Apostolmi 22 - BAIBEL (BSI)

¹ “O timiqo o athikuzumiqo eno o apunoqo, ino nongu zulo ilikhi isaphukeu tsa pinike inijulo.”

² Kughou pano Ibri tsauno pikeu panonguno chilukeno, alaushi iqunei kitheve. Tile Paul no ishi pi;

³ “Niye Judami lakhi, Kilikia ghakhulo Tarsus phu lono punu kemi, ikemu Gamaliel qholono kiphimi lakhi shi-ghi Jerusalem phughi hipau lono saputhue. Nipu asuqo yezah ghola akuthou lono ishika puthu, eno nongu ishi hile akemiqo kumtsu hutoi Alhou ghenguno azukini shi ache.

⁴ Timi khunoqono hipau Laghi pape cheghini keno thimoke kutolo ino shikighimeqhi cheke. Kiptimi na totimi pinamu ino kughasuwo akughukilo sunhesuve cheke.

⁵ Achinemi Atou eno Judami Hoho kumtsuno kuchou pi anikepi thopi shilu nani. Panonguno Damaska lo Judami athikuzumi akeqo lau yesu hekeu ino khulue. Ipuzu tilau timi hipaqo aghikeqo Jerusalem lo tshu sasu ighino aghime tsuniye niye Damaska lo wue.”

Paul no Xaidelukeu

⁶ “Kughou ino Damaska lalo chekeno eno tipau phughi kupununi chekelo, pucho-mugho holo paikhavi akuvu kije lakhi atsutsu lono isuhope ighuchheqhi.

⁷ Niye ayeghilo iluqiveno asutsa lakhino ivilo ishi pikeu chilu, ‘Saul, Saul, noye kushiye ishikighime cheni kya?’

⁸ ‘Ampeu, no khuu kya?’ ipi ino iniju kelauye pano ivilo ishi pi, ‘Niye Nazaretmi Jisu, nono shikighime akeu huke.’

⁹ Ike timi khunoqono igholo chekeno akuvu hu ithulu ikemu panonguye iputsa akeu sutsa huye chimlae.

¹⁰ Tile ino pi, ‘Ampeu, niye kishini kya?’ Ike Ampeu no ivilo ishi pi, ‘Ithu puzu Damaska lo ilolo, eno opelo shipeniaye kughupe puakeu kumtsu tilano ovilo pitsu nanike.’

¹¹ Akuvu huno inhethi ghuchhevetsu puzu niye kumu ithumlave kehu, khunoqono igholo chekeno tipaqono iulono sunhepe sasu Damaska lo ighi.

¹² “Anania ipikeu, Ayezah kiqi lono achineyeh kudau amlo tsuqhiyi, eno Judami kumtsuno pipivi chekemi lakhi tipa phughilo ache.

¹³ Pano ilau ighino iphivilo puthugho puzu ishi pi, ‘Athikuzuu Saul, onhethi xukholulo!’ Tipa mtsa inhethi tsukholuve eno pa lau jupuku.

¹⁴ Ikelo Anania no ishi pi, ‘Nipu asu Lhou no okothaphelu puzu pa pulou ithilupe, Amikuchomi hu ithulupe eno pa ampino putsakeu chilu ishi peke.

¹⁵ Kughengu nono kiu ithuluvea eno chiluvea keno tipau pesu timi kumtsu vilo pa ghenguno ashepeu shiniae.

¹⁶ Ike noye kiu khe ani kya? Ithu puzu paje lono baptiz shiluveno oxineqo qhuvelo.’

Judakumomi lau Paul no Atsakiviu Pikulha

¹⁷ “Ino Jerusalem lo idewoveno achinekilo inikhu akelo niye kungunhetsu lakhi ithulu,

¹⁸ eno Ampeu ithulu puzu pano ivilo ishi pi, ‘Papashi kutolo eno Jerusalem lono mutazu wuvelo, kughengu nono ishepe shikeu panonguye ikhilutsumo nanike.’

¹⁹ Ino ishi khochile, ‘Ampeu, Sinagog atsu-tsulo khunoqomino opulucheghi keno tipaqo ino kughape akughushi eno heqhichekeu Jerusalem lo kuami panongu ghi ithi akhani.

²⁰ Kughou oshepekishiu Stifan pithi akeno nighi tile ae eno achipishi aniepi pulokuqha tsuae, eno pa pithikemiqo phimini hekutsu kiyi tsuae.’

²¹ Ikelo Ampeu no ivilo ishi pi, ‘Chevelo, kughengu Judakumomi lau aghachelo ino opuwuni.’ ”

²² Paul no hipike kutolo timiqono pa tsa initsu, ipuzu tithiuye panonguno ighamuku pi, “Timi hikithipu ayeghilo qhikevilo! Timi hikithipuye puxukepu kumoe!”

²³ Timiqono shisheno ighamuku eno panongu phimini kuthopiye eno ayeghi epe kunguu vepuku ae.

²⁴ Rom ghushimi shou zahtsuuno Paul sasu ghushimino achekeu bocholo saghilo pi ahza tsu, eno pa ghaqhi puzu inijukidekudajulo pi ahza tsu, tishianguno timiqoye kushiye pa shou hitoi ighamuku anikeno akiqi ithinishi kehu.

²⁵ Ikemu panonguno pa ghaqhiniye tshuve kelo, Paul no akijeu tile puthugho aghikeu vilo ishi pi, “Hiye oghenguno ayezah kiqi lono shianikemo keno, noye Rom ghakhumi lakhi shou kiu tsamu kughathaju mphi lono pa ghaqhini kesha?”

²⁶ Kughou akijeuno ti chilukeno pano zahtsuu lau wupuzu pa vilo ishi pi, “Noye hiye kishini cheni kya? Kughengu timi hipauye Rom ghakhumi lakhie.”

²⁷ Ikehu zahtsuu no Paul lau ighi puzu iniju, “Ivilo pijulo, noye Rom ghakhumi kesha?” Paul no “Iye” ipi khochile.

²⁸ Zahtsuuno pi, “Niye pisa kutomo puwo puzu hipau ghakhumi shikulupu qhulue.” Paul no khochile pi, “Niye Rom ghakhumi shi ipunue.”

²⁹ Ikehu khunoqono Paul vilo inijukide kudajuniye akeno palauno zuyi tsughuve, Paul ye Rom ghakhumi puzu pa kughape tshukeu kumsukutoju puzu zahtsuu ghi msave.

Paul Judami Hoho zulo Wukeu

³⁰ Judami ye kiu ghenguno Paul shou mopi akha keno akiqi kumtsu zahtsuuno ithivenishi kehu tshupuakeu Paul kuqhophevepe, eno achinetomi ngo Judami Hoho ishi kusholopi ahza tsue, tishi puzu pano Paul sasu iqighino panongu zulo qhi.