Apostolmi 19 - BAIBEL (BSI)

Paul no Efesia lo Akeu

¹ Kughou Apollo no Korinthia lo akeno Paul ye aghakhu ahu-u kudauno chesu Efesia lo ighi. Tile pano kupulumi khami sasu kusholu.

² Panongu vilo ishi iniju, “Kughou nonguno pululu keno nonguye Aghungu Kimthe ithulu kema?” Panonguno khochile pi, “Aghungu Kimthe anie pikeu ghi ninguye khilemu chimla aphie.”

³ Ikelo Paul no pi, “Nonguye kiulo baptiz shisulukeno kya?” Panonguno pi, “Johan no baptiz shitsu chekeulo!”

⁴ Paul no pi, “Johan no baptiz shitsu chekeu huye timi khunoqono xukithelu akeno tipaqo ghenguno ke. Pano timiqo vilo pichekeuno, pa thiu milakhi chekeu shou pulubelo picheke, ike tiye Jisu pi ake.”

⁵ Kughou panonguno hipatsa chilu keno Ampeu Jisu jeku ghi panonguye baptiz shiluve.

⁶ Kughou Paul no panongu shou pa-u chhopesu kumghakeu bekeno Aghungu Kimthe panongu shou ighi, eno panonguno amili kithe lono pi eno tungkup-tsa ghi pi.

⁷ Panongu kumtsu kelo tile timi chighikinia kutolo ae.

⁸ Paul no Sinagog lo wuno aqhi kuthu kutolo amlo kumto shi timiqo putsa, kutsalajukeu eno mutsumishe ithilu penikeu ghola peitha puzu Alhou yehkipe ghili pikulhae.

⁹ Ikemu panoqo gholo khamiye amlo tsatsayi auveno pulutsumo eno aqo zulono Ala hipau lhoksa pie. Ikehu Paul no panoqo qhiveno kutsukulumiqo kutashi pa gholo kuho, eno tsalakipetsu Turanus Hoho kilo kumqono kuptsache.

¹⁰ Ampe kini kutolo titoi shi ache, ikehu Asia yeghiqhalo Judami ngo Grikmi achekeqo kumtsuno Ampeu tsa chilue.

Skiva Nuliqo

¹¹ Paul vechewo Alhou no muzamghaleyi kepu michipu shishe shilupe.

¹² Kughusuphi momu aphimini pa phi-mpi dilu puaghi keuhu timiqono pesuwo khunoqo su aghini keno tipaqo lau pewu, eno tipaqo kusu shipuhave che, eno tughakusa ghungu huno tipaqo launo ipeve che.

¹³ Judami khami iqho-iqi tughakusa ghungu haphe chekeqono Ampeu Jisu je peitha juniye shi. Tughakusa ghungu aghikeqo shou ishi piche, “Paul no pesu pikulha chekeu Jisu jelono ino ahza otsu ani.”

¹⁴ Judami gholo achinetou Skiva ipikeu nuli tsunino hitoi shicheke.

¹⁵ Ikemu tughakusa ghungu huno panoqo vilo ishi khochile, “Ino Jisu ithi ani eno Paul ghi ithi ani, ike nonguye khunoqo kya?”

¹⁶ Timi khuu philo tughakusa ghungu akeno, tipau huno panoqo shou ilhe ikughino panoqo kughape ghaqhiuve eno panoqo suqoqhiuve. Panonguno tipau ki lono aphimini mu pumo puzu izapu poipeve.

¹⁷ Efesia lo kuami Judami ngo Grikmi kumtsuno hipau tsa chilu. Panongu kumtsu akumsano chhive eno Ampeu Jisu je shisheno alaushi agigihu tsu.

¹⁸ Pululuvekeqo gholo kutomono ighi puzu panonguno kiu mlachekeno kusumono aqha zulono piphe.

¹⁹ Kudu-u peitha chekeqo muqo lakhino panongu wu kakuqo kichekumqo suwo aqha zulono pitive. Panonguno kakuqo me kihi kuqha jukelo tsandi 80,000 me kutolo shiae.

²⁰ Hitoi shi-ghi Ampeu tsa alau vekuphawove eno mutotoi thuwu auve.

Efesia lo Muto-mushu

²¹ Hipaqo shivekethiu, Aghungu no hakitekeulo Paul no Makedonia ngo Akhaiya lono izususu Jerusalem lo wunikeu avehu kughuluve. Pano ishi pia, “Ino tilau wu kethiu niye Rom ghi jumasa ani.”

²² Pa kuphuchekemi Timothi ngo Erasta pama Makedonia lo puwuve puzu, pa ampi ye Asia yeghiqha lono ado ta kushuwa puwoe.

²³ Tipa ghuloki lono Efesia lo hi Ampeu Laghi shou kupunapughakeu kije lakhi ipeghive.

²⁴ Demetra ipi puzu tsandiyi kiyiqimi lakhino Artemido lhou-liu chineki kimihi pano tsandiyi pesu lhophe che eno pano hipau lhidi shikeu lono akumlamiqo ghi alla kutomo shiluche.

²⁵ Ikehu Demetria no akumlami eno tikithipu lhidi shichekemiqo kumtsu kukumqo puzu pi, “O nongu, ningu wu kinikuluye akumla hipau lono ighicheniepi nonguno ithi ani.

²⁶ Nongu ampino chilu eno ithuluve ake, Efesia lo likhi kumono Asia yeghiqha kumtsulo Paul ipikeu hipauno timi kumzapu musu kughuzuvae. Pano pikeuno timi u-no mlakeu lhouye khilemu alhou kumoe pi pie.

²⁷ Ike shikusapu lakhi hi ani kene, ninguno lhidi shichekeu hipau ajekusa sholunikeu likhi kumo puzu alhou-liu akijeu Artemido chineki hu kumu kihisumoveni cheni, eno Asia yeghilo timi kumtsuno mllachekeu eno ayeghiqhano mllachekeu lhou-liu jekipi hughi shipuhavetsuni chenie.”

²⁸ Kughou timiqono hi chilukeno panonguye axuideve eno ishi ighathu, “Efesiami wu Artemido no Akijeue!”

²⁹ Ikehu tipa phughilo hipau muto-mughukeu ghughano aqha kumtsu chhive, eno timiqono Gayia ngo Aristark pama tsuqu sasu aghilikilo kohakive wuve. Pamaye Makedoniami ke Paul kusa shi-ghi izucheke.

³⁰ Paul ye pa ampino timi muqo zulo wunishiae, ikemu kutsuluvekemiqono pa pelo wupemoe.

³¹ Distrik tipaulo kijemi atomi khami khunoqono Paul wu shompami keno tipaqono pa vilo khilemu aghilikilo wutsukevilo pi asutsa pipuwu.

³² Tipa muqo hohoye muto-mughuyi ae: timi khamino hiuke ipi aye, kutamino huuke ipi igha akhae, kughengu panoqo gholo kutomono kiu shiveke lono tile kumqo anikeno tighi panonguye mthae.

³³ Timi muqo gholo khamino kumsu-kishekhalu keuno Alekzander no kenia kepi ae kughengu Judamino pa pelo panongu tughu-u shipeke. Alekzander no pa-u kihi puzu timiqo vilo pano kumoke pikeu piniye pukaputsae.

³⁴ Ikemu kughou panonguno paye Judami kepi ithive keno panongu kumtsuno qhayi “Efesiami wu Artemido no Akijeu!” ipi ayi kihedo kini kutolo igha ae.

³⁵ Athiuno taunlo klark shichekeuno timi muqo hu hakuqusulu puzu pano ishi pi; “Efesia lo kuamiqo! Akijeu Artemido chineki eno atsutsu lono akimthe tuqu ilu-iqighikeu nongu hi Efesia phughilo timiqono akeu kumo kepi timi khuno mthano ani kya?

³⁶ Timi khunomu hipatsa lahmlakeuke. Tishiaye nonguye iquneyi shikepu eno kiumu mighi chho-chhoyi shikepu kumoe.

³⁷ Timi hipaqoye achineki shikuchhubepe puamoe momu ningu lhou-liu thaigha puamoe, ikeghi nonguno timi hipaqo hile saghi ani.

³⁸ Tsala Demetria ngo pa kumlamiqono khuala shou ngukukepu aghi aye kughaki acheni eno tile kugha kuthami anie, ike panongu pelo tileno lakhino lakhi shou ngukukile apelo.

³⁹ Ikemu nonguno tinguno alau phujuni aye, aghakhumi hoho lono hi xathalu nani.

⁴⁰ Ishi kiu shikeno tipau ghenguno ningu vilo mutomushu akesha pi ngukubeghi inijuni aye tile ninguye ighukepu avae. Hi muto- mughukeu kiumu akiqi kuhae, eno ninguye kiu ghenguno keno kiumu piluni chemoe”

⁴¹ Hi pipuzu pano timi kumqo akeqo puwove.