AMUS 7 - BAIBEL (BSI)

Tulhaqu Kungunhetsu

¹ AMPEU Alhou launo kungunhetsu lakhi ipiyeke. Ino jukelo pano tulhaqu aqo lakhi kughulho, tiye akukau saje atsuni gholuve kemtsa eno atsuniye itaghi thuwu ipeche kelo shiake.

² Iwu kungunhetsulo, tulhaquno ayeghilo atsuni mini aghikeu kumtsu chukhave keu ino ithulu, ikelo ino ishi pi, “O AMPEU Alhou, owu timiqo xine pevetsulo! Panonguye kishieno puxuluni kya? Panonguye aghulo likhi eno miqemileike!”

³ AMPEU no pano kumsupu akeu kiliveno ishi pi, “Nono kiu ithulu akeno tipauye shipemo ake.”

Ami Kungunhetsu

⁴ AMPEU no kungunhetsu kutau lakhi ipiye. Tipaulo pano ami pesu pawu timiqo ghime nikeu ino ithulu. Amino ayeghi qhou azughi kije akeu pitipuhave eno ayeghi ghi pitiu cheghive.

⁵ Tileno ino ishi pi, “Tavelo, AMPEU Alhou! ow timiqo kishieno puxuluni kya? Panonguye aghulo likhi eno miqemileike!”

⁶ AMPEU no pano kumsupu akeu itaghi kilive eno ishi pi, “Hipau ghi shipemo ake.”

Shikumzu kighi Kungunhetsu

⁷ AMPEU no kungunhetsu kutau lakhi ipiye. Tipaulo paye atozu lakhi phivilo puthugho akeu ino ithulu. Tipau tozuye shikumzu kighi pesu mighieno shipe pua eno paulo shikumzu kighi lakhi pea.

⁸ Pano ivilo ishi iniju, “Amus, noye kiu ithulu ani kya?” “Shikumzu kighi lakhi ithulu ani,” ipi khochile. Tileno pano pi, “Ino hipau peitha akeuye iwu timiqoye atozu ijishu akeu toikepi piyeniyeke. Niye panoqo ghimeqhini keu kumsupu akeu kilivemoake.

⁹ Isak polo kughukomiqono a-a khilehi mlla acheni keno tiye kutsave nani. Israil lo akimthe-aqoye ixapinyive nani. Ino akukau Jeroboam nobolomi kuka sheamzu hu kishekhave tsu nani.”

Amus ngo Amaziya

¹⁰ Tileno Bethel lo achineu Amaziya no Israil kukau Jeroboam lau asutsa puwuno ishi pi, “Amus ye Israil lo akemiqo gholono oshou akumou shiniye kumqu ani. Pa tsapino aghakhu shipusaveni cheni.

¹¹ Kughengu Amus no ishi pianike: ‘Jeroboam ye aghushi lono thi nani eno Israil lo akemiqoye pano yeghi lono sawuveno hapuwuve nani.’ ”

¹² Tishi puzu Amaziya no Amus vilo pi, “O tungkupuu, wuvelo! Juda lo idewovelo eno tilau tungkuptsa pialo eno panoqo pelo oloji apelo.

¹³ Hinguno hilauye Bethel lo tungkuptsa pikevilo. Hiye akukauno mllachekeu-a lakhike, ashiayeh chinekike.”

¹⁴ Amus no khochile pi, “Niye ame tsupeniye tungkuptsa pichekemi tungkupu lakhi kumoe momu tungkupmi lakhi nu kumoe. Niye bherikhemi eno khughuthibo chichekemike.

¹⁵ Ikemu ino bherikhemi lakhi shi ake lono AMPEU no ikumla lono ikuluve eno ivilo wuno pawu timi Israil lo akeqo vilo tungkuptsa pilo pike.

¹⁶ Tighenguno itehiye AMPEU no kiu pikeno tipau inilo. Nono ivilo tungkuptsa pikevilopi ilakhake, Israil lo akemiqo shou kiu tsamu pipuku kevilo pike.

¹⁷ Ike AMPEU no no Amaziya vilo piani, ‘Onipuye alaghilalo kutuqhalimi shiwuve nani eno otianuliqoye aghushi lono thi nani. Noghakhuye kijeveno kutami tsuve nani, eno noye akumthami inagha lono thive nani. Israil lo akemiqoye pano yeghi lono sawuve puzu hapuwuve nani.’ ”