Apostolmi 15 - BAIBEL (BSI)

Jerusalem Hoho

¹ Ikemu Judia lono timi khami Antiok lo iqighi puzu ishi athikuzumiqo kutsu aghi: “Muse yezah kiqilo toi nonguno aphighu yiko ghave moaye nongu xamla nani.”

² Hipau ghenguno Paul ngo Barnaba pamaye panoqo sasu ghi kutsala kumbu. Ike Paul ngo Barnaba eno kutamiqo khami kishepuzu Antiok lono Jerusalem lo iqhono apostolmi ngo kupulumi kichimiqo sasu hipau vehu kuptsaju penikeu shi.

³ Ike alalo panongu ghenguno akukuhouno thwokha kutotsu, panonguno Fanikia ngo Samaria qha kathasu wuche kelo Judakumomino kishi Alhou lau xaide ighilu anikeno lhepiye, eno hipaqo sutsa chilu puzu kupulumi athikuzumi kumtsu lau shishe alokivi sughitsu.

⁴ Panonguno Jerusalem lo ighikelo akukuhomi, apostolmi eno kupulumi kichimiqono aghakiqishi panongu sasu, eno Alhou no panongu pesu kiu shilupekeno kumtsu panoqo vilo lhepiye.

⁵ Ikemu Farisimi mqo gholo pululuvekemi khamino puthughono pi, “Panonguye aphighu yiko ghavetsu masae eno Muse yezah pape nikeu pimayesae.”

⁶ Apostolmi ngo kupulumi kichimiqono hipau vehu kuptsaniye kuhokumqo.

⁷ Shishe kutsalaju akethiu, Pitor no puthughono panoqo vilo pi, “Ithikuzumiqo, nonguno ithi anike, puzuu nomu Alhou no nongu gholono ikishe puzu Judakumomi pelo Asutsa Kiviu chilu eno pulupenikeu shike.

⁸ Timi mulo ithi achekeu Lhou no ningu tsuketho lono Judakumomi lau amlo kiqi piye ghi Aghungu Kimthe panongu tsue.

⁹ Ningu ngo panoqo dolo Alhou no kumu kothakilekeu shitsumo; eno panoqono pulukeu vechewo pano panongu xine pevetsuae.

¹⁰ Imaye, nonguye kushiye Alhou pejughi kupulumiqo shou khikhi nipuasu momu ninguno puqhemlakeu makho pesu panoqo xapipe ani kya?

¹¹ Tishikepu kumoe, kughengu nino puluakeuno ningu ghi panongu toi Ampeu Jisu wu kupukini vechewo xalue.”

¹² Ike tile kuho akemi kumtsu iquneive eno Barnaba ngo Paul pamano Alhou no pama vechewo Judakumomi gholo amchipu ngo akumzapu shikeu kumtsu lhepe pikeulo tsaqui ini.

¹³ Pamano pitave kethiu Jems no khochile pi, “Athikuzumiqo, itsa initsulo!

¹⁴ Simon no kishekulu piveano inahuno Alhou no Judakumomi tuchoheju achekeuno panongu gholono timi mqo lakhi paje ghenguno ikhiphelu niyeke.

¹⁵ Tungkupumi tsa ghi hipaulo aphiphi shi hitoi yepuani:

¹⁶ ‘Hipa tikhau ino xaideghi nani; eno David ki ilaqivekeu ino shikithetsu nani. Hi ixapinyi akeu ino shikithetsu nani eno hipau pelo itaghi puthugholupe nani.

¹⁷ Tishianguno timi kutami eno Judakumomi kumtsu khijeno ije ku acheni keno tipaqo pelo Ampeu phulupenike,

¹⁸ ipi Ampeu no pie, pano hipaqo vehu kha-ghi no pithivae.’

¹⁹ “Tighenguno iwu xakuthaye Judakumomi khunoqo Alhou lau tsughu ighilu ani keno panoqo punaqhi akepu kumoe.

²⁰ Ikemu panoqo lau yesu yepe puwu kepu eno panoqo vilo asu-atu chineno kitiqevekeu chuqupu chupemonike, salha shupu pemonike; eno tsukiqhikeu lhoxu ngo ahji ishi chumokepu shi pivekepue.

²¹ Kughengu Muse yezah ye khaghino Sabat atsu-tsu Sinagog lo phisu che, eno pa tsa taun kumtsulo asheshu cheke.”

Judakumomi Kupulumi lau Yesu

²² Tile Apostolmi ngo kupulumi kichimiqo eno akukuhomi kumtsu sasu kuqha puzu panongu muqo lono timi khami kishe puzu Paul ngo Barnaba gholono Antiok lo tipaqo puwu nikeu pulokuqhalu. Panonguno Barsaba ipichekeu Juda ngo Sila pama kishe, pamaye athikuzumi gholo sakiphemi shi acheke.

²³ Panonguno tipaqo ulo yesu ishi yetsu puwu: “Ni athikuzumi apostolmi ngo kupulumi kichimiqono nongu Judakumomi athikuzumi khilehi Antiok, Siria eno Kilikia ghakhulo ani keno petha tsu ani.

²⁴ Hilau ningu gholo timi khamino wuno panonguno kiu pikeno tipauno nongu punaqhi eno nongu kutakihi aniepikeu ninguno chiluvae, ikemu panonguye tishikepu kiumu nivilo iniju puamoe.

²⁵ Ike ninguno kuhokumqono timi khami kishepe nikusau Barnaba ngo Paul pama gholono nonguqo lau puwunikeu kumtsuno pulokuqhaluvae.

²⁶ Nikusau Barnaba ngo Paul pamaye Ampeu Jisu Khristo ghenguno akuxu pephetsuvekemi timike.

²⁷ Ike ninguno kiu vehu yepuwu anikeno tipau ampino ghi pipenike ghenguno Juda ngo Sila pama puwu ani.

²⁸ Aghungu Kimthe ghi eno ningu ghi pulokuqhalu ani ike akhoto vehu hipaqo nguno alauye kiu makhomu nongu shou betsumo nikeu shivae:

²⁹ asu-atu chine mllavekeu chuqupu chukevilo; ahji chukevilo; tsukiqhikeu lhoxu shi chukevilo; salha-shupukevilo. nonguno hipaqo lono kutokupuyi napiaye, nonguye achipi shilu nani. Akivishi alo.”

³⁰ Ike kishevekeqo puwuve eno panonguno Antiok lo iqighi eno kupulumiqo kuho kumqono tipaqo lau yesu hu tsue.

³¹ Kughou ahoholo hi phisukeno tipaulo hakitekeu sutsa chiluno panonguye alokivi shive.

³² Juda ngo Sila pama ghi tungkupumi kehu atsa kutomo pesu pi puzu athikuzumi hakitekile eno panongu shikumtotsu.

³³ Panonguno ado lu-ghi tilau ngove. Tishi puzu athikuzumino alokiqishi panongu puwukeqo lau panoqo kighide puwove.

³⁴ [Ikemu Sila ye tilehi ngonikeu pulove.]

³⁵ Paul ngo Barnaba pamaye Antiok lo ngo kutamino kutomo sasu Ampeu tsa pe kutsupiye eno asheshu ae.

Paul ngo Barnaba pama Kututashive

³⁶ Atsala hami thiu Paul no Barnaba vilo pi, “Nikujono Ampeu tsa pesu asheshu chekeu phughiqolo itaghi nikujo wujuni eno athikuzumiqoye kiutoi ani keno juwuni nolo.”

³⁷ Ikelo Barnaba no pama gholo Johan Mark ghi sasu wunikeu pulo ae.

³⁸ Ikemu Paul no kumsukeuno Johan Mark ye puzuu Pamfilia lo panongu sasu chepuzu idewoveno panongu gholo akumla shiwo tomovekeke pa sasu wumokeu paviepi kumsulu.

³⁹ Pama dolo shishe kutsalakeu ipeghive, ikehu panongu kututashive, Barnaba no pa gholo Mark saluve eno ashukaki lono Kupra lo wuve.

⁴⁰ Paul ghi pa shelo Sila kisheluno athikuzumiqono Ampeu wu kupukinilo inibetsu puzu cheve.

⁴¹ Pano Siria ngo Kilikia qhalo wuno akukuhomiqo shi kumtotsue.