AMUS 8 - BAIBEL (BSI)

Axathi ashoghilo akeu Kungunhetsu

¹ AMPEU Alhou no kungunhetsu kutau lakhi ipiye. Tipaulo axathi ashoghi lakhi akeu ino ithulu.

² AMPEU no pi, “Amus, noye kiu ithulu ani kya?” “Axathi ashoghi lakhike,” ipi ino khochile. AMPEU no ivilo pi, “Iwu timi Israilmi ghenguno kishekhave kepu ighivae. Niye panoqo ghimeqhiniye kumsupu akeu kilivemoake.

³ Tipa tsalalo akukau kilo ale kiphe huye qanimlokeu ghugha shive nani. Aqha kumtsulo akithi kumo auve nani. Tipaqoye tshuimu shimono khalau vepheve nani.”

Israil Ghuloki Tovae

⁴ Hipau inijulo, nonguno shiluksami qodaqhi cheni eno aghakhulo kumlhomi kutsaveniye pukaputsa acheni.

⁵ Nonguno nolikhi novilo ishi picheni, “Ninguye akimthe tsalaqo wove penikeu khelho kutuke tishianguno niwu athi jelu nike. Sabat thiuno nino ame alau lu, ahu kichileu peithalu eno ahuu shikideveno qhuighikemi pishiqhini.

⁶ Nino athi lhoksa pesu ame kutomo lono jelu nani. Nino kumlhomi apiagha apukhu kuqho tuna lakhi me ghi lomlano akemi phupuzu aquaxemi shiwuve penike nino pa qhuluveni.”

⁷ AMPEU, Israil lhou no tushoqhi ani, “Niye khilemu panoqo kumla lhoksa pevetsumoe.

⁸ Highenguno ayeghino itha nani, eno aghakhulo akemi kumtsu avekusa shi nani. Aghakhu kumtsu sukiniqhi nani; hiye Nayil ghoki toi iku puzu iluqive nani.

⁹ Ino tsukinhe pelo puchou aphi lono hailove eno puchou aphi lono ayeghiye zumoi kitheve kepu ghuloki sughini cheni. Ni, AMPEU Alhou no piqhi anike.

¹⁰ Ino nowu tiqhetini tsala pesu akumo shiqhokeu eno nongu mlo kiqishi phekeu leqo pesu amlo ghimeshi ighakeu kughulhove tsu nani. Ino nongu pelo nokutsusa miyevepe eno yeqhiye phi upe nani eno nonguye apuaza lakhi nu lakhi likhi akeu thivekelo mloqake toi shipe nani. Tiye ashekha kutolo akukhu kimji tsala shi nani.”

¹¹ “Ino aghakhulo puqumiye puwunikeu ghuloki wocheni. Timiqoye muzuthive nani, ikemu tiye achuqupu ghenguno kumoe. Panonguye AMPEU launo ighikeu tsape lunishi kelauno muzu tughu shi nani. Ni, AMPEU Alhou no piqhi ani.

¹² Timiqoye ahuuno apeu kutolo itsusu wu nani eno kipelauno kulolau wunani. Aqha kumtsulo panonguno AMPEU launo ighikeu tsape phuju nani, ikemu panonguye tipau phumla nani.

¹³ Tipa tsala ghulokiloye apumi ilimi alhothe, ashiaji kivimi namu tughuthi kelauno iluqive nani.

¹⁴ Khunoqono Samaria lo asu atu julho akeu jelono tushoqhi kelo ishi picheni keno, ‘Dan lo alhou akeu je lono’ momu ‘Bersheba lo alhou akeu je lono,’ timi tipaqoye ikiqive nani eno idethughimove nani.”