ALE KIMCHI 6 - BAIBEL (BSI)

Totimiqo

¹ Totimi gholo shishe ajukiviu, olomiye khila wuvea kya? Olomiye khipalalo wuve keno nivilo pilo, tishianguno ninguno osasu pa phuwuni.

Atotiu

² Ilomiye pa ghutulo chevae, ti vekutsungu tsunibo ipeghi keu alo Paye aghutulo pa tsu-aqu loji achu kumza ani eno lapu kupu xokike ani.

³ Ilomiye iwuke, eno niye pawuke; Paye lapu xamunu gholo patsu-aqu loji achukumza cheni.

Ale Apunguu Akipitiu

⁴ Ilomi, noye Jerusalem toi jukighilepu ke, Tirza phughi toi juvike, Ghushimino mchiphi pecheketoi akumzapuke.

⁵ Onhethi ilauno tsughuvelo; tipaqono isuhupholuve anike. Osaye anetsu lojino Gilead naghuto lo koha iqi cheke toi lumlumyi ani.

⁶ Ohuqoye bheri lojino anileshi azukuchhu pusu akeshi metsughoi ani. Tipaqo lakhimu ila mphi eno tipaqo kumtsu mutsasai ajo kithipe ani.

⁷ Ogi kunhapu qholo ogimuchuye khaghatu ghaphope tuxaxa shi puake toi ani.

⁸ Akukauye pa nipu lhotsugho ani, alojilimi lhotache ani, eno ilimi lhotheno kihi kumla pushi ani!

⁹ Ikemu niye milakhi likhi kimiye ani, eno liye miqhedu lakhi toi jukivike. Li pazaye anga li likhike, azano qhuivulai chekeu nga lakhike. Totimi kumtsuno li jupesu li sheqhe; kukami nipu ngo alojilimino li sheqheke.

¹⁰ Inaqhe aqhi tsukinhe vuqai akeshi eno ghushimino michiphi peqhepe chekelo saghu saghu ithulu akeu hiye khuu kya?

¹¹ Niye axathililo iqino akhilalo asubo akhuni, atsayibo khuni eno khaghatu kupu ipeghi amalaye juniyeke.

¹² Ino kutokughoi lumphi lono ilomino ikughape khurkululo ikukapuu phivilo kughuqae.

Totimiqo

¹³ Ide ighilo, ide ighilo, O Shulam liu, ide ighilo ide ighilo, ninguno ojukutonike. Ghushimi aqo kinino ilhe akeu ju akeshi nonguye kushiye Shulam liu jukuto anikya?