ALE KIMCHI 3 - BAIBEL (BSI)

¹ Putholo izualo zuno ino kimiye kicheu phuju, ikemu ithumla, ino paku ikemu khochilemoe.

² Niye itehi ithuno aphughiqha, alaghila eno bidola kumtsulo wuno ino kimiyechekeu phuwuni.

³ Aphughilo iqhoiqi khechekemino ijuthuluve. Ino panoqo vilo iniju, “Nonguye ilomi ithulukeo mokya?”

⁴ Ino panoqo qhiveno wuve kemtsa ino pa phulu. Ino pa valuve eno pa sasu izano kilo ipunu chebo kutolo wu eno niye pa phepuwumoe.

⁵ O Jerusalem lo totimiqo, ivilo piqhivelo, Ashe ngo achuyi jeku puzu nonguye nino kimiyekile akeu vexatsu mokepi tushoqhilo.

Ale akuthuu Atotiu

⁶ Asayeqha kudauno amichhi phoikughi ake toikeu Musughuta ngo tsungquikeu tano tsungqui alhikishimino jechekeu tsungquikeu mukhu ighi akeu hipaqoye kiu kya?

⁷ Julo, Israilmi ghushimi gholo aghutomi; Ghushimi lhotsughono akukau lakhu suhope Solomon kuhope cheni.

⁸ Panongu kumtsu azutakihi pucheni eno aghulo shitsami; Panoqo lakhikhino azutakihi pepuno putholo le ighi kenosa kehu khekuto ani.

⁹ Akukau Solomon lakhu ye Libanon supe mla puani.

¹⁰ Tipau tsukuchoqoye tsandiyino shi; akutsukilepuye shunano axamunu shisukeu phi pesu tipau shou ani. Tipaulo iqakepuye phepheyikeu phino kuzu, tiye Jerusalem lo totimiqono kupuqhiyi ghokeu phike.

¹¹ Zion lo totimiqo ighilo eno Akukau Solomon julo. Paye pazano pakutsu qhopipekeu kutsuqho pepu ani, tiye pa kukula tsalanino pepipe keu, pa lokivi eno pa lokughunopu tsalanino pepipe keuke.