BOTHUBO 25 - BAIBEL (BSI)

Abraham Tikughuko Kutamiqo

¹ Tipathiu Abraham no anipu lakhi lue, li jeye Ketura.

² Lino Zimran, Yokshan, Medan, Midian, Ishbak, Shuwa ishi punue.

³ Yokshan no Sheba ngo Dedan papue, eno Dedan nuliqono Ashurim, Letushim, eno Leumim ishie,

⁴ Midian nuliqono Efa, Efer, Hanok, Abida ngo Elda ishi. Hipaqo kumtsu Ketura tikughuko ke.

⁵ Abraham no pano kiu pighi chekeno kumtsu pesu Isak wu shivepe.

⁶ Eno pa nipu kutami nuliqoye pano xuaphi lono agho pesu tsu puzu panonguye pa nu Isak launo putou kipela ghakhulo puwuve.

Abraham Kithi

⁷ Abraham ye ampe 175 xue.

⁸ Paye ighono kitemi shino thive eno panowu timi kithimi gholo hekutsu sawuve.

⁹ Pa nu Isak ngo Ismael pamano Makpela tuki Hatimi Zohar nu Efron lulo, Mamre phu kipelau akeulo pa kumo qhovetsue.

¹⁰ Alu tiye Abraham no Hatimi launo qhulue. Abraham ngo pa nipu Sara pama kinikujo kumo tile qhoe.

¹¹ Abraham thive kethiu Alhou no panu Isak kumghatsue, eno paye Beer-Lahai-Roi zukikhe philo ache.

¹² Hipaqono Abraham nu Ismael ti kughukoe. Paye Sara qeliu Ijip liu Hagar no punuke.

¹³ Hipaqono Ismael nuliqo jeke, panongu punukeu apasu shi aje kutsu keu kiqi lono: Ismael nu anoghiuno Nebayot, pa thiu punukeqo no Kedar, Adbel, Mibsham,

¹⁴ Mishma, Duma, Masa,

¹⁵ Xadad, Tema, Yetur, Napis, eno Kedema ishie.

¹⁶ Hipaqo no Ismael nuliqo eno panongu je lono aphu shino achekeu-a jekutsue, hi atomi pano chighi kinino pano shiayeqoke.

¹⁷ Ismael ye ampe 137 shiake lono thive eno paye kithimi gholo hekutsuve.

¹⁸ Ismael tikughukoye Ashura yeghi kudau wuke lalo Ijipmi yeghi kipelau Havila ngo Shur qhalo kughuna acheuve. Panonguye Abraham tikughuko kutami launo putosu xu ache.

Esao eno Jakob Punukeu

¹⁹ Hino Abraham nu Isak nuliqo kughukoke.

²⁰ Isak no ampe lhobidi shi ake lono Rebeka luke. Liye Mesopotamia ghakhulo Aramiami Bethuel nonga eno pa peu jeye Laban.

²¹ Liye anuha shi aghike ghenguno Isak no AMPEU vilo inikhutsue. AMPEU no pa kighini khochile tsuno Rebeka ye mishiluve.

²² Li polo anga kini mishipu akeu pamano kumghothuve kelono lino pi, “Ishi kepushi keu lono aye niye kishivelopi kya?” pi lino AMPEU vilo iniju.

²³ AMPEU no li vilo pi, “Opolo ashiayeh kini anie. Noye kuthakumlami aqo kini pununi cheni. Lakhi no lakhiu nguno akumtou shi nani; Eno akichiuno ayitiu qeu shinani.”

²⁴ Lino punukepu tsala tokelo, li polo anu kini aghie.

²⁵ Atughushi punukeuye huchuyi eno amhi ghoghoi, ikehu pa je Esao kutsue.

²⁶ Tipathiuno pa thikuzuu iqighie, eno Esao launhe lo tsuqupeghi iqighi keghenguno paje Jakob kutsue. Lino hipama punukelo Isak ye ampe lhotsugho shia.

Esao no Anoghiu Mheghi Jeve

²⁷ Anu pamano thuwuve, Esao ye ashihalo shitsa shiuveno ashou itsu cheni shiuve, ikemu Jakob ye iqunei kemi eno akilo ache.

²⁸ Isak no Esao kimiye kughengu paye Esao no tughashi yipughi keu shi chuche ikemu Rebeka no Jakob kimiyeke.

²⁹ Ghulo lakhi Jakob no ayekulho lhoa kelo Esao ye aghalo ashihau puzu ighie.

³⁰ Paye kulamuve eno Jakob vilo pi, “Niye muzuthive ake ipelo ti huchui keu yekulho chupelo.” Tighenguno pa je Edom ipi kutsue.

³¹ Ikemu Jakob no khochile pi, “Ishi tsalanino owu anoghiu mheghi ivilo jesuvelo, tishi aye ino otsunie.”

³² Ike Esao no pi, “Alo, niye thini keshive ake hi anoghiu mheghiye ighenguno kiu ala shikulupu kya?”

³³ Jakob no pi, “Imaye ishino igizu lono tushoqhi velo.” Esao no tushoqhive eno pawu anoghiu mheghi Jakob vilo jesuve.

³⁴ Tileno Jakob no asho ngo ayekulho ngo ishi patsue. Pano chuvekethiu ithupuzu pa lalo wuve. Esao ye hitoi pawu anoghiu mheghi milive.