BOTHUBO 16 - BAIBEL (BSI)

Hagar ngo Ishmael

¹ Abram nipu Sarai no atianuli punu moe, liqelimi lakhi Hagar ache, liye Ijipmi ke.

² Sarai no Abram vilo pi, “AMPEU no ipelo atianuli punu pemono lakha vetsuae. Ike wupuzu iqeliu sasu ashiaji kuqha julo, ishi ake lino isala anuli punu tsuluvie.” Ike Abram no pa nipu Sarai tsa inive.

³ Ike Sarai no li qeliu Hagar, ti Ijip liu hu pesu Abram nipu amishiu shipenike tsuve. Tiye Abram no Kanan yeghilo ampe chighi acheuve kethiuno ke.

⁴ Abram no Hagar sasu ashi-aji kuqhae eno liye mishiuve. Hagar no mishiluve aghi kethiuye lino amipeliu Sarai thaighauve.

⁵ Tile Sarai no Abram vilo pi, “Ikipimi oshou ikughi peni. Oshouno imukhu lupeniu, iqeliu pesu otsuke lauye lino mishiluve kemtsa ijumthi thuvae. AMPEU pelo nikujo dolo kughathatsu peniu.”

⁶ Ike Abram no khochile pi, “Julo, oqeliu ke ogho shiwulo, li kughape opulou shiwulo.” Sarai no mughachhoi Hagar peitha kelono liye pove.

⁷ Ike AMPEU kungumi lakhino Shur lalo asakughutsu kumo qhalo azupuki akeu lono li phulue.

⁸ Pano pi, “Sarai qeliu Hagar, noye khilano cheni eno khilau wuniye kya?” Lino khochile pi, “Niye impeliu Sarai launo po cheni.”

⁹ Kungumino pi, “Omipeliu lau idewolo, eno noye aghokulu shi li gholo ngolo.”

¹⁰ Itaghi AMPEU wu kungumi no li vilo pi, “Ino oti kumzapushi kughukotsu nani,

¹¹ Noye anga opolo ani eno anu lakhi punu nani, paje Ismael ku-tsulo, kughengu AMPEU no okijikusa ghugha chiluvae.

¹² Eno onuye tughashi toi xu nani, paye kumtsu sasu kidimo nani, Eno kumtsuno pa sasu kidimo nani.” Paye asholokumi launo putosu ghi xu nani.

¹³ “Kuchono niye Alhou ithuluvemu ishi xuaghilu nani ke sha?” ipi lino pike. AMPEU no li putsa kehu paje, No Alhou no ijuthulue ipi ku-tsue.

¹⁴ Ikehu timino azukikhe tipau pesu “Iju thulukemu Xuaghikeu zukikhe”. ipi ku-tsue, eno tiye Kadesh ngo Bered kuma dolo anie.

¹⁵ Hagar no Abram lau anu lakhi punutsue, Abram no ti Hagar no anu punu tsukeu je Ismael ku-tsue.

¹⁶ Hagar no Ismael punu kelo Abram ye ampe lhotache tsugho shiae.