AMUS 5 - BAIBEL (BSI)

Xachile ighipenike Ku

¹ Hipau inijulo, O Israil lo akemiqo, ino nongu shou akithilo le hipau phekeu inilo:

² Ayiliu Israil ye veqhivae, Khilemu ide ithughi kithemo ake! Liye ayeghilo peveno ihozu ani, eno khunomu li sunheputhu moe.

³ AMPEU Alhou no pi, “Israil lo aphughi lakhino ghushimi 1,000 puwuke ikemu 100 likhi ide ighike; aphughi lakhino ghushimi 100 puwu ikemu chighi likhi ide chile ighike.”

⁴ AMPEU no Israil lo akemi vilo pi, “Ilau ighilo eno nonguye xulu nani ke.

⁵ Mllanike Bersheba lo wukevilo. Bethel lo iphuniye pukaputsa kevilo, Bethel ye kiumu shimlave nani. Gilgal lo wukevilo, tile akemiqoye piyighiveni putsake.”

⁶ AMPEU lau wulo eno nonguno xulu nani. Nonguno pa lau wumo aye pano Israil lo akemiqo shou ami toi jole iqighi nani. Amino Bethel lo akemiqo pitileve nani eno khunomu tipau pinhe mla nani.

⁷ Nongu khunoqono kuchou xakutha tuchighi cheni eno kutami chipiu pishiqhiluve cheni keno, nonguye thini putsae!

⁸ AMPEU no ayepuqo lhoke, Pughuno-supemi ngo Ayenokilimi Pano zumoikeu pesu puchou kuvu shivetsu cheni, eno pucho tsala pesu putho shive cheni. Pano azughilo akeu zu kupuzu ayeghi shou tipaqo leqhi cheni. Pajeye AMPEU ke.

⁹ Pano akuka kumtomi eno panoqo liwo qoghe shou kutsapini keu sughi cheni.

¹⁰ No-timiqono amikucho xakutha shimokeu eno kughakutha alo kuchou tsa pimoke ghenguno timi khuuno nongu sakiyini keno tipau jumithi cheni.

¹¹ Nonguno kumlhomi qoda cheni eno pano thi suxaluve cheni. Tighenguno nonguno atu pesu aki kivi shipuakeulo nonguye ngomla nani momu atsayilu kivi nonguno chipe puakeu lono atsayiji shomla nani.

¹² Nongu xineye kiutoi akumsapu eno nonguno heqhi buqhi pithikeu khijejehi shipuani keno ino ithi ani. Nonguno timi kivimi shikimighi cheni, kulugho lu cheni, eno kughakutha-alo kumlhomino amikucho xakutha ithulu kepushi akeu nonguno lakha cheni.

¹³ Tighenguno alokutsumiye alhoksa ghuloki tikithipuloye inaqhoi ngoauve cheni!

¹⁴ Achipiuye kiu keno tipau shini thono alhoksa shikevilo, tishianguno nonguno xulu nani. Tishiaye, AMPEU Aqokitikhi Lhou no nongu gholo anani, tiye nonguno piachekeu toi.

¹⁵ Alhoksaye kiu keno tipau jumithilo eno achipiu kimiyelo eno kughakutha-alo achipiu xakutha achepelo. Ishiake, AMPEU no hipau shiayehlo timi puxupe puaghikemi shou kupu kimiye luvi ke.

¹⁶ Ike AMPEU, Aqokitikhi Lhou no pi, “Aphughi laghilalo igha qakeu eno amloksashi qakeu anani. Kithimiqo shou mlo qapenike akumolo qasutsu peniye ame tsukeqo likhi kumono alulo huakemi ghi qasu kuphupe nike kuwu nani.

¹⁷ Atsayilu kumtsulo ighaqakeu anani. Hi kumtsu shikupu nani kughengu nongu ghimeqhi nike niye cheni.” AMPEU no piqhivae.

¹⁸ Nongu khunoqono AMPEU tsala mineqhiyi acheni keno tipaqo hakusapuke! Nonguye kushiye AMPEU tsala anishi ani kya? Kughengu tiye zumoikeu tsala shi nani kethono akuvu ke kumoe.

¹⁹ Tipa tsalaye timi lakhino abongushu sholuno poche kelono ava sasu kusholukeu toi nani! Momu timi lakhino akilo ighi puzu pau pesu atozulo bekelauye apighino mighivekeu toi nanike!

²⁰ AMPEU tsalaye zumoikeu sughi nani kethono akuvu sughimoe; tiye vuqaikeu kuhano zuchiyikeu tsala shi nani.

²¹ AMPEU no pi, “Nonguno achineyeh kiqi lono tiqhetini shikeu ino junishimo eno jumithike; niye tipaqolo ngo sumlake!

²² Kughou nonguno akiptipu akumllagho ngo athi kumllagho ilau sughi nikeno niye tipaqo ikhilutsuni chemoe; nonguno imllaniaye lhoxu ashi pubeleyi keu hu niye lutsuni chemoe.

²³ Nongu le ghugha tavelo; niye nongu kighilebo ghugha initsunishi amoe.

²⁴ Tishinike zuqhulo kuchou xakutha shikeuno aghoki toi qowu pelo eno achipiu shikeuno aghoki qoitamo keu toi shipelo.

²⁵ “O Israil lo akemiqo, ino ampe lhobidi nongu sasu asayeqha kathasu sawu chekelo niye lhoxu heqhi mllakeu eno akumllagho nongu vilo khumoe.

²⁶ Ikemu itehiye nonguno nongu kukau lhou Sakut julho shisukeu eno nongu yepu lhou Kaiwan julho shisukeu mllake ghenguno nonguye ajulho tipaqo xapu nani.

²⁷ Tiye kughono ino Damaska yeghi nguno hukudau nongu hapuwuve nikeno tileno shi nani,” ipi AMPEU, khuu jeye Aqokitikhi Lhou keno pano pike.