Apostolmi 12 - BAIBEL (BSI)

Shikighimekeu Alaushive

¹ Hipa ghulokilo akukau Herod no akukuhomi khami shou aghime tsuthuve.

² Pano Johan thikuzuu Jems kutsu luvetsu.

³ Hi shikeulo Judami lopu shikeu pano ithulu puzu pano wo Pitor ghi kughaluve. (Hiye kholaqhi sumokeu sho pesu Aghulhu shikeu ghuloki shi ae.)

⁴ Pitor kughaluveno akughukilo suve, eno ghushimi bidi-dino amqo bidi shi qhipuzu aghukhe shighi khepenikeu shive. Hechekulu Ghulhu thiuno Herod ye timi aqha zulono Pitor shou atsa kughanikeu shiae.

⁵ Ikehu Pitor ye akughuki alou ghi khekutokupuyi pesu qhie. Ikemu akukuhouno pa ghenguno shishe Alhou vilo inikhu ae.

Akughuki lono Pitor Khaqhipheve

⁶ Herod no kughakilo thoghiu pa sawuni keu shia. Ike tipaji Pitor ye aghukhemi kini dolo zuae. Ayikichhe kighi kinino pa tshupepua eno akughuki hukikhalo aghukhemino aghukhua.

⁷ Paikhavi lono Ampeu wu kungumi lakhi tile puthugho eno akuvu lakhino achebolo yevuqaive. Pano Pitor bighilo tukini pa kudaputhu eno ishi pi, “Mtazu ithulo!” Ike Pitor ulono ayi kichhe kighi hu iko ikiqive.

⁸ Tishino kungumi huno pi, “Opo khapuluve eno opukhu kuqho supuluvelo.” Pitor no tishiluve ikelo kungumino pi, “Okuuphi uluveno ipapelo.”

⁹ Pitor no pa papesu akughuki khalau ipe, paye kungumino kiu shitsu ani keno kuchou kepi mthano ae, ikemu kungunhetsu ithulu ani kughashi kumsu ae.

¹⁰ Pamano aghukhua atughiu ngo akiniu veche ipeve puzu aphughi kudau wuchekeu ayi khagholo ighie. Tino akutoshino pama khaqhi puwuve, eno ipe puzu pama kumtsa alaghila lakhilo cheche. Paikhavi lono kungumi huno Pitor qhiveno wuve.

¹¹ Tile Pitor ye atsuveshe alotsukhuyiluveno pi: “Kuchou ino ithivae, Ampeu no pawu kungumi hapuwu puzu Herod ulono eno Judamino shiniepi kumsu akeu kumtsu lono ihakholuvae.”

¹² Kughou pano ti kumsuluve keno, Johan Mark paza Maria kilo wuve. Timi kutomo tile kumqono akighini shi ae.

¹³ Ike kughou pano ahukikha kukhu keno, aqeliu Rhoda no khaqhiniye ipeghi.

¹⁴ Pitor tsapi michiluve puzu liye alokivi launo khaqhisu nike zuqhu pochilesu ilo puzu Pitor ye khalau puthugho aniepi pi.

¹⁵ Kutamiqono li vilo, “Noye izuani keniae!” ipi pi; ikemu lino tsumomo kuchouke pi auve. Ike kutamiqono khochilepi, “Tiye kungumi pa kusau keniae.”

¹⁶ Ikemu Pitor no kukhu awuve; eno kughou panonguno ahukikha khaqhi keno pa ithulu puzu shishe akichiqhive.

¹⁷ Panongu pelo inaqhoive peniaye pano au kutsu piye, eno Ampeu no akughuki lono kishi pa saipeghiluve keno kishekulu lhepiye. “Hipau pesu Jems vilo ngo athikuzumi kutami vilo pilo” ipi pano pive. Ipuzu paye cheve eno a-a kutau wuve.

¹⁸ Tsuthove kethiu, aghukhemi dolo Pitor ye kiu shivekela pi shishe mubumghu thuve.

¹⁹ Herod no Pitor phujulo pi ahza tsukeulo pa phumlave. Eno aghukhemiqo iniju kidekudaju eno panoqo pithivepe nikeu ahza tsuve. Tithiu Herod ye Judia lono Kaisaria lo iqive eno tilau ache.

Herod Kithi

²⁰ Herod ye Turmi ngo Sidonmi shou axu idekeu ache, ikehu panonguno pa lau kumtsa amqo lakhi shi ighi. Atughushi panonguno Blasta mulo zuluve, paye akukau kilo peithakutsuu atou ke. Tithiu panonguno Herod lau wupuzu alakishi qhuinijue, kughengu panongu ghakhumiye akukau ghakhu lono achuqupu sukishe sughi cheke.

²¹ Kihithapuakeu tsalani, Herod no akukau nanu pepuno pa kuka lakhulo iqa, eno pawu timiqo vilo asheshuae.

²² Timi qono, “Hiye timi kumono alhou lakhi tsapi thono,” ipi ighamukue.

²³ Zuleno Ampeu wu kungumino pa hekuluqhive, kughengu pano ajekipi Alhou tsumo kehu; eno paye apitheno tsaqhi pithive.

²⁴ Ikemu Alhou tsaye vekupha eno alau shi ikowove.

²⁵ Barnaba ngo Saul pamaye kiu ghenguno puwukela shikupuve kethiu Jerusalem lono ideighive eno Johan khuu Mark ipi kuchekeno pama gholo sasu ighi.