BOTHUBO 15 - BAIBEL (BSI)

Abram sasu Puloshoqhi shi

¹ Hipa tikhau AMPEU tsa kungunhetsu lono Abram lau ighino pi, “Abram, musa kevilo, ino oshokha kulupu zuto ke ino ojume ighono kije shitsuni.”

² Ikemu Abram no pi, “AMPEU Alhou, noye kiu itsuniepi ania, niye anu kuhake eno imheghi kiyighiuye Damaska no ghami Eliazer likhi keku?

³ Julepi, ixuthi piti nono tsumoe, eno iquaxemi ikilo no punukemino imheghi ighini chenie.”

⁴ Tile AMPEU no pa putsaghi ishi pi, “Paye omheghi ighi pemo nani, ikemu ophi lono ipeghi keu pitino omheghi ighi nani.”

⁵ Pano pasasu qhaghalei keu-alo saipe puzu pi, “Kunguu jupuku julo eno nono kihi kulupu aye ayepuqo kihi julo.” Pano pa vilo pi, “Opitiye tijejehi nani.”

⁶ Abram no AMPEU shou pulubeluve kehu Abram no pa pulubeluve keu tiye amikuchoe pi AMPEU no kihiluvetsue.

⁷ AMPEU no pa vilo pi, “Niye AMPEU ke, ino Khaldiami phughi Ur lono osasu ipeghi no aghakhu hipau otsu puzu ti omheghi shilupeniye ke.”

⁸ Tile Abram no pi, “O AMPEU Alhou, hipauye imheghi shilu nanipi kishino ino ithini kya?”

⁹ AMPEU no khochile pi, “Ilau hipaqo saghilo: amshi ali ampe kuthu shi akeu lakhi, anequ ampe kuthu shi akeu lakhi, bheri tsu ampe kuthu shi akeu lakhi, amqhi lakhi eno kobudar lakhi ishi.”

¹⁰ Ike Abram no lhoxu hipaqo kumtsu AMPEU lau peighi eno tipaqo amta lono xapha kututa shino lakhino lakhi shou kuqabe pe qhie, ikemu pano aghau kumaye xaphamoe.

¹¹ Agha aluno ashikumo shou yeikughi kelo Abram no hapupove ae.

¹² Tsukinhe iloni chekelo, zuqeyi keu lakhi Abram shou ighie, eno akumsa kimshipu kije lakhi pashou ighie.

¹³ AMPEU no Abram vilo pi, “Mtsuqheino hi ithilo, olaghaye kutami yeghilo inami shisusu wu nani, eno kutami qeuve nani eno ampe 400 kuto timino panongu kijipusa shikighime nani.

¹⁴ Eno panonguno qeniye akeu shiayeh hu ghi ino ghimeqhi nani, eno tipathiuno panonguye kuakini kumzapu pususu tipa yeghi lono ipeghive nani.

¹⁵ Ikemu noye alokughuno shi apu asuqo gholo wove nani eno kitemi shikutu kethiuno osukumo kutsuvetsu nani.

¹⁶ Tiqheli abidiu lono olaghano hile ideghi nani, kughengu ti kutolo Amarimi qono alhoksa shikeu ghenguno shikighime qhinikeu tomono aghini aphike.”

¹⁷ Tsukinhe ilove kethiu zughuyive kelo, amchhi kupho li lakhi eno akulu kughuqu lakhi ishi ipeghi puzu ashikumo xaphape puakeu muta zusu heche wuve.

¹⁸ Tipani no AMPEU no Abram sasu puloshoqhi lakhi shi ghi pi, “Ino hipau yeghi olagha tsunikeu shi anie, ti Ijipmi ghoki lono aghoki akijeu Eufrati kuto

¹⁹ eno timi hipaqo yeghi kumtsu: Qenimi, Qenizimi, Qadmonimi,

²⁰ Hatimi, Perizimi, Refami,

²¹ Amarimi, Kananmi, Gargeshimi ngo Jebusimi ishie.”