Apostolmi 18 - BAIBEL (BSI)

Korinthia lo

¹ Tishi kethiu Paul ye Athen qhive puzu Korinthia lo wuve.

² Tilehi Paul no Pontikus noghami Akuila ipike Judami lakhi sasu kusholu. Akuila ghi tiholono pa nipu Priskila sasu Itali yeghi lono ighi ae, kutau kumono Rom kukau Klaudia no Judami kumtsu vilo Rom phughi qhiveno chevelo pi ahza tsuke. Ike Paul no pama putsaniye wu,

³ eno pama gholo ngove eno panongu kumtsa mla ache, kughengu pama hutoi Paul ye aphi-ki tsughu keu vechewo pa likhi pano peithakepu qechu-che.

⁴ Sabat tsala atsu-tsu Sinagog lo wuno kutsala puzu Judami ngo Grikmi pelo mutsumishei ithipeniye pukaputsa.

⁵ Kughou Sila ngo Timothi pamano Makedonia kudauno ighive keno, Paul ye ado kumtsu atsa hu pe asheshu ae, Judamiqo vilo Jisu ye Khristo kepi ashepe shie.

⁶ Kughou Judami no pa hakha eno pa piputhauve keno Paul no pa makho kumoe pikeu shi-ghi pa phimini kuthopiye puzu panoqo vilo ishi pi, “Nongu kithiye nongu shouke! Tiye imakho kumoe! Hinguno hilau niye Judakumomi, lau wuniae.”

⁷ Ikehu pano panoqo launo cheve puzu Judakumomi, Alhou sumsa chekemi lakhi paje Tito Jesto ipikeu nokilo ilove. Pa kiye Sinagog kiyixelo ake.

⁸ Sinagog hoholo ayehkipeu Krispa ye pa kibolomi kumtsu sasu Ampeu kupulumi shive. Korinthiami kutomono Paul no pikeu tsa chilu puzu pululu eno baptiz shilu khae.

⁹ Kijili lakhi Paul no kungunhetsu ithuluke tile Ampeu no pa vilo ishi pi, “Noye msa kevilo, ikemu tamono pialo,

¹⁰ kughengu ino ogholo ani. Khunomu oshipusa mla nani, kughengu aphughi hipaulo iwu timi kutomo ani.”

¹¹ Ike paye ampe lakhino tuxa tile ngove eno Alhou tsa pesu timiqo shika ache.

¹² Kughou Galio pelo Akhaiya qhalo Rom kuka wu Ahng shivepe keno, Judami kumtsu kuqhano Paul tsuqu sasu kughakilo wu.

¹³ Panonguno pikeuno, “Timi hipauye ayezah lono kuhakeu ghi timiqo musu sawo Alhou mlla penikeu pukaputsa ani.”

¹⁴ Paul no atsa piniye shikemtsa Galio no Judamiqo vilo ishi pi, “Judamiqo, hiye akumo-kumla momu heqhi-buqhikeu tsakenapi aye ino tsaqui nongu tsa iniju tsuni cheke,

¹⁵ ikemu hiye atsa ngo aje eno nongu yezah vehu kutsalakeu keke nongu likhi nonguno xathaluvelo. Niye hikithipu vehu kughatha amlae!”

¹⁶ Tishieno kughaki lono pano panongu hapheve.

¹⁷ Ikelo panonguno Sinagog hoholo sakipheu Sosthene tsuquluve eno kughaki zulono pa hethuve. Ikemu Galio no tipaulo kutulamu jusu tsumoe.

Antiok lo Idewo

¹⁸ Paul ye ado kushuwa Korinthia lo ache puzu athikuzumiqo qhiveno Priskila ngo Akuila pama sasu Siriya lo wuniye ashukaki lono cheve. Ashukakilo chevemphi lono Kengkhria lo pa kutsusa miyeve, kughengu pano ashoqhi lakhi shikehu.

¹⁹ Panongu Efesia lo ighikelo, Paul no panoqo tile qhive, Paul ye Sinagog lo ilo puzu Judami sasu kutsalakile ae.

²⁰ Panonguno pa vilo ado ta ngo aghi lopi kemu pano pulomove.

²¹ Panongu launo wuveniye akelo Paul no panoqo vilo pi, “Alhou pulou shi aghi aye, niye nongu lau ide ighini.” Tishieno ashukakilo ilo puzu Efesia lono cheve.

²² Kughou pano Kaisaria tolu keno Jerusalem lo chesu iqho puzu Akukuhomi sasu kushokileluno tithiu Antiok lo iqive.

²³ Tile ado ta ngo apuzu paye cheve eno Galatia ngo Frugia qhalo a- a lakhilo wuno kupulumi kumtsu shikumto.

Efesia ngo Korinthia lo Apollo

²⁴ Judami lakhi paje Apollo ipikeu, ighono atsa pikithimi eno kuchoyesu tsaqutsaleyi ithi akemi huno Efesia lo ighi. Paye Alekzandria lono punukemi.

²⁵ Timi hipauye Ampeu laghilo akivishi shikaputhupe puakemi, eno paye Johan launo baptiz shilukeu likhi ithiakemu pano azukinishi Jisu ghili mutsumisheyi pesu pikulha eno kutsupiye cheke.

²⁶ Pano amlo kumto shi Sinagog lo pikulha che, ikemu kughou Priskila ngo Akuila pamano pa tsa chilu keno akilo pa sawo puzu Alhou laghi kithikiyi lhepe pa vilo pi.

²⁷ Apollo no Akhaiya yeghilo katha ikunikeu shi kughuve, ikehu Efesia lo kupulumiqono pa kuphu eno tilau kupulumiqo pelo alokivishi pa sasu peniaye yekili tsupuwu. Kughou pano tipa-a tokeno, Alhou kukupu lono kupulumi shiluvekeqo pano shishe kuphutsu.

²⁸ Kughengu pano kutsalakile kepulo mutotoi shi puzu aqo-aho gholo kighekelo Judamiqo gheqhi, eno Jisu ye Khristo kepi kuchoyesu lono kichepiye ke.