AMUS 6 - BAIBEL (BSI)

Israil Kutsalekeu

¹ Khunoqono Zion lo akuchhoma shi xuakhani eno Samaria tokujolo ililayi akhani keno tipaqo ghenguno ahasapuke, nongu, Israil shiayeh kije hipaulo kijemiqo; timiqono nongu kukuphu phuighi chekemiqo!

² Wulo eno Kalne phughi julo. Tipashelo, wukithe puzu Hamat phughi kuloghi julo eno iqi puzu Filistiyami phughi Gat julo. Tipaqoye Juda ngo Israil kukaqha nguno akiviu kesha? Panoqo lughiye nolughi nguno aqha kije kesha?

³ Kutsakungokeu tsala lakhi chenie pikeu nonguno ikhilu nishimono milive ani ikemu nonguno kiu shikeno tipauno atsala tipau akupunulo saghive anike.

⁴ Nongu khunoqono now amekusho yeghu lakhulo ihozu eno akuhahuno shikeu zu-alo zu puzu bheriti shi ngo amshiti shi chu acheni keno, nonguqo ghenguno ahasapuke!

⁵ Nonguno ale iqi anishike, David toi eno akighilebo mutsa tipaqo asheshino phe acheni.

⁶ Nonguno ajukhu chhitoi aji sho cheni eno tsungqui keu mukhu akiviviu peitha cheni, ikemu nonguye Israil itaququyi akeulo mloqamoe.

⁷ Tighenguno nongu paghino halesawuve keulo wu nani. Nonguno aghulhu shichekeu eno tiqhetiniqo huye ashekha shive nani.

⁸ Alhou, Aqokitikhi AMPEU no tsaqui piputo akeu lakhi tsuani: “Niye Israil lo akemiqo qhekuza jumithike; niye panoqono amekusho shi aki kuloghi shipuakeu junishimoe. Panoqo phughi atou eno tilehi aghikeu kumtsu pesu ino aghumi tsuve nani.”

⁹ Akibo lakhilo timi chighi aghiaye tipaqoye thive nani.

¹⁰ Akithiuno limi kumo shiqho kelo ampi shitsu akeuno aki lono akumo peipeghi nani. Alimi huno aki tipaulo khukhumu xuaghikeu vilo, “Ogholo kutami anikeo kuha kya?” ipi kelo, asutsa lakhino “Kuhae!” ipi khochile nani. Tileno alimi huno, “Inaqhoivelo! Ninguye AMPEU jeku nike kutokupui masake,” ipi pi nani.

¹¹ Kughou AMPEU no ahza tsuni keno aki kije kitila pinamu hepho pinyive nani.

¹² Khurshiye atuqu shou ilhe polu cheni kesha? Timiye amshitsu sasu azughi hokidelu cheni kesha? Ikeghi nonguno achipiu xakutha pesu tughu shivetsu eno achipiu pesu akumou shivetsuke.

¹³ Nonguno Lodebar taun khasu pesu lelukeulo qheza ani. Nonguno, “Ninguye Karnaim lelukepu shi akumto shishe ani,” ipi qheza cheni.

¹⁴ AMPEU, Aqokitikhi Lhou ampino pi, “O Israil lo akemiqo, ino inaghami ghushimi puwu puzu noghakhu qhasuluve penike puwuni cheni. Tipaqono ahuu Hamat Kakutha lono apeu Araba Khila kutolo nongu qhasuluve nani.”