BOTHUBO 2 - BAIBEL (BSI)

¹ Ike atsutsu ayeghi ngo tile akeqo kumtsu mulaqhiluve.

² Eno tsala akutsuniu lo Alhou ye pano kiu mla akeno mlaqhiluveno atsala akutsunini pa kumla kumtsu mla taveno akulho qhie.

³ Alhou no tsala akutsuniu kumghatsue, pano tipa tsala kutashi akimthe shitsue, kughengu hipani no Alhou no pulhosu kumla kumtsu shikhaveno akulho qhilu.

⁴ Hipaqono atsutsu ngo ayeghi lhokelo ikoighi keqoe. AMPEU Alhou no ayeghi eno atsutsu mlakelo,

⁵ atsunibo lakhimu eno alothi lakhimu ayeghilo lhoipeghi mono ae, kughengu AMPEU Alhou no ayeghi shou tsughu puku pemono ake eno timi lakhimu achhigha chimono ake.

⁶ Ikemu ayeghi lono akimhi ipeghino ayeghiqha kumtsu azu piqi cheke.

⁷ Tileno AMPEU Alhou no ayeghi muqo pesu timi lakhi lhoe eno pano pa nigipelo akuxupu tuthu shesu tsu eno timi huye akuxu akeu lhoxu shive.

Eden Ghutu

⁸ Tile AMPEU Alhou no Eden kipelau aghutu lakhi qhitsue eno pano lhokeu timi hu tilehi qhie.

⁹ AMPEU Alhou no ayeghi lono jukivi ithulu kepu subo ngo chulukepu subo kumtsu ipeghipe. Tile akuxupi subo aghutu mtalo ae, eno akivi ngo alhoksa ithilukepu subo ghi ae.

¹⁰ Eden lono aghoki lakhi qowu ache tino aghutulo azu sawo chilu chepe. Eno aghutu heche ipekethiu tiye aghoki bidi shi shoba wove Atughiu jeno Pishon;

¹¹ tino Xavila chhighaqhalo qowu ache, tipaqhalo shuna ani.

¹² Eno tipa chhighalo wu shunaye aloke, tilehiye amekusho tsungquta, akughupu onik tu anie.

¹³ Aghoki akiniu jeye Gihon, tino Kush Ethiopia chhighaqhalo qowu ani.

¹⁴ Aghoki akuthuu jeno Taigris. Tino Asiriya yeghi kipelau qowu anie. Aghoki abidiu no Eufrati.

¹⁵ Ike AMPEU Alhou no timi hu sawo Eden lo akeu ghutulo qhie, ti tuchomujo eno khepeni kehu.

¹⁶ AMPEU Alhou no timi vilo ahza tsughi ishi pi, “Aghutulo akeu subo kumtsu xathi nono vejoi chulu nani,

¹⁷ ikemu akivi eno alhoksa ithilupe chekeu subo xathi noye chukevilo. Kughengu tipau chukeu tsala nino noye thini putsae.”

¹⁸ Tile AMPEU Alhou no pi, “Timi pelo pa likhi apekeu hiye aloni che moe. Pa sasu kumghulu kepu kukuphuu lakhi ino lhope tsuni.”

¹⁹ AMPEU Alhou no ayeghi shipa lono tughashi, tikishi eno aghau kumtsu lhoe; Adam ye tipaqo je kiu kutsu nani kela junike Alhou no pa lau saghie. Ike Adam no akuxu akeu lhoxu pe kiu kutsu keno tino pututa je shive.

²⁰ Tileno Adam no tikishi, aghau eno tughashiqoje kumtsu kutsue; ikemu pa ghenguye kumghulu kepu kukuphuu kuhae.

²¹ Ikehu AMPEU Alhou no Adam pelo zucheyivepe eno pano pa kuchughi lakhi ikhipheluve puzu tipau zaku jonhavetsue.

²² AMPEU Alhou no Adam launo akuchughi khikhi ikhilu keno tipau pesu totimi lakhi lhophetsu eno pa lau sasu ighitsue.

²³ Tile Adam no pi, “Hiye aghi ghi ighi ke, eno ashighi ishike. Totimi ipi kuniae, kughengu hiye timi launo ikhipeluke.”

²⁴ Tighenguno kiptimi lakhiye pa puaza qhiveno pa nipu sasu kughuna auve cheni eno pamaye ashi lakhi shive cheni.

²⁵ Pama akimi anipu kini kujo aphikumsae, ikemu kujokeu kuhae.