ALE KIMCHI 4 - BAIBEL (BSI)

Akipitiu

¹ Ilomi, noye kiutoi jukivi kela! Ogi nhapu akeu qhou onhethilo kimiyekeuno vuqaipe ani. Ane loji lakhino Gilead naghutolo koha chekeshi osano lumlumyi ani.

² Bheriqono anileshi asa ghoveno azukuchhupu akeshi ohuye metsughoi ani. Ohu lakhimu ila mphi, tipaqo kumtsu ajokivishi mutsasai ani.

³ Omtsuye huchuikeu phishe toi eno okichiye juvi! Ogi kunhaphi qholo agimuchuye khaghatu ghapho tuxaxa shipua keu toi ani.

⁴ Okuoye David ghukhua toike, ochila huye aghushi zuto 1,000 pufu pesu vehomxa puakeu toike.

⁵ Okichhi kumaye asheti kini toi, eno achuyi atuna pittikishepe achumuza aketoi ani.

⁶ Niye musughuta toghilo tsungquikeu mukhu toghilo, inaqhe tsuzuyi mulhu moke kutolo eno akuzu kuhavemo ke kutolo ngoni.

⁷ Ilomi noye kiutoi jukivi kela? noye tichetighe kiumu kuhae!

⁸ Libanon naghuto kudauno igholo ighilo, iwu kulaliu; Libanon kudauno, Amana toghi kudauno, Senir toghi, Hermon toghi eno abongushu ngo angushu achekeu tuki qhiveno igholo ighilo.

⁹ Imlo kuchuu eno iwu kulaliu, onhethino jukeu eno ochi niakeu huno imlo sunheluvae.

¹⁰ Okikimiye ye kiutoi ngoniyi kela! imlo kuchuu eno iwu kulaliu. Okikimiyeye atsayiji nguno akiviuke; owu vekutsungupu teliye jumghai keu mukhu nguno tsungquike.

¹¹ Ilomi, omutsuye akhingozu michelu ake toi, Omiliye ighenguno akichhizu eno akhingozu toike, ophimini kumtsu Libanon xokutsungke.

¹² Putupuakeu ghutu huye ilokeu, iwu kulaliu, putukhave keu ghutu eno chishidape qhive keu zupukike.

¹³ Tipaqoye khaghatu xathi li lakhi toi thuwu acheni eno axathi akiviu likhi pithi acheni. Tilehiye amchhu, axokutsungu tsuni,

¹⁴ khungthibo, kalamu eno akussabo momu tsungquikeu mukhu jeli kiumu kuhakeu shimo nani. Tipaulo musughutabo ngo Aloyi bo shishe tsungqui keu xokumna pususu thuipeghi ani.

¹⁵ Azupuki akeu ghutu akuxupu zukikhe eno Libanon naghuto lono qoiqighi akeu ghokitiqo. Atotiu

¹⁶ Ahuu mulhu, Appeu mulhu idathughilo, ighutu shou mulhu pukulo; tsungquikeuno amlhulo chhilulo. Ilomi pelo pa ghutulo ighi puzu tipaulo axathi akiviu chupelo.