ALE KIMCHI 7 - BAIBEL (BSI)

Akipitiu

¹ Noye kiutou jukighilepu kela! apukhu kuqhopukelo opukhuye kiutoi jukivi kela ! Oyikughiye ahikivi kumlamino mulatsu keu toike.

² Opolaye chithakhu hoboi keulo atsayiji lekitevekeu haumono ake toike. Opoye ashothi lekumqope ake toike.

³ Okichhi kumaye ashe tuna lakhi toi eno achuyi kini toike.

⁴ Oku-oye akuha huno aghukhu-a shikeu toi. Onhethiye Heshbon phughilo Bath-rabbin khagho phivilo azukucho akeu toike. Onigipeye Libanon lo aghukhuano Damaska phughi kudau khekuto akeu toi jukivike.

⁵ Okutsuqaye Karmel toghi toi qhemghai puani. Osa ghopukeu huye phepheyikeu aghile phi toi phuphuyi ani; tipau jukiviye kukami tshuluve kulupu ani.

⁶ Noye musumulayi jukighilepuke; okikimiye loye musukulupu ani.

⁷ Noye amsa subo toi ahi kivipushi jukivike, eno okichhiye amsa lothi aphoshi akeu toike.

⁸ Niye amsa subolo mili ikuno tipau xathi xoni. Ighenguno okichhiye atsayithi aphoshi akeu toike, otuthuye pukhothi xokutsungu toike,

⁹ eno okichiye atsayiji akiviu toike. Atsayijiye vejoi ilomi lau qowulu pelo, pamutsu ngo pahulo qoiku pelo.

Atotiu

¹⁰ Niye ilomi wuke eno pa pulouye nike.

¹¹ Ighilo, alomi nikujo aluzaqhalo wunike eno aphu lono putho tsala puwonike.

¹² Nikujo itheno ithu puzu atsayibo juwuni, tipaqoye thu ipeghi akemokela juni, atsayiboye pu ayeamala juni eno khaghatu suboye akupu ipeghi amala junike. Tileno ino okimiye nike.

¹³ Noye tileno zunilobo xo tsungulu nani, eno axathi aghile jeli kumtsu nihukikha phivilo anike. Alomi, olopivi kepu jeli aqau ghi akitheu ghi ino oghenguno hekutsu puanike.