BOTHUBO 14 - BAIBEL (BSI)

Abram no Lot Hakholu

¹ Shinar lo akukau Amrafel, Elasar lo akukau Ariok, Elam lo akukau Khedarlaomer eno Goim lo akukau Tidal ishino

² kukami hipano pungu sasu aghu shie: Sodom lo akukau Bera, Gomora lo akukau Birsha, Adma lo akukau Shinab, Zeboim lo akukau Shemobur eno Bela lo akukau ti Zoar ishi.

³ Kukami hipaqo no Sidim qa tiye Amti Zughiqa lono panongu kuka kughojue.

⁴ Panonguye Khedarlaomer qholo ampe chighikini ache puzu ampe chighi akuthu-uloye hebide ipeghive.

⁵ Ike ampe chighi abidiu loye Khedarlaomer no kukami pagholo kuqhape akeqo sasu ighi puzu panonguno hipaqo leve: Ashterot-Karnaim lo Refaim akeqo, Ham lo Zuzimiqo, Kirithaim qalo Emimqo,

⁶ Seir naghutolo agha kughutsu kumo yeghi phivilo El-Paran kutolo Horimi aghikeqo ngo ishi.

⁷ Eno panongu hotsughu sasu Kadesh tiye Kughakutha Zupuki ipikeulo ideghi eno Amalekmi ye kumtsu leluve eno Xatsatson-Tamar lo Amarimi akeqo ghi leluve.

⁸ Tile Sodom ngo Gomora ngo Adam ngo Tseboim eno Bela lo kukami akeqono aghu shinike Sidim qhalo wo kumqo ngo puzu

⁹ Elam kukau Khedarlaomer, Goim kukau Tidal, Shinar kukau Amrafel eno Elaser kukau Ariok, ti kukami punguno bidi sasu aghu shie.

¹⁰ Eno Sidim qalo alkatra kuchhu khukino nha khaae eno Sodom ngo Gomora kukau noqono aghukishi lono poche kelo tile iluqi ilo eno kutamiye naghutolo polukhae.

¹¹ Eno kukami bidi huno Sodom ngo Gomora lo tinhemgha eno kuchukini aghikeu kumtsu puwuve.

¹² Panonguno Abram thikuzuu nu Lot khuu Sodom lo kughuna achekeno, pa eno pa nhemgha ishi susu wuve.

¹³ Ike tile timi lakhi kajo poighilu eno Abram ti Ibriu vilo pike. Amarimi Mamre thikuzuu Eskol ngo Aner ache, eno Abram no Mamre chine subo phivilo kughuna ache, eno panonguye Abram sasu xukuqhape ae.

¹⁴ Kughou Abram no pa bolomi huye lepusu wuvae pi chilukeno, pa gholo acheke lono punu kemiqo, aqemi shitsashi qophe puakeqo kumtsu kuqhakelo 318 aghu nanu pepipeno Dan kutolo kukamiqo hu haue.

¹⁵ Tile pa timiqo aqo kini shi puzu putho lono panongu le. Eno Damaska ahuu Hoba ipikeu kutolo panongu hasusu wue.

¹⁶ Pano tinhemgha kumtsu hakho sughie eno pa thikuzuu Lot ngo pa nhemgha totimiqo eno timiqo ghi sachile saghie.

Melkhizedek ngo Abram

¹⁷ Kughou Abram no Khedarlaomer ngo pagholo kukami akeqo sasu aghu shino toluve puzu idewo chekelo, Sodom lo akukauno pasasu kushoniye Shave qalo wue, tiye Akukau Luqa ghi picheni.

¹⁸ Melkhizedek ye Salem lo akukau shi ache eno Ighono Akiqheu Lhou wu achineu ghi shi ache, eno pano Abram lau asho ngo atsaiji peighi.

¹⁹ Pano Abram kumghatsu ghi pi: “Atsutsu ngo ayeghi lhokeu Akiqheu Lhou pelo Abram kumghatsu peniu!

²⁰ Opelo aghumiqo shou aghulo tolu peke, Ighono Akiqheu Lhou sheqhelo.” Eno Abram no pano kiu hakholu keno tipau lono chighi saje lo lakhi pesu patsue.

²¹ Tile Sodom kukauno Abram vilo pi, “Iwu timiqoye itsulo eno tinhemghaye nono lulo.”

²² Ikemu Abram no ishi khochile, “AMPEU, Ighono Akiqheu Lhou, atsutsu ngo ayeghi kipighiu zulono ino i-u peqhe ghi tushoqhi ani,

²³ ike niye ayeho tachu momu apukhukuqho kutsugha kighi mu lumoe eno niye ti onhemgha kiumu lumoe, khilehi nono, ‘Ino Abram pelo kinimi shilupeke,’ ipi pinosake.

²⁴ Ti apumi qono kiu chuveakela eno igholo wukemiqo sala likhi kumo aye niye kiumu lutsumoe; Aner, Eskol, Mamre ngo ishi pelo panongu saje lupelo.”