Apostolmi 3 - BAIBEL (BSI)

Apukhu Kinitavekemi Shipivi

¹ Ghulo lakhi Pitor ngo Johan pamaye avelau ayi kuthu kihe kighini dolo achinekilo iqhoche.

² Timi lakhi aza polono apukhu kinitavekeu Jukivi Khagho ipichekeulo tsalakipetsu xapuwo qhino achinekilo ilochekemi vilo pisa khuchu chepe.

³ Pitor ngo Johan pamano achinekilo ilocheghi keu ithulu kelo pama vilo pisa khu.

⁴ Pamano anhethi sukuqumono pa juno Pitor no ishi pi, “Nikujo julo!”

⁵ Ikehu pama launo kiuala ithulu nani kepi huqheghi tilau jupuwoe.

⁶ Tile Pitor no pi, “Nikujoye shuna mu tsandi mu kuhae, ikemu nino kiu ani keno ti otsuni, Nazaret noghami Jisu Khristo je lono noye alachelulo!”

⁷ Tishino pa-u ajeu tsuqupe puzu pa sunheputhu. Paikhavino timi pukhu ngo alaunhe mtotoive.

⁸ Pano ilhethughi puzu puthugholuve eno cheqho-cheqi, ilheku-ilheqi puzu Ampeu sheqhe ghi pama sasu achinekilo ilove.

⁹ Timi kumtsuno pano cheqho-cheqi eno Alhou sheqhe akeu ithulu;

¹⁰ eno timiqono paye achinekilo Jukivi khagho philo khuchu achekeu kena ipi mtsuqhei michiluve kethiu pa lau kiu shivetsu keapi panongu kumtsu akichiqhi eno akumzaqhiyive.

Achinekilo Pitor Tsapi

¹¹ Timi huno Pitor ngo Johan pama sunhepe akelo timi kumtsuno akichiqhi kelauno panoqo lau posu Solomon kisheqho ipichekeulo ighi.

¹² Kughou Pitor no ti ithulukeno, pano timiqo vilo pi, “Israilmiqo, nonguye hi jupesu kushiye akichiqhi eno kutuxoxo niju ani kya? Nonguno kumsukeuye nilikhi nikuka momu nikuxu kimthe pesu timi hipau pelo alachelupe ani kughashi kesha?

¹³ Abraham, Isak eno Jakob Lhou, nipu-asu Lhou huno pa qeu Jisu akimthe jekipipu shive tsuae. Nonguno ayehkipemi ulo pa phesuvetsue, Pilat no pa phepuwuveniye kughathave kemu nonguno Pilat zulono pa miliveke.

¹⁴ Paye akimthe eno akivi, ikemu nonguye pa milive eno heqhi buqhikemi lakhiu kuqhophetsu lopi nonguno Pilat vilo khu,

¹⁵ eno nonguno akuxupu Mpeu pithiveke. Ikemu Alhou no akithi lono pa xaputhuve eno ninguye tipau thopimike.

¹⁶ Pa je kuka huno apukhukinitavekemi hipau akumto tsue. Nonguno ithulu eno ithiveake hi shiluakeu huye pa jelo pulubekeu lonoke, eno Jisu vechewo akupulu akeuno nongu kumtsu zulo timi hipau thai shipivivae.”

¹⁷ Ike ithikuzumiqo, ino ithi anike nongu eno nongu wu sakiphemino Jisu shou kiu shikeno tiye mbomzu lonoke.

¹⁸ Alhou no paw tungkupmi kumtsu pelo azunathaghi pipuakeuno pawu Khristo ye aghime sholu nikeu shiakeu hu Alhou no ti shikupuvetsuae.

¹⁹ Axine lono xaideghilo eno Alhou lau tsughu ighilo, tishianguno pano nongu xineqo pevetsu nani,

²⁰ tishianguno Ampeu no sachekeu lono azupuvu kepu do ighipeni eno pa pelo nongu wu Mesiya kishepuatsu keu Jisu hu puwu peni.

²¹ Alhou no puzuuno pawu tungkupmi pelo azunathaghi pipuakeu toi, thwokha shikithe chilemoke kuto paye kungughalo aghimasae.

²² Kughengu Muse no pivae, “Ampeu nongu Lhou no nongu lau tungkupu lakhi nongu thikuzumi gholono itoike ipeghipe nani. Pano kiu pinikeno nonguno pa tsa inimasae.

²³ Khunono tungkupu tipauno pikeu inimoni keno Alhou wu timiqo launo kututa shipesu pughave nani.”

²⁴ Samuel lono huthu susu pa thiu tungkupu khijeno tungkuptsa pichekeno kumtsuno ishi thoghi vehu pipuakhanie.

²⁵ Alhou shoqhi pawu tungkupumi vechewo akeu huye nongu salake, eno Alhou no nongu pu-asu sasu puloshoqhi shikeulo nongu ghi kusajekemie. Pano Abraham vilo pikeu toi,”Otikughukoqo vechewo ayeghilo timi kumtsu ino kumghatsunie.”

²⁶ Ikehu Alhou no pa qeu kishepe atughushi nongu lau puwuke, eno nongu lhoksa kugha lono saide sawo kumghatsuniyeke.