AMUS 9 - BAIBEL (BSI)

AMPEUw Kughakuthaqo

¹ AMPEU no akumlla kiptia phivilo puthugho aghikeu ino ithulu. Pano ishi ahza tsu, “Achineki tsukuchoqo kunguu kudau ighono helo tishianguno akisheqho kuchopu ithape nike. Tipaqo suphove eno timiqo kutsulo iluqi iku pelo. Timi kutamiqoye aghukishi lono ino ghiqhi pithive nani. Khuumu wumla nani, khuumu pokawulumo nani.

² Panonguno pano la chhususu kithimi yeghilo iqive namu ino panoqo tsuquluve nani. Panonguno atsutsulo mili ikuve namu ino panoqo saiqighive nani.

³ Panonguno Karmel Toghilo itshuluve namu ino panoqo kughaluve nani. Panonguno imusaye azughi polalo itshuluve namu ino azughi ghahwu ahza tsupuzu panoqo mikiqhi penani.

⁴ Pano ghumino panoqo sasu akughulo sawuve aye panoqo pithive penike ino ahza tsu nani. Niye panoqo kutsaleve nike kutovae eno panoqo kuphuni chemoe.”

⁵ AMPEU Aqokitikhi Lhou no ayeghi bukeulo tiye ithawuve cheni; tipaulo akemi kumtsuno mloqauve cheni. Ayeghiqha kumtsu Nayil ghoki toi iku eno iluqive cheni.

⁶ AMPEU ye kungughalo pa chebo shipuani, eno ayeghi shou pano atsutsu jolha qhike. Pano azughilo azuakeqo kupuzu ayeghi shou tipaqo leqhi cheni. Pajeye AMPEU ke!

⁷ AMPEU no pi, “O Israil lo akemiqo, ino kishi nongu kumsulu keno titoi niye Sudan lo akemiqo kumsulu cheni. Ino Ijip lono nongu saghike toi Filistiyami Kreta lono saghi eno Kir lono Siriyami saghike.

⁸ Ni, AMPEU Alhou ye hi axine shikicheu Israil kukaqha jukuto acheni eno ino ayeghiqha zulono hipau kutsaleve nani. Ikemu niye Jakob polo kughukomi kumtsu qhoi kutsalevemo nani.”

⁹ “Ino ahza tsupuzu akhoje lono athi ijokeshi Israil lo akemiqo ijo nani. Ino ashiayeh kutami gholo panoqo ijosu nani tiye amekuhakemi kumtsu ikhipeve niyeke.

¹⁰ Iwu timiqo gholo axinemiye aghukishi lono pithikhave nani, ti khunoqono ishi picheni keno, ‘Alhou ye shikupusa pelo nikupunu ighipemo nani,’ ”

Ighinikeulo Israil Sachileluni

¹¹ AMPEU no pi, “Ino David kukaqha tsuchile nikeu tsala cheni, tiye aki ilaqiveno ixapinyive keu toike. Ino tipau kuptu pukhove nani eno tipau sachileluni. Ino tipau shikithe nani eno tipau pesu kha-ghi wovekeulo akeu toivetsu nani.

¹² Ikehu Israil lo akemiqono Edom yeghilo kiu aghi keno leluve nani eno ashiayeh kutami iw shiachekeqo lelu nani” ipi AMPEU no pike. Pano hipaqo shipe nani.

¹³ AMPEU no pi, “Atsala wochenike, jualo, aghi ghoqhi khamla aphi lono aghibo thuwuve aghi nani, Atsayiji shikhamla aphi lono atsayithi thuwuve aghi nani. Naghuto qono ngoyinikeu ji kighiji nani eno atoghilo tipau qowu nani.

¹⁴ Niye iwu timiqo pano yeghilo sachile saghi nani. Panonguno ixapinyivekeu phughi shikitheno tilehi ngo nani; panonguno atsayibo shosuno atsayiji sho nani. Panonguno aghutu putuno tile ipeghikeu chu nani.

¹⁵ Ino ayeghi iwu timiqo tsukeulo panoqo shosu nani, eno panonguye itaghi nhuvemo nani.” AMPEU nongu Lhou no piqhivae.