BOTHUBO 12 - BAIBEL (BSI)

Alhou no Abraham Kulu

¹ AMPEU no Abram vilo ishi pipua, “No ghakhu lono, no sholokumi launo eno opuno kibo lono noye chevelo eno ino opiyeni keu ghakhulo wuvelo.

² Ino otikughuko pesu shiyeh kije shitsunie. Ino okumghatsu puzu oje pipi tsunie, tishianguno noye kutami kumgha kutsuu shipeni.

³ Okumghatsu kemiqo ino kumghatsuni. Ikemu oghusho kemiye ino ghushoni. Ovechewo ayeghilo shiyeh kumtsu kumghalupe nani.”

⁴ Ikehu AMPEU no pavilo pike toi Abram no cheve eno pagholo Lot sawue. Abram no Haran qhiveno wuke ghulokilo paye apunu mpe lhotsuni pungu shiae.

⁵ Abram no panipu Sarai ngo pa thikuzuu nu Lot eno Haran lo akelo tinhemgha ngo aquaxemi khije pighiche keno kumtsu sasu Kanan lo wuniye cheve. Panonguno Kanan yeghi tokelo,

⁶ Abram ye Shekhem phu chine alo More chine subo toke kutolo aghakhu hechesu ighie. Tipa ghulokilo Kananmino aghakhulo ache.

⁷ Tile AMPEU no Abram lau peghino pa vilo pi, “Ino otikughuko tsuniye akeu ghakhu hu hike.” Ikehu tipa-alo Abram no AMPEU khuuno pa lau ipeghi keno tipau lau akumllagho kiptia lakhi shipe qhie.

⁸ Tipathiu Bethel phu kipela kudau naghutolo pano iqesusu wue eno Bethel no kulola kudau shi Ai phuno kipela kudau shi ghi tikuma dolo pa phikishipe qhie. Tipa-a loghi AMPEU lau akumllagho kiptia lakhi shipe qhino AMPEU mllae.

⁹ Abram no hule hile iqesusu apeu Negeb qha kudau wue.

Abram no Ijip lo Iqi

¹⁰ Tipa ghakhulo puqumiye ighie eno achuqupu ithumla mitheve kehu Abram ye apeu Ijip yeghi lo ado kitila ghenguno pokawuve.

¹¹ Ijip kupunuve puzu alughi katha iloni ye akelo pano panipu Sarai vilo ishipi, “Ino ithi ani, noye ighono ajukivi totimi lakhie,

¹² tighenguno kughou Ijipmi no oithuluni keno panonguno ishi pi nani, ‘Hiye pa nipu kena,’ ipi puzu ighiqhiveno osasu wuve nosae.

¹³ Tighenguno ino oqhuiniju ani ke noye ichepue pi pilo, tishianguno oghenguno ipuxu peni eno akivishi iheju penike.”

¹⁴ Abram no Ijip lughi bocholo iloghi kelo, Ijipmino panipu ye ajukivi kepi jukutouve.

¹⁵ Kijemi qono li ithuluve eno Farao vilo li jukivi pesu pi eno pawu akighikilo li sasu wuve.

¹⁶ Li ghenguno Farao no Abram akivishi heju eno bheriqo, aneqo, amshiqo, gadahaqo, aqemiqo eno kemel ngo ishi pesu patsue.

¹⁷ Ikemu Farao no Abram nipu Sarai luveke ghenguno AMPEU no kusukini kije pashou eno pakibo shou pukutsue.

¹⁸ Ikelo Farao no Abram ku puzu pi, “Noye ishou hiye kiu shivetsu ani kya? Kushiye liye onipu kepi ivilo pimo kya?

¹⁹ Kushiye liye ochepue pi ivilo pi puzu ipelo inipu shipeniye saluvepe kya? Onipu hi anike li saluvelo eno chevelo.”

²⁰ Farao no pawu timiqo ahza tsupuzu tipaqo pelo Abram ngo pa nipu ngo eno kiu aghikeno kumtsu sasu tipa ghakhu lono puwuve.