Apostolmi 26 - BAIBEL (BSI)

Paul no Agripa Zulo Pi

¹ Agripa no Paul vilo pi, “Noghi olikhi oshelo pikulupu atuqhudo kivi tsuanie.” Paul no pa u pesu chho ghi hitoi pa likhi pa shokhakeu shi:

² “Akukau Agripa! Ishi niye angukivi shilu aniepi ilikhi ino kumsulu ani, ike tiye kutau kumono ozu lono Judamiqono inguku akeu kumtsulo ilikhi ishokhalukeu shiluni cheni.

³ Kughengu kuchouno nono Judamiqo khuayeh eno muto achekeu kumtsu hoshe hola ithi ani, tighenguno itsa initsunimapi ino oqhuiniju ani.”

⁴ Judami kumtsuno ino apumi shi aphi lono kishi xu acheni keno ithi ani. Inahuu nomu panonguno ithi anike, niye niyeghilo eno Jerusalem lono ikuxu kuchopu xuighivae.

⁵ Panonguno ado kushuwa lono ithi acheni, panonguno ashepe shitsunikeu pulo aghi aye, ike inahuu nomu niye ni-chinelo tsatsai mla itha chekemi, ti Farisimi muqo gholo ampemi lakhi shi ghi xuighivae.

⁶ Itehi niye hile puthugho puzu ishou atsa kugha apekeuye Alhou no nipu asu lau piqhikeulo ino lajukeu akeu ghenguno ke.

⁷ Ike tipau piqhi puakeu ithulu kepushi ni shiayeh chighikinino amlo tsuqhiyi putho pucho Alhou mlla achenike. Hipau lakuju ghenguno Judamiqono inguku anie, o Akukau!

⁸ Nongu gholo khuu khumu Alhou no kithimi xuputhukeulo kushiye pulumlano acheni kya?

⁹ “Ni ampi ghi kumsuche keuno Nazaret noghami Jisu je mujochile kepushi ino shiluke thaqhu shimasa kepi acheke.

¹⁰ Ikehu ino Jerusalem lo hishi shiche. Achinetomi launo ahza lupuzu Alhou wu timi kutomo akughukilo sunhesuke likhi kumo puzu kughou panongu pithiveni keu tsa xathani keno nighi tipaulo pulobe sutsuche.

¹¹ Ghuthu kutomo Sinagog kumtsulo ino panoqo ghimeqhiche, eno panongu kupulu lono ideilevepeniye pukaputsa che. Panoqo shou axu ide kelauno kutami phughiqolo thotsu panoqo shikighime nike ino wue.”

Paul no Xukithe kulu Pi

¹² “Ike Alhou timiqo shikighimeni keu kimiji lono ino achinetomi launo ahza lu eno puwuakeu shi-ghi Damaska lo wue.

¹³ O Akukau, pucho-mugholo alalo chekelo atsutsu lono akuvu lakhi ino ithulue, tiye tsukinhe kuvu nguno vuqaikeu, eno tino isuhope yeluve, eno igholo chekeqo veho yeluve.

¹⁴ Kughou ningu kumtsu ayeghilo iluqive keno, asutsa lakhino Ibrimi tsauno iputsakeu ino chilu, ‘Saul, Saul! noye kushiye ighimeqhi cheni kya? Ashulo pusu pukuni keuye oghenguno kumsapue.’

¹⁵ Ino ishi iniju, ‘Ampeu,no khuu kya?’ Ikelo Ampeu no ishi pi, ‘Nono ghimeqhi akeuhu ni Jisu ke.’

¹⁶ Ikemu ithulo eno opukhu ne suqhelo. Okugha pesu iqeu shipenike niye olau ipeghipiyevae. Nono ishi kishi ni ithulu keno eno ithuluni keno pesu kutami vilo pi masae.

¹⁷ Israilmi eno Judakumomi launo ino oxaphelu nani, tipaqo lau ino opuwu anike.

¹⁸ Noye panongu nhethi xukhotsu masa eno akuzu lono akuvulo panongu saghilo. Satan kuka lono Alhou lau saghilo, tishianguno panonguno ipulubekeu vechewo panongu xine pevetsu nani eno shikimtheluvemiqo gholo panongu-a phulu nani.”

Paul no Pa Kumla Pi

¹⁹ Ikehu, O Akukau Agripa! niye atsutsulo kungunhetsu hu hebideve moe.

²⁰ Ikemu atughushi Damaska, Jerusalem, Judia ghakhu kumtsulo eno Judakumomi gholo ino asheshue. Panongu xine qhiveno Alhou lau xaideghi luve keu kumla mlape piyelo pi ino asheshue.

²¹ Hipau vehu ghenguno Judamiqono ino achinekilo ake lono itsuquluve eno ipithiveniye pukaputsae.

²² Niye ishi tsala kutolo Alhou launo ighikeu kukuphu lono hile puthughono kijemi vilo eno kitilami kumtsu lau ishepe tsulu ani. Ino pi akeuye tungkupmi eno Muse no shini pi piqhipuakeu shikupu anike.

²³ Ike ti Khristo ye aghime shimasa, eno akithi lono xuthuvekeulo atughiu shinikeu shi, pano Israilmi ngo Judakumomi lau xakulupu kuvu pithipuwu nikeu shie.

²⁴ Paul no hitoi pa likhi pa shokhakeu tsa pi kelo, Festa no asutsa akumgha shi-ghi pa vilo ishi pi, “Paul, noye izuphokicheyivae. Okighithi kighiche huno opelo izuphokicheyivae.”

²⁵ Ikemu Paul no pi, “O akiqheu Festa, niye izuphokicheyi amoe, ikemu ino piakeu tsa huye kuchou eno tsaqutsaleyi keue.

²⁶ Akukau Agripa. Nono hipaqo vehu kumtsu ithi anike ghenguno niye ighumono ovilo pi ani. Ino mutsuqhei jukelo hipaqo vehu lakhimu nono muthakeu kumoe, kughengu hiye acheku lakhi lono shike kumoe.

²⁷ Akukau Agripa! Noye tungkupmi pulu chenima? Ino ithi anike noye pulu cheghi nani!”

²⁸ Tile Agripa no Paul vilo pi, “Hi ikhoneike dolono noye ipelo Khristomi shiluvepe nike kumsu ani kesha?”

²⁹ Paul no khochile, “Ado ikhonhe shiaghina kushuwa shi aghinamu, ikukhu ikighiniye no eno hi nongu khunoqomi ishi itsa ini akemi kumtsu hi ayikichhe ghengu kumoni thono niye kiutoiluvea keno tishiluve penishi !”

³⁰ Tilehi Akukau, Ahng Bernika eno tile akemi kumtsu puthughove.

³¹ eno panongu ixawo chekelo lakhino lakhi vilo ishi pi, “Timi hipauye akithipu ke kumono akughu mu shikepu kiumu mla puamoe.”

³² Ike Agripa no Festa vilo pi, “Timi hipauye pano Rom kukau Kaisar launo pa tsakugha xathani keu khumono aghike aye pa kuqhopheve kepushi anie.”