BOTHUBO 11 - BAIBEL (BSI)

Babel Ghukhea

¹ Atughuloye ayeghiqhalo atsa lakhie eno aphiphi shi kuptsalu cheke.

² Ike panonguno kipela kudauno iqesusu chekelo Shinar ghakhulo phijoleyi keua lakhilo ighilu, panonguye tilehi kughuna ache.

³ Panongu lakhino lakhi vilo ishipi, “Ighilo, ningu itatu mlape ami lono ghuni nolo.” Ikehu panonguno atu zuqhu itatu mla eno alkatra tano meda kepushi mlae.

⁴ Tileno panonguno pi, “Ighilo, ningu sala aphughi lakhi shi puzu tile aghukheano atsutsu toni keshi shini nolo. Eno ningu je haumo kepu shinie, ti kumoaye ayeghiqha kumtsu kathasusu ningu apanaghave nosake.”

⁵ Ikelo timi tipaqono mlakeu phughi ngo aghukhea ishi junike AMPEU no iqie.

⁶ Tile AMPEU no pi, “Julepi, timi hipaqo lakhi kehu eno atsa lakhi kehu panonguye hitoi shithuveni chenie. Hinguno hilauye panonguno kiu shiniepi kumsuluveni keno kiumu panongu launo suchile mlaveni chenie. Kiunomu panongu lakha luni chemoe.

⁷ Ighilo, ningu aqhou iqino panongu tsa kubangu vetsuni nolo, tishianguno panongu lakhino lakhi tsapi ithi pemonie.”

⁸ Ikehu AMPEU no tipa-a lono panongu hapesu ayeghiqha kumtsu apanagha puwuve eno panonguye aphughi hu shipisheve.

⁹ Tighenguno tipau-a pesu Babel ipi cheni, kughengu Ampeu no tilehino timiqo tsa kubangu vetsuke, eno AMPEU no ayeghiqha kumtsu shou panongu apanagha hapupove.

Shem Lagha

¹⁰ Hipaqono Shem ti kughukoqoe. Azuyimi ighikeu ampe kini thiu Shem no ampe 100 shiakelo panu Arpakshad lhoe.

¹¹ Arpakshad punu kethiu Shem ye ampe 500 xue eno atianuli kutau ghi lhoe.

¹² Arpakshad no ampe shighi pungu shi akelo Shela punue

¹³ eno Shela punu kethiu Arpakshad ye ampe 403 xue eno atianuli kutau ghi lhoe.

¹⁴ Shela no ampe shighi shi akelo Ibri lhoe,

¹⁵ eno Ibri punu kethiu paye ampe 403 xue eno atianuli kutau ghi lhoe,

¹⁶ Ibri no ampe shighi bidi shi akelo Peleg punu

¹⁷ eno Peleg lho kethiu paye ampe 430 xue eno atianuli kutau ghi lhoe.

¹⁸ Peleg no ampe shighi shi akelo Reu punu

¹⁹ eno Reu punu kethiu paye ampe 209 xue eno atianuli kutau ghi lhoe.

²⁰ Reu no ampe shighi kini shi akelo Serug punu

²¹ eno Serug punu kethiu paye ampe 207 xue eno atianuli kutau ghi lhoe.

²² Serug no ampe shighi shi akelo Nahor punu

²³ eno Nahor punu kethiu paye ampe 200 xue eno atianuli kutau ghi lhoe.

²⁴ Nahor no ampe mukutoku shi akelo Tera punu

²⁵ eno Tera punukethiu paye ampe 119 xue eno atianuli kutau ghi lhoe.

²⁶ Tera no ampe lhotsuni shive kethiu Abram ngo Nahor ngo Haran ishi lhoe.

²⁷ Hipaqono Tera tikughukoqoe. Tera no Abram ngo Nahor ngo Haran ishi lhoe. Haran no Lot papu ke,

²⁸ ike Haran ye papuh Tera no xuaphi lono pano Khaldiami ghakhulo Ur phughi lono thive.

²⁹ Abram ngo Nahor pamaye anipu luve, Abram nipu jeno Sarai eno Nahor nipu jeno Milka, liye Haran no nga eno Haran ye Iska papu ke.

³⁰ Sarai ye anuha kehu atianuli kuhae.

³¹ Ike Tera no panu Abram ngo pa ti-nu Lot, ti Haran no nu eno Abram nipu pamukishiu Sarai ishi sasu pa gholono Kanan ghakhulo wunike ghenguno Khaldiami yeghilo Ur phughi qhive. Panonguno Haran phu kutolo ighino tile kughunache.

³² Tera ye ampe 205 xu puzu Haran lono thive.