Apostolmi 10 - BAIBEL (BSI)

Pitor ngo Kornelia

¹ Kaisaria lo Rom ghushimi “Italia Ghushimi” ipikeu lojilo keptein Kornelia ache.

² Paye achineyehlo amlotsuqhiyi chekemi, pa eno pa kibo kumtsu Alhou sumsache. Pano Judami kumlhomi kumsano shishe kuphuche eno tamono Alhou vilo inikhu ache.

³ Ghulo lakhi avelau ayi kuthu kihelo paye kungu nhetsu lono Alhou wu kungumi lakhi pa lau ighikeu pano mutsuqhei ithulu, eno pa vilo ishi pi, “Kornelia!”

⁴ Pano akumsa launo kutuxope kungumi hu jupuzu pi, “Akijeu kiu kya?” Kungumi huno ishi pa vilo pi, “Okighini eno nono kumsano timi kuphuchekeu Alhou no ikhiluvetsua eno okumsulu ani.

⁵ Noye Jopa lo timi puwu puzu tilau timi lakhi pa je Simon, khuu pesu Pitor ipicheni keno pa kuwu pelo.

⁶ Pa ye ashiyiko kumlami lakhi Simon ipikeu gholo ani, eno pa kiye azughi phivilo anike.”

⁷ Kungumi pa putsa akeuno wuve kethiu, Kornelia no pa qemi kini eno pa hikujumi gholo ghushimi lakhi achineyehlo amlo tsukemi ishi ku.

⁸ Pano thwokha panoqo vilo lheveno Jopa lo panongu puwu.

⁹ Thoghiu, timi tipaqono chesuwo Jopa toni chekelo, Pitor ye akighini shinike puchou aki kutsuqalo iku.

¹⁰ Paye muzuthive eno kiuala chunishi ae. Timi no alibe kuto khe akelo paye kungunhetsu lakhi ithulu,

¹¹ eno atsutsu kiyeveno kiukela lakhi ayephu kije xachhokeu toike ashekumtsu bidi lono ayeghi kudau kughujupiqi keu pano ithulu.

¹² Tipaulo tughashi, itikiche lhoxu eno aghau jeli kumtsu ae.

¹³ Pa lau asutsa lakhi ishi ighi, “Ithulo Pitor, hi heqhino chulo!”

¹⁴ Ikemu Pitor no pi “Tiye khilemu tishimlae, Ampeu! kiu-kiumu mithemokeu momu kitiqevekeu niye khilemu chumphie.”

¹⁵ Asutsa huno ghuthu akiniu pa vilo pi: “Alhou no kiu shikimtheve akeno kitiqeveakepi noye pikepu kumoe.”

¹⁶ Ghuthu kuthu hi shipuzu thime huye atsutsulo pai ikhi sukuve.

¹⁷ Pitor no kungunhetsu kiqi avehu kughuzushi akelo, Kornelia no timi puwukeqo huno Simon ki ighisusu khagholo ighieno puthugho.

¹⁸ Panonguno timi ku puzu Simon Pitor ipikeu inami lakhi tile animapi iniju.

¹⁹ Pitor no kungunhetsu kiqi kumsukutoju akelo, Aghungu no ishi pi, “Julo, timi kuthuno ophu cheni.

²⁰ Ithuno iqilo, panoqo gholo wunikeu vehu kunacho akevilo, kughengu ino panoqo puwu anike.”

²¹ Ikehu Pitor no timiqo lau iqi puzu pi, “Nonguno phuchekeu timi hu nike. Nonguye kiu shi ighi ani kya?” Panonguno pi,

²² “Keptein Kornelia no ningu puwue. Paye timi kivimi, Alhou sumsachekemi eno Judami kumtsuno gihu achekemi lakhi. Alhou wu kungumi kimthe lakhino pa kichepiye keuno opelo pa kilo ighikepushi eno nono kiu pikepushi aghini keno inikepushi no kupuwulo pike.”

²³ Ike panonguye Pitor no ku-sukeu inami shighi pa gholo ngoe. Thoghiu Pitor no kuto puzu panoqo sasu cheve, eno Jopa lono athikuzumi khami pa gholo wu.

²⁴ Tishiwo akuthuni panonguno Kaisaria tolu. Kornelia ye pa bolomi ngo pawu shompami ku-kumqo sawo panoqo huqhe khe ake.

²⁵ Pitor no aki alou iloniye akelo Kornelia no pa sasu kusho, eno pa pukhu philo itsaqi puzu agigihu pa tsu.

²⁶ Ikemu Pitor no pa sunheputhu ghi pi, “Ithulo, kughengu nighi timi lakhi ke!”

²⁷ Pitor no Kornelia putsa ghi aki alou iloghikelo timi kutomo kumqo aghi.

²⁸ Pano panoqo vilo pi, “Nongu kumtsuno ithianike Judami lakhiye pa chineyehno pa pelo ashiayeh kutami putsawu momu xukutshukungo penikeu lakha puani. Ikemu niye timi khumu pesu mithemoke momu kitiqeveake ipikepu kumoe pi Alhou no ipiyevae.

²⁹ Ike kughou iku ighi keno, niye kiumu moepi mono ighivae. Ike nonguye kiu vehu ghenguno ikupuwu kela ino nongu iniju anike?”

³⁰ Ikelo Kornelia no pi, “Ishi bidi shiveake, hipau yikihedolo niye avelau ayi kuthu kihelo akighini shichekeu iki lono shiae. Phaikhavi timi lakhi metsughoike phimini pepuno izulo puthugho,

³¹ eno pano pi, ‘Kornelia! Alhou no okighini chiluvetsua eno nono kumsano timi kuphuchekeu ikhiluvetsuae.

³² Tighenguno Jopa lo timi puwu puzu Simon Pitor kuwu pelo, paye Simon ashiyiko kumlau kilo wuanike, tiye azughi phivilo ani.’

³³ Ikehu okuwu penike ino mutazu timi puwu kelo nono ighitsukeu ghenguno alovae. Itehi Alhou zulo kumtsu hi ani, eno Ampeu no ovilo kiu pilo pi ahza tsukeno chilu nike ngokhe anie.”

Pitor Tsa

³⁴ Pitor no ishi pithu: “Kuchouno ino jupililu akeuno Alhou ye timi kumtsu aphi-phi lono peitha cheni.

³⁵ Khunokhuno shiayeh shi aghimu khuno Alhou sumsa eno achipiu shicheghi nikeno Alhou ye tipano ikhilunikeuke.

³⁶ Jisu Khristo khuu timi kumtsu shou Ampeu keno pa vechewo Alhou no alokughunopu tsakiviu Israilmi lau asheshu pekeu tsa hu nonguno ithi ani.

³⁷ Baptiz shikepuepi Johan no asheshu chekethiu, Galil lono huthu puzu Judia qhalo kiu shivekeno nonguno ithi ani.

³⁸ Alhou no kishi Nazaret noghami Jisu shou Aghungu Kimthe eno akuka lepuku keno nonguno ithi ani. Alhou no pa gholo ake ghenguno pano aqha kumtsu wu puzu akivi kumla shi eno tughami kuka qholo aghikeqo kumtsu shipivitsu.

³⁹ Judami ghakhulo ngo Jerusalem lo pano kiu shichekeno tipau ninguno ithulupe puani eno thopimike. Panonguno asubolo pa kughape tuthuiju ghi pithi.

⁴⁰ Ikemu Alhou no akuthunino akithi lono pa xuputhuveno pa pelo timi zulo ipeghipiyepeke.

⁴¹ Timi kumtsu lau ipeghipiyeke kumoe ikemu Alhou no kisheluvekeqo, ningu khunoqo thopimi keno tipaqo lau likhi ipeghi piyepeke. Pano akithilo xuchilethughi kethiu ninguno pa sasu kumtsa chu shoe.

⁴² Pano ningu vilo atsakiviu timiqo lau vekuphawolopi ahzatsu, paye kuxumi ngo kithimi shou kughakuthau shipeniye Alhou no kishelukeu hu pa kepi ashepe shilo pie.

⁴³ Tungkupmi kumtsuno pa shepe shichekeuno, timi khunono pa puluni keno paje vechewo axine pevekulupu ithulue.”

Judakumomi shou Aghungu Kimthe Tsu

⁴⁴ Pitor no hi piaphi lono, atsa iniakemi kumtsu shou Aghungu Kimthe ikughive.

⁴⁵ Eno Jopa lono Judami kupulumi Pitor gholo ighikeqoye akichiqhive, kughengu Judakumomi shou ghi Aghungu Kimthe lepukutsu kehu.

⁴⁶ Kughengu pano qono pakutakeu milino piakeu eno Alhou ye kijekepi sheqhekeu panonguno chilu.

⁴⁷ Tile Pitor no pi, “Ningu shou ighike toi, timi hipaqo shou ghi Aghungu Kimthe ighivae. Imaye, panonguno baptiz lunikeulo khualano panoqo lakha kepu ani kesha?”

⁴⁸ Ike Ampeu Jisu Khristo jelono panoqo baptiz shilupenike pano ahza tsu. Tithiu panoqo gholo atsala hami panongu gholo aghilopi pa vilo iniju.