Apostolmi 4 - BAIBEL (BSI)

Pitor ngo Johan Hoho Zulo

¹ Pitor ngo Johan pamano timiqo sasu kuptsa ake lono achinemi ngo achineki khemi shou akijeu, Sadukimi ishi pama lau ighi.

² Apostolmi pamano Jisu akithi lono xuthuvekeu eno kithimi xuthughi nikeu vehu pesu timiqo vilo asheshu aghikeulo panongu mulo ideve.

³ Ikehu panonguno pama kughaluve eno thoghu tsala kutolo khakuthabolo suve, kughengu tipaniye avela shivekehu.

⁴ Ikemu pama tsa chilukemi kutomono pululuve eno kupulumi 5000 kutolo shi wove.

⁵ Tishiwo thoghiu Judami shou sakiphemi muchomiqo ngo Ayezah kukutsumiqo Jerusalem lo kuhokumqo.

⁶ Achinetou Anas, Kaifa, Johan, Alekzander eno achinetou bolomi kutamiqo ishi ae.

⁷ Ike apostolmi pama sawo panongu mtalo qhipuzu panonguno ishi iniju, “Nokujoye kiu kuka pesu momu khuu je pesu kishi hipau shilu ani kya?”

⁸ Tile Pitor no Aghungu Kimthe no chhitoi puzu panoqo vilo pi; “Timi sakiphemi eno muchomiqo,

⁹ akumla kivi apukhukinitavekeu lau shikeu, eno paye kishieno viluve keno ishitsalalo ningu vilo inijuani aye,

¹⁰ tishiaye nongu kumtsuno ithilo eno Israilmi kumtsuno ithilo. Ike, Nazaret noghami Jisu Khristo khuu nonguno yedave ikemu Alhou no akithi lono xuputhuvekeu, pa je kuka pesu timi hipau vithayiluvepe puzu nongu zulo puthugho anie.

¹¹ Kuchoyesulo ishi pipuakeu huye Jisu pianike. ‘Atuqu khikhi nongu akikishimino kileve keno tino kumtsu nguno atsukupuu tuqu shiaghive.’

¹² Xakulupuye palikhi vechewo ithulu nani, kughengu ayeghiqha kumtsulo ni-xakulupu aje hinguno kutau Alhou no timi tsupe puamoe.”

¹³ Judami Hoho lo kuho akemiqono Pitor ngo Johan pama mulo kuloghi ithulu eno pamaye kighithimi kumo puzu kutami paphiepikeu ithi puzu panonguye akichiqhive. Eno pamaye Jisu gholo cheche kenapi panonguno michiluve.

¹⁴ Ikemu panonguno ngukukepu pikulupu kiumu kuhave, kughengu timi vithayiluvekeu hu Pitor ngo Johan pama gholo tile puthugho akeu panonguno ithuluae.

¹⁵ Ike panonguno pama vilo Judami Hoho ki lono tsughu ipevelo pive puzu panongu dolono kuptsa ghi pi,

¹⁶ “Ninguye timi hipaqo pesu kiu shiveni kya? Kughengu pakutakeu michipu panoqo vechewo shikeu Jerusalem lo kuami kumtsu lau tovae eno ninguno mikimlavae.

¹⁷ Ikemu timiqo gholo hipau vehu alau vekuphawo pemoni keke ninguye hipaqo vilo Jisu je pesu khilemu timi vilo pikevilo pi kichivenie.”

¹⁸ Ikehu panonguno pama kuchile eno Jisu je lono khilemu timi kutsu eno timi putsa kevilo pi.

¹⁹ Ikemu pamano panoqo khochile, “Nongu gholukepu keo Alhou gholu kepu keno khikhiuno Alhou zulo achipiu keno nongu likhi nonguno kughathaju alo.

²⁰ Kughengu ninguye nino kiu ithulu eno chiluveakeno pimono amlavae.”

²¹ Panonguno agho shi pama shikichi puzu pama phepuwuve. Panonguno aghime pama tsukepu akiqi phumlave, timiqo ghenguno, kughengu ti akumzapu kumla shikeu ithulu puzu timi kumtsuno Alhou sheqhe ae.

²² Timi khuu shou hi shipivikeu michipu shitsukeno apunu mipe lhobidi shou shivekemie.

Kupulumiqono Inikhu

²³ Panongu phepuwuve kemtsa, Pitor ngo Johan pama no aqomi lau ighino achinetomi ngo muchomiqono pama vilo pikeu lhepesu pi.

²⁴ Kughou panonguno ti chilukeno panongu kumtsuno ighamuku Alhou vilo inikhughi pi, “Kumtsu qhasupe akeu Mipeu, atsutsu ayeghi ngo azughi eno tipaqolo akeu Lhou!

²⁵ Aghungu Kimthe pelo nisu oqeu David vechewo nono pa pelo ishi pipeke: ‘Kushiye Judami Shiayeh kumomiqoye muqhumuza akhani; kushiye timiqoye adou lono kuchughu akhania?

²⁶ Ayeghilo kukamiqono kutope ighi eno ayehkipemino kuhokumqoe— Ampeu eno pawu Mesiya sasu shiniyeke.’

²⁷ Kuchouno aphughi hipaulo Herod ngo Pontio Pilat pamano Judakumomi eno Israilmi sasu kuhokumqono akimthe oqeu Jisu nono Khristo shivetsukeu shou akumou shie.

²⁸ Nono azunatha ghi kiu shi nanikeno kughupe puakeu tipau shinike panonguno kumtsa kumqoe.

²⁹ Ampeu, panonguno ningu shikumsa akeulo jupuku tsulo, eno ningu oqemiqo pelo amlo kuloghi lono otsape shilupelo.

³⁰ O-u chhope shipivitsu, eno akimthe oqeu Jisu je vechewo akumzapu eno amchipu shiphelu pelo.”

³¹ Panonguno inikhu tavekelo, panonguno kuho akeu-a sukinie. Panongu kumtsu Aghungu Kimthe no chhilu eno amlo kuloghi shi Alhou tsape shie.

Thwokha Kumtsu Aqu

³² Kupulumi muqoye amlo akukumsu lakhi. Milakhimu pano kiu pighi aghikeno tiye pawu kepi pimoe, ikemu panonguno aghikeu kumtsu pesu aqushi kusajeche.

³³ Akuka kumtoshi apostolmino Ampeu Jisu xuilethughive keu shepe tsu, eno Alhou no panongu shou shishe kumghatsu.

³⁴ Panongu gholo khumu kiumu kuhamitheve keu shimo, kughengu panongu gholo aki-alu pighimiqono tipaqo jeve eno jelukeu pisa pesuwo

³⁵ apostolmi ulo suvetsu cheke; eno pisa huye khuuno kiu avehupu shiaghi nikeno tipau kiqi lono kijetsu che.

³⁶ Ikehu Levi laghami lakhi Josef ipikemi Kupra noghami, khuu je apostolmiqono Barnaba kukithevetsu keno (tipau kiqiye timi shikumtokutsu-u).

³⁷ Pano pa lu lakhi achekeu jeve eno jekulu pisa pesuwo apostolmi ulo suvetsue.