Apostolmi 23 - BAIBEL (BSI)

¹ Paul no anhethi mu sukuqumono Ahohomi jupuzu ishi pi, “Athikuzumiqo! Niye ishi kutolo Alhou zulo ikukumsu mutsumishei shi-ghi xuaphie.”

² Tileno Achinetou Anania no Paul phivilo puthugho akeqo vilo pakichilo ghatsulo pi ahza tsu.

³ Ikelo Paul no pa vilo pi, “No ashou likhi metsughoi nudapusu akeu tozu! Alhou no oghaqhi nanike. Noye Ayehtsa kiqi lono ishou kughathabeniye tile iqa pula-ghi Ayehtsa hebideghi panoqo vilo ihelo pi ahza tsu ani!”

⁴ Tipa holo puthugho akeqono Paul vilo pi, “Noye Alhou wu Achinetou thaighani kesha?”

⁵ Tile Paul no pi, “Athikuzumiqo, paye Achinetou ke pikeu niye mthakehue, kughengu kuchoyesulo yepuakeuno, ‘Nowu timiqo shou ayehkipemi vilo noye alhoksa tsa pikepu kumoe.’ ”

⁶ Ikemu Paul no jupuwo kelo timiqo dolo khamino Sadukimi eno khamino Farisimi shiakha kehu, pano Ahoholo ishi asheshu thuve: “Athikuzumiqo, niye Farisimi lakhi, eno Farisimi nu lakhi ke; hile ishou atsa kugha akeu hipauye kutau lono kumono kithimiye xukithethu shiluve naniepi ino lakuju akeu ghengunoke.”

⁷ Pano hi pive kemtsa, Farisimi ngo Sadukimi dolo mutokeu ipeghive.

⁸ Kughengu Sadukimi no pichekeuno timiye akithi lono xuputhumo nani, eno kungumi momu aghahwu kuhaepi piche. Ikemu Farisimi ye hipano kuthu kujo aniepi piche.

⁹ Ikehu mutomushukeu kije lakhi ipeghive, eno Farisimi mqo kudaumi gholono ayehtsa kukutsumi hamino puthugho ithu puzu hiye ighono kumo kepi pithu, “Ninguye timi hipau shou akipimi kiumu phumlae! Kutowomu aghahwu momu kungumi lakhino pa putsapuani keniae. “

¹⁰ Muto-mushukeu mugha kithe ikuveno timiqono Paul kughapesu suthapiniyi venosakeu zahtsuuno msave. Ikehu ghushimiqo vilo iqino timiqo launo angukamu vesuno Paul sasu ghushimino ngochekeu bocholo saghivelo pi ahza tsu.

¹¹ Tipaji Ampeu no Paul phivilo puthughono pi, “Omlo kumto shilulo! Jerusalem lo nono ishepe shitsukeu toi, Rom lo ghi noye ishepe shitsu masae.”

Paul Kuxu Luvetsunike Kumqu

¹² Kughou atsala ipeghive keno Judami no kuhokumqo puzu kuchughukeu lakhi pughu. Panoqono alikhi ashou ashoqhi shi puzu panonguno Paul pithive moke kuto achuqupu chu shomo nikeu shi.

¹³ Timi lhobidi shouno kumtsa puzu hipau muqu pughu.

¹⁴ Timi tipaqo no achinetomi eno kichimiqo lau wuno pi, “Ni likhi ni shou ashoqhi shibe pesu qhivae, ike ninguye Paul pithive moke kutolo achuqupu michemo nikeu shivae.

¹⁵ Ike itehiye nongu eno Ahohomi no zahtsuu lau asutsa puwu puzu Paul nongu lau saiqighi pelo, nonguno pa vehu kishekulushi kughathaju nishi aniepi keu muqu vesulo, pano hilau ighimiphi lono ninguno kutopesu pa pithivenike.”

¹⁶ Ikemu kuchughu pesu akeuhu Paul chepu nonuno chiluve, ikehu pano ghushimi achekeu bocholo wupuzu Paul vilo tipau pive.

¹⁷ Ikelo Paul no ghushimi 100 shou akijeu lakhi ku puzu pi, “Apumi hipau zahtsuu lau sawulo, pa vilo kiukeno pano pikepu shi anike.”

¹⁸ Akijeuno apumi hu sasu wuve eno zahtsuu lau saghi puzu pi, “Paul akughu shiakeu huno iku puzu ivilo apumi hipau olau sawutsu lopi inijue, kughengu hipauno ovilo kiuala pikepushi aniepike.”

¹⁹ Zahtsuu no apumi hu auno valuve puzu vekutsughulo ighowo puzu pa vilo iniju, “Noye ivilo kiu pikepushi ani kya?”

²⁰ Pano pi “Judamiqoye kuqhaluvea puzu ovilo thoghiu Ahohomi zulo Paul saiqighi penike no inijunikeu shiani, eno pa ghili kishekulushi kighinikile junie pikeu shi amqu shi ani.

²¹ Ikemu panoqo tsa initsu kevilo, kughengu timi lhobidi shouno itshu puzu pa kheaghinikeu shi ani, panongu likhi panongu kumtsuno ashoqhi shipesu akeuno Paul pithive moke kutolo chu shomo nikeu shi ani. Panonguye ti shiniaye kutope ani eno nono kiu pinikeno ti khe ani.”

²² Ike zahtsuuno pa vilo, “Ivilo hipau pithivae pikeu tsa khuu vilomu pikevilo,” ipi pi puzu apumi hu puwuve.

Feliks Ahng lau Paul Puwuve

²³ Tileno zahtsuuno ghushimi 100 shou akijeu mikini ku puzu pi, Itiji ayi toku kihelo ghushimi 200 kutolo eno tipa gholo khurshilo ikukemi ghushimi lhotsuni eno angupekemi ghushimi 200 ishi Kaisaria kutolo wukepu shilo.

²⁴ Paul pelo ikupekepu khurshi hami kutotsulo eno akivishi pa khesawo ahng Feliks tolo.

²⁵ Tishieno zahtsuuno hipa vehu ghenguno yekili lakhi hitoi yeh:

²⁶ “Klaudia Lusia no panguno Akiqheu, ahng Feliks lau petha tsu ani,

²⁷ Timi hipauye Judami no tsuquluve eno panoqono pa pithiveni cheghike lono ino ghushimiqo sawo panoqo gholono pa xaphelu kughengu ino phuphelukeuno paye Rom ghakhumi lakhi shiaghi kehu.

²⁸ Eno kiu ghenguno pa nguku ani keno ithinishi kelauno, panoqo wu Ahoholo ino pa saiqike.

²⁹ Ino phulukeuno pa kughape pithivekepu momu akughu shikuzupu kiumu shipuaghi moe, ikemu panoqo yehtsa vehu ghenguno pa ngukuakeu ke.

³⁰ Judami no pa pithive nikeu kuchughu pesu aniepikeu ipithi kelo mtazu olau pa puwuvenikeu shive. Ino pa nguku akeqo vilo ghi ogizu lono pa shou pikepu aghikeu lhelo pivae.”

³¹ Ikehu ghushimiqono ahza panongu tsupuakeu toi Paul salu puzu pa sasu tipajino Antipatris kutolo sawu.

³² Thoghiuye apukhuno chechekemi ghushimiqoye pano bocholo idewove eno khurshilo ikukemi ghushimiqo pelo pa sasu wupenikeu shive.

³³ Ghushimi tipaqono Kaisaria kuto Paul sasu wu eno yesu hu pesu ahng tsu puzu pa zulo Paul sawo qhitsu.

³⁴ Ahng huno yekili phiju apuzu Paul vilo paye khuno kokutha ghakhu lono ighi kyapi iniju. Kughou paye Kilikia lono ighikemi pikeu chilukeno,

³⁵ pano ishi pi, “Kughouno onguku akeqo ighinikeno tileno otsa initsuni.” Tishieno Paul ye Herod kighikilo aghukheu pelo khe penikeu shi pano ahza tsuve.