AMUS 3 - BAIBEL (BSI)

¹ O Israil lo akemiqo, Ijip lono ashiayeh kupuju lakhi sasu iqhoghi kemiqo, AMPEU no nongu shou pipuku akeu tsape hipau inilo.

² “Ayeghiqhalo ashiayeh akemi gholo niye nongu likhi ithi eno tuchohijuke. Tighenguno nongu xineye akichiqhipuke eno tishi kehu tipau ghenguno niye nongu ghimeqhi masake.”

Tungkupu Kumlapu Saje

³ Pulokilemo keloye timi mikiniye kumtsa chesu wuluni kesha?

⁴ Abongushuye pano tsuqhilu keu phumla keloye aghasulo ighani kesha? Abongushu alhotheye kiula tsuqulumo keloye pa kungo-alo hu-hushi ighani kesha?

⁵ Alichhelo musukepu chuqupu kuha aye aghau meluni kesha? Kiualano xakhamo keloye alichheye xakhaluni kesha?

⁶ Aphughi lakhilo afuko kuyighakeulo timiqoye musa ichimoveni kesha? AMPEU no puwumo keloye aphughilo shikupsa ighini kesha?

⁷ AMPEU Alhou ye pano kughupe akeu pesu pa qemi, tungkupmi vilo piyesumo keloye khilemu tipau shini chemoke.

⁸ Kughou abongushuno ighani keno khuno musamove kulupu kya? Kughou AMPEU Alhou no pikeno khuno pa tsape asheshumove kulupu kya?

Samaria Ngukusapu

⁹ Khunoqono Ijip ngo Ashdod lo akighikilo ngo acheni keno tipaqo vilo pikulhalo: “Samaria sukumxalo naghuto akeqolo hekutsupe kumqolo eno tilehi kuthakumla eno heqhi bukiqhi akeu julo.”

¹⁰ AMPEU no pi, “Timi hipaqoye heqhi buqhikeu eno suxaluvetsu keu nhemgha pesu panoqo ki kuloghi chhitoi ani. Panonguye amikucho shinikeu ghi mthake.

¹¹ Tighenguno aghumi aqo lakhino pano yeghi veholuve nani panoqono aliwo shipuakeu kutsaleveno panoqo kighiki xulepuwuve nani.”

¹² AMPEU no pi, “Bherikhemi lakhino abongushuno chukha kumo bheri pukhu kini momu akinibo tuxau likhi hakholu keshi Samaria lo akemi, itehiye yeghu lakhu amekusholo ihozu akhani keno tipaqo aghulo likhi puxu puaghitsu nani.

¹³ Hi inilo eno Jakob laghami shou ashepe shipukulo,” ipi Aqokitikhi AMPEU Alhou no pike.

¹⁴ “Kughou ino Israilmino axine shikeu ghenguno panoqo ghimeqhi nikeno, tipa tsala lono ino Bethel lo akumllagho kiptiaqo kutsaleve nani. Akumllagho kiptia kumtsulo tsuqupe kepu ichushei ipeghi akeqoye ipopinive nani eno ayeghilo iluqikhave nani.

¹⁵ Susu tsalalo ngokeu ki eno mutsu tsalalo ngokeukiqo ino kutsaleve nani. Akuhahuno ananu shikeu kiye ixapiniyi iluqive nani, aki kije kumtsu kutsaleve nani.”