghoghoi kehu. Eno pano Jakob kumghatsue.

²⁴ Pano ishi iniju, “Noye kuchouno inu Esao kesha?” Jakob no khochile “Iye” ipive.

²⁵ Isak no pi, “Ti iphivilo sughilo, ino inuno veqhisughi keu she shi chuni, tishieno ino okumghatsunie.” Jakob no pa lau peighi eno Isak no ti chue, pano aji ghi pa lau peighitsu eno pano ti shoe.

²⁶ Tishino papu no pa vilo pi, “Inu, ikupunu ighi puzu imma lo.”

²⁷ Pano mumanike ighi eno Isak no pa kumghatsughi pi, “Julo, inu xokutsungu hipauye AMPEU no kumghavetsu keu luqa xokutsungu toi anie.

²⁸ Alhou pelo atsutsulo tsuzu otsu puzu oyeghi kinikulu shitsu peni. Eno athi ngo aji nibonilei otsupeniu.

²⁹ Timiqo pelo oqe peni, eno ashi- ayehqo pelo ozulo itsaipu peniu. Nobolomiqo shou ampiu shipeni eno oza tikughukoqo pelo ozulo itsaipu peniu. Oghusho kemiqo shou ghushokeu apeni, eno okumghatsu kemi shou kukumgha apeniu.”

Esao wu Kukumgha Puhave

³⁰ Isak no Jakob kumghatsu tave ke mtsa eno Jakob no papu zu lono cheveniye ake mtsa pamu Esao ye ashikau puzu ighie.

³¹ Pa ghi ashi jumghai lhono pesu papu lau ighi puzu papu vilopi, “Ipu ithuno onuno veqhi sughi keu shi chulo, tishieno ikumghatsu kepushi.”

³² Papu Isak no pi, “No khuu kya?” Eno pano khochile pi, “Niye onu anoghiu Esao ke.”

³³ Tile Isak ye khokhoshi ithauveno pi, “Imaye ashe shi pesu ighieno itsukeu huye khu kya? Nono ighinike zulono ti kumtsu chuvae eno pa kumghavetsuae, paye pulhapuju akumghau shiveniae.”

³⁴ Esao no papu tsa chilu puzu kukhu kixi he ipikeu shi ighamuku qa ghi papu vilo pi, “O ipu, nighi ikumghatsulo!”

³⁵ Isak no khochile pi, “Othikuzuuno imuquqhive puzu okukumgha pewuvae.”

³⁶ Esao no pi, “Pa je ye achipishi ghi Jakob ku puatsu akekumo? Kughengu pano ishipha akiniu ipishiqhivae. Pano iwu anoghiu mheghi luve eno itaghi iwu kukumghaghi luvetsuae.” Pano pi, “Noye ighenguno kukumgha lakhi likhimu pua tsumove kesha?”

³⁷ Isak no khochile pi, “Ino pa pelo oshou ampiu shipeni keu shivae, eno pano bolomi kumtsu paqeu shipenikeu shi pa tsuvae. Athi ngo atsaiji ishi ino pa tsuvae. Inu niye oghenguno kiu shitsulo pi kya?”

³⁸ Esao no papu vilo pi “Ipu noye kukumgha lakhimu ighenguno kuhavea kesha? Ni ghi ikumghatsulo, Ipu!” Esao no tishi pieno ighamuku qauve.

³⁹ Papu Isak no khochile pi, “Okungoaye ayeghi kinikulu launo putosuniae, eno atsutsu tsuzu launo putosuniae.

⁴⁰ Ozuta peithakeu lono nono xulu nani, eno othikuzuu qe nani. Eno kughou nono hebide ipeghini keno pawu kuokhasu okuo lono hechheve nani.”

⁴¹ Tithiuye Esao no Jakob mithiwuve, kughengu pawu kukumgha papuh no Jakob tsuvekehu. Esao no ishi kumsue, “Ipu ghenguno mloqa kepu do kupunu wocheae; tithiuno ithikuzuu Jakob ghiqhi nani.”

⁴² Ikemu Esao tsa hipaqo hu Rebeka tove, ikehu lino Jakob kupuwu puzu pavilo pi, “Omu Esao ye oghiqhivenike kughu anie.

⁴³ Inu, noye itsa inilo, noye kuto puzu Haran lo ipeu Laban lau povelo.

⁴⁴ Ado lakhi pa gholo ngo aghilo, omu no pa loghu iqumoke kuto,

⁴⁵ eno nono pa shou kiu shivekela kumsumamoke kuto ngo aghilo. Tithiuno ino timi puwu puzu tilauno osaghi penike. Kushiepi niye ghulo lakhi lono okujo kinikujo puhave apeni kya?”

⁴⁶ Rebeka no Isak vilo pi, “Esao nipu Hatilimi qo ghenguno ikuxu azuzuvae. Tsala Jakob ghi Hatilimi lu napi aye ikuxu xu akuzupu kumoe.”